1 Korintus 13
13
Kokon komampuan husus sobulih tohapan ika hopasi dongan
13:1-13
1Soandaieh akuh lian hopander ponah bobagai bohasa kolunon atawa kawan bohasa molekat, tapi amun akuh aroh hopasi dongang, borati komampuan husus kuh yoh aroh boguna. Akuh somporengu kolantung co tomokuhing aroh botujuan atawa lonceng co mondanging leh. 2Soandaieh akuh ihin komampuan husus ika porapot tungon ingkan Mohotara, atawa soandaieh akuh paham kokon roncana Mohotara co arinai tomara ma dulun bokon atawa soandaieh akuh lian monau kokon aranaang atawa soandaieh akuh porocaya borohon lau dapot akuh hegah mindah puruk, tapi amun akuh aroh hopasi dongang, akuh aroh boguna. 3Soandaieh akuh mombagi-bagi kokon harta takuh, malah akuh lera nyarah beting kuh ika tomapang ponah apui, tapi akuh aroh hopasi dongang, kokon iyoh aroko gunai.
4Kasih yoh sabar hintang pio atoi. Kasih yoh aroh bosingon. Are aroh potamam arop. Are aroh bolecak. 5Are aroh botingkah nyongkohaan, aroh pongasar, are aroh momaksa dongai ika nontumun kojereeh tioh, mahi aroh nyua tosinggung, hintang aroh dandam. 6Kasih yoh aroh jorih jerah amun dulun umpi kojahat. Tapi are jorih tului kobujur. 7Kasih yoh hegah noro nohimo kokon macam kodolee hintang kosusah. Are horoholuh porocaya. Are horoholuh yakin hintang boharap ma Mohotara ponah kokon koadaan. Are horoholuh sabar nohimo kokon aranaang.
8Kasih aroh angar boahir tapi nyan ico kotika daai, komampuan husus ika porapot tungon ingkan Mohotara angar niho. Komampuan husus ika hopander ponah bohasa roh angar boahir. Komampuan husus ika monau orong aang ingkan Roh Mohotara angar lanyap. 9Awi nyan waktu makitu tuh, komampuan husus ika monau kokon aang aroko somporaka. Komampuan husus ika porapot tungon ingkan Mohotara mahi aroko somporaka. 10Tapi, daai kokon co aroko somporaka angar lanyap kotika co somporaka dombut. 11Ibarat eh hiah waktu ito jarin ngongko, kawan aang co bosipat kawan daja aroh tomorulu bat. Waktu ito incah daja, ito hopander isan kawan daja. Ito bopikir isan kawan daja. Ito umpi roncana isan kawan daja. Tapi waktu ito jarin ngongko, ito umbot umpi kawan aang co bosipat isan kawan daja. 12Ma tindung co bokon, ito makitu tuh ibarat eh ito bosoramin kito tontingoi co ora-orah. Tapi daai ito angar noto socara lansung. Makitu ito baya nyono Mohotara socara kurang somporaka. Tapi daai ito angar nyono Are ma kosomporaka. Samah isan Mohotara ocop nyono ito ma kosomporaka. 13Jadi, ponah koadaan makitu tuh oko tolu aang co sobulih tonguan to, iyohonon: tenden porocaya ma Yesus, aroh umbot boharap, hintang hopomasi. Co poko penting ingkan tolu non iyohco hopomasi.#13:13 Kura hopomasi ma dongan co poko penting? Oko orong komungkinan: 1) Amun ito hopomasi, ito moniru sipat Mohotara awi Are mahi hopasi ito. 2) Waktu ito co porocaya oko nyan sorga, ito aroh porulu porocaya hintang boharap ma Yesus bat awi ito ocop bolum halo Are socara lansung. Tapi ito angar hopomasi sumong kototahieh. 3) Hopomasi meleh penting nyan dunia tuh awi meleh tokait ma hubungan to ma dongan. Porocaya hintang boharap meleh tokait ma hubungan to tarop ma Yesus. 4) Hopomasi meleh penting awi aroh mungkin ito tuu-tuu porocaya hintang boharap arelu hopasi.
Currently Selected:
1 Korintus 13: TBSS
Highlight
Copy
Compare
Share
Want to have your highlights saved across all your devices? Sign up or sign in
