1 Korintus 14
14
Ngutama komampuan husus co ika ngorohon dongan
14:1-25
1Ngutama ika hopomasi. Tuu-tuu nyau ngohaba kawan komampuan husus ingkan Roh Mohotara, husus eh komampuan ika porapot kawan tungon ingkan Mohotara. 2-3Awi dulun co porapot tungon Mohotara mantun ma kolunon. Tungon cioh ngorohon iman, posomput somangat hintang mohibur iroh. Are mahi mohibur dongai co nohimo kosusah. Tapi dulun co tomihi komampuan husus ika hopander ponah bohasa roh, dulun cioh hopander hia Mohotara, aroko ma kolunon, awi arelu oko dulun co paham luang antun eh 4Dulun co hopander ponah bohasa roh ngorohon arop eh tarop. Tapi dulun co porapot kawan tungon ingkan Mohotara ngorohon jomaat. 5Akuh jorih amun ikan uras haba hopander ponah kawan bohasa roh. Tapi meleh pio hurai amun ikan haba porapot kawan tungon ingkan Mohotara. Awi, dulun co porapot kawan tungon ingkan Mohotara meleh boguna hangki dulun co hopander ponah bohasa roh. Tapi amun oko co monjelas arti ingkan antun ponah kawan bohasa taiyoh, hanyar bat antun cioh boguna ika ngorohon jomaat.
6Nah, soandaieh akuh dombut hia ikan paluh hopander ponah bohasa roh, akuh aroko boguna indam me. Hanyar aku boguna amun akuh mara ma ikan tintun kawan aang co tomporahan Mohotara ma akuh. Atawa akuh monjelas kawan aang ingkan Roh Mohotara co tomonau kuh. Atawa akuh porapot kawan tungon ingkan Mohotara atawa majar aranaang ma ikan. 7Aang taiyoh hegah tonyomporengu ma banda co muhing isan alat musik sulim atawa konyapi. Amun kawan saluk eh aroh jelas, moh tonai dongan hegah monau lagu co tomusik eh. 8Atawa isan torompet co tomokuhing ika naah tontara hokohojat. Amun uhing eh aroh jelas, mositi arelu oko tontara co angar nyiap arop eh. 9Sanioh ka ma ikan co hopander ponah bohasa roh. Amun antun me aroh boraoi tomaham, moh tonai dongan monau antun me yoh! Antun me mohampa somporengu ikan hopander ma bahi leh.
10Mula oko orong bohasa nyan dunia. Kokoieh oko artieh. 11Tapi amun akuh aroh paham bohasa dulun cioh, maka akuh jarin dulun bokon indaieh. Are mahi jarin dulun bokon indang kuh. 12Sanioh ka ma ikan. Mula ikan korinah jere tomihi kawan komampuan husus ingkan Roh Mohotara. Tapi, sobulih eh ikan ngonyere komampuan husus ina ikan tuu-tuu hegah ngorohon jomaat.
13Poko tului iyoh, dulun co hopander ponah bohasa roh sobulih bodoa ina are mahi ihin komampuan ika monjelas arti ingkan antun ponah bohasa cioh ma jomaat. 14Akuh mantun iyoh awi amun oko dulun co hopander ponah bohasa roh, mula roh eh co bodoa. Tapi are aroko mongguna akar pikir eh. 15Jadi, sobulih eh ito nguan otuh: Ito sobulih bodoa hapo roh to. Tapi ito mahi sobulih bodoa hapo akar pikir to. Ito sobulih monyanyi potara hapo roh to. Tapi ito mahi monyanyi potara hapo akar budi to. 16Awi, amun oko nyan halo ikan co mucap sukur ma Mohotara hapo roh eh leh, maka dongai co hadir aroh boraoi paham antunmu yoh. Moh tonai dongam nisi ‘Amin’#14:16 Amun dulun mantun ‘Amin’, borati are sotuju ma luang doa cioh. ma antun torima kasih mu yoh! 17Oluco antun torima kasih mu pio lau tapi iko aroh umpi dongam sasar porocaya meleh borohon. 18Akuh bosukur ma Mohotara awi akuh hopander ponah bohasa roh meleh derek hangki kokom me. 19Tapi nyan waktu dulun porocaya kumpur ika boribadah, tujuan kuh ika majar dongang. Jadi, akuh meleh mili ika mucap limo koluang antun co boraoi tomomaham hangki boribu-ribu koluang antun ponah bohasa roh co aroh koraon tomomaham dongang.
20Konduang bakah bawe, jarin isan anak daja ponah kojahat awi anak daja aroh nyono alogawi jahat. Tapi aroh jarin isan anak daja ponah ikan bopikir tintun kawan komampuan husus ingkan Roh Mohotara. Ponah aang taiyoh, ikan sobulih bopikir isan dulun co ngongko rohani.
21 Porhati antun Tuhan co tonulih ponah Hukum Torat. Hie-Eh, “Akuh angar mantun ma umat-Kuh tuh hapo kawan bohasa dulun bokon hintang molalui bangsa bokon. Amun, iroh tenden aroko angar ngoneh Akuh.”#14:21 Ingkan Yesaya 28:11-12. 22-23Jadi ingkan poristiwa cioh, ito monau komampuan ika hopander ponah bohasa roh iyohco ciri indan dulun co aroko porocaya, bokon indan dulun co porocaya. Misal eh, kokon jomaat me hokumpur nyan ico ika. Nyan waktu cioh, kokom me hopander ponah bohasa roh. Opaiyoh, oko kawan dulun bokon atawa kawan dulun co aroh porocaya muntam hia ponah ika cioh. Mositi iroh angar mantun bahawa kokom me iyohco kawan dulun bobujon. Iroh aroh angar jarin porocaya ma Yesus.
Tapi, komampuan ika porapot kawan tungon ingkan Mohotara iyohco ciri indan dulun co aroko porocaya, aroh indan dulun co porocaya. 24Misal eh, kokon jomaat me hokumpur nyan ico ika. Nyan waktu iyoh, kokom me porapot kawan tungon ingkan Mohotara. Opaiyoh, oko dulun bokon atawa dulun co aroh porocaya co muntam hia ponah ika cioh. Kokon antun me yoh angar porahan kawan dosaieh hintang umpi are jarin tohoku ma kawan dosaieh. 25Tungon Mohotara cagar porahan bahawa aang co tocuhuk ponah atoi dulun cioh jarin tobuka. Jadi, are angar bolutut kawun nyembah nyuku Mohotara hintang are angar mongaku, “Mohotara tuu-tuu oko nyan halo ikan.”
Porkumpulan dulun porocaya ponah kosombayang sobulih toratur
14:26-40
26Jadi santuhleh konduang kuh bakah bawe: Nyan waktu ikan bokumpur ika sombayang, oko co monyanyi lojut potara, oko co majar sosuatu, oko co porapot sosuatu co tomporahan Mohotara ma are, oko co hopander ponah bohasa roh, oko co monjelas arti ingkan antun ponah kawan bohasa cioh. Uras iyoh sobulih tongompian ika ngorohon dongan.
27Amun oko co siap hopander ponah bohasa roh, maka baya duo beti boraoi umpi, atawa paling orong tolu beti. Iroh sobulih hogilir bopander, hintang sobulih oko dulun bokon co lian monjelas arti ingkan antun ponah kawan bohasa taiyoh. 28Amun aroko dulun co lian monjelas arti ingkan antun ponah kawan bohasa cioh, maka iroh aroh boraoi hopander ponah kawan bohasa roh ponah kohosopopak jomaat. Iroh baya boraoi hopander ponah kawan bohasa cioh ponah atoi ma Mohotara.
29 Bokon onon mahi nyan waktu ikan hokumpur ika sombayang, pioeh duo atawa tolu beti porapot kawan tungon ingkan Mohotara. Anggota jomaat co bokon sobulih monilai amun antun doh bujur-bujur ingkan Mohotara atawa aroh. 30Tapi, amun Mohotara porahan aranaang ma dulun bokon co tuot nyan intin, maka dulun co dahat hopander sobulih tondo. Olu dulun bokon yoh bopander. 31Awi, ikan uras lian porapot kawan tungon ingkan Mohotara socara bogilir. Ma cara cioh, ikan uras lian tomajar, tonosehat kawun tomondorong ika sasar porocaya. 32Poraturan cotuh boraoi tongumba pian kokon dulun co empun komampuan ika porapot kawan tungon ingkan Mohotara. Awi kokon dulun yoh sangup mongondali komampuan taiyoh. 33Mohotara iyohco Mohotara co herak ma kongolandah; Are aroh Mohotara co herak ma kokacau.
34Samah isan kawan poraturan co tongumba pian kokon jomaat Mohotara. Nyan waktu ikan hokumpur ika sombayang, kawan bawe sobulih tonih. Iroh aroh boraoi hopander.#14:34 Nyan 1Kor. 11:5, ocop jelasa Paulus kuhan bewe ika bodoa hintang porapot kawan tungan ingkan Mohotara ponah kohosopak jomaat. Mungkin co tomaksut nyan intoi iyoh co kawan bawe co aroko mohormat ma banaieh. Iroh hojawab ma banan doh nyan tohimo dulun ponah kohosopopak jomaat. Tapi iroh sobulih tunduk. Otuh sosuai ma antun co tonulih nyan buku Hukum Torat dulun Israel. 35Amun ico bawe oko aranaang co jere eh monau, are boraoi ngisok eh ma banaieh nyan lopo. Awi, aroh patut amun bawe hopander ponah ibadah.
36Mingkat eh bahawa Antun Mohotara aroh borasar ingkan ikan nyan kota Korintus. Hintang, Antun cioh mahi tomomborita hia dulun bokon, aroh baya tomorapot hia ikan. 37Amun oko dulun co bopikir arop eh empun komampuan ika porapot kawan tungon ingkan Mohotara, atawa are bopikir are empun komampuan bokon ingkan Roh Mohotara, dulun isan iyoh sobulih monau otuh: Kokon co tonulih kuh indam me iyohco kawan porentah ingkan Tuhan. 38Tapi amun oko dulun co aroh momporhati porentah kuh, aroh ikan momporhati dulun cioh.
39Jadi, konduang kuh bakah bawe, ikan sobulih oko kojere ika norima komampuan ika porapot kawan tungon ingkan Mohotara. Arohboh ngosiit dulun ika hopander ponah bohasa roh. 40Tapi kokoieh sobulih tongompian ma cara co pio hintang toratatur.
Currently Selected:
1 Korintus 14: TBSS
Highlight
Copy
Compare
Share
Want to have your highlights saved across all your devices? Sign up or sign in
