1 Korintus 12
12
Roh Mohotara mihi bobagai macam komampuan husus indan kawan dulun porocaya
12:1-11
1Makitu, Konduang bawe bakah, akuh nyau nulih tintun kawan komampuan husus co tomihi Roh Mohotara. Akuh nyau ina ikan bujur-bujur paham tintun kawan aang tatuh. 2Mingkat hiah waktu ikan incah arinai nyono Mohotara. Ikan tonyasat ika nyembah nyuku aang co boganan co aroh boraoi mantun ome-ome awi aang co boganan yoh aroh bujur-bujur bolum. 3Awi iyoh ikan sobulih monau bahawa amun Roh Mohotara momimpin dulun, dulun cioh aroh bodai angar polua kawan antun mohina Yesus. Isanioh ka arelu oko dulun co mampu mantun bahawa Yesus iyohco Tuhan co bokuasa amun dulun cioh aroko tonguasa Roh Mohotara
4Oko bobagai macam komampuan husus co tomihi Roh Mohotara indan to co porocaya. Tapi baya oko ico Roh Mohotara co mihi kokoieh. 5Oko bobagai macam cara dulun bogawi indan Tuhan. Tapi baya oko ico Tuhan co tomolayani to. 6Oko bobagai macam aang co mosotahir. Tapi baya oko ico Mohotara co nguan kokoieh ponah kokon dulun.
7Mohotara mihi komampuan husus ma hopomasing ito. Onon mombukti bahawa Roh-Eh bogawi nyan ponah hopomasing dulun co porocaya. Tapi kokon komampuan husus taiyoh tomihi ika ngorohon kokon jomaat. 8Misal eh, ma dulun cotuh Roh Mohotara mihi komampuan ika hopander ma akar pikir. Ma dulun codi Roh Mohotara mihi komampuan ika monau aranaang hintang porapot kawan aang taiyoh hia dongan. 9Ma dulun bokon kole, Roh Mohotara co samah yoh mihi komampuan ika porocaya ma Yesus ma korinah borohon. Ma bokon dulun, Roh Mohotara co samah yoh mihi komampuan ika pomambuh. 10Ma dulun bokon, Roh Mohotara mihi komampuan ika umpi aang co mosotahir. Ma dulun tonga, Roh Mohotara mihi komampuan ika mantun kawan tungon ingkan Mohotara. Ma dulun bokon, Roh Mohotara mihi komampuan ika mombeda maca-macam roh. Ma dulun bokon, Roh Mohotara mihi komampuan ika hopander ponah bohasa roh ingkan Are. Ma dulun bokon, Roh Mohotara mihi komampuan ika monjelas arti ingkan antun dolang ponah kawan bohasa roh yoh. 11Baya oko ico Roh Mohotara co mihi kokon komampuan husus taiyoh. Roh Mohotara mihi komampuan husus indan sika dulun hopomasing sosuai ma kojere-Eh.
Kawan dulun porocaya ihin bobagai macam komampuan husus ina hokolengkap
12:12-31
12-13Oko orong dulun co bobeda-beda co porocaya ma Kristus. Oko kawan dulun Yahudi, oko ka kawan dulun co bokon ma Yahudi. Oko cipon hintang oko dulun mordeka. Tapi, ito ocop uras tomombaptis hintang jarin ico pian Roh co samah. Ito mahi uras norima Roh co samah ponah atoi to. Poko tului iyoh, ito co porocaya somporengu ico beti.
Beti cioh ico tapi oko orong angota. 14Beti cioh aroh todiri ingkan ico angota leh. Beti cioh todiri ingkan orong angota ma bobagai macam gunaieh. 15-16Soandaieh paa boraoi hopander hintang mantun ma beti, ‘Akuh bokon silu, jadi akuh aroh bagian ingkan beti!’ Oluco paa nisi isanioh paa tatap sobagai bagian ingkan beti. Hintang soandaieh tolinga boraoi hopander hintang mantun ma beti, ‘Akuh bokon mata, jadi akuh aroh bagian ingkan beti!’ Oluco tolinga nisi isanioh, tolinga tatap sobagai bagian ingkan beti. 17Soandaieh, ngolauh beti cioh baya mata leh, aroh mungkin beti cioh lian ngoneh! Atawa amun, ngolauh beti cioh baya tolinga leh, aroh mungkin beti cioh hegah marok! 18-19Soandaieh ngolauh beti cioh baya ico jenih angota, maka beti cioh aroh borupa beti bat. Tapi nyataeh, Mohotara nampa beti cioh sosuai ma kojere-Eh. Are matur sika bagian hopomasing ina boguna ponah beti cioh.
20Memang, oko orong bagian, tapi baya oko ico beti. 21Jadi, mata aroh boraoi mantun ma silu, “Akuh aroh morulu iko!” Kuhung aroh boraoi mantun ma paa, “Akuh aroh morulu iko!” 22Malah sobalik eh! Kawan bagian beti co tomangap lamah, sobujur eh meleh tomorulu. 23Kawan bagian beti co tomangap to kurang tomohormati, sobujur eh ito meleh mohormati bagian cioh. Caraeh ito nutup bagian taiyoh ma lembon. Nohani bagian beti co aroh boraoi tomototo nyan muka umum. Ito mohormati kawan bagian taiyoh ma momporhati bagian taiyoh horoholuh tonutup ma lembon. 24Tapi kawan bagian beti co boraoi tomototo, kawan bagian taiyoh aroh porulu porhatian isan iyoh. Jadi, ito sobulih meleh momporhati kawan bagian beti co tomangap to kurang tomohormati. Ciohboh caraeh Mohotara meleh mohormati kawan bagian taiyoh waktu Are nampa beti cioh. 25Mohotara nguan iyoh ina kawan bagian beti taiyoh aroh hokoleang, tapi saling momporhati co bokon. 26Amun ico bagian beti poroh, maka kokon bagian beti co bokon umba poroh. Amun ico bagian beti tomohormati, maka kokon bagian beti umba jorih.
27Ikan kolompok dulun porocaya somporengu ico beti, iyohonon betin Kristus. Ikan hopomasing bagian ingkan beti-Eh yoh. 28Mohotara matut kawan dulun ponah jomaat. Co portama, kawan rasul, iyohonon kawan dulun co tomili ika momborita Tarung Pio. Co koduo, Kawan nabi, iyohonon kawan dulun co porapot tungon ingkan Mohotara. Co kotolu, kawan dulun co ihin komampuan ika majar. Paluh, oko kawan dulun co ihin komampuan ika umpi aang co mosotahir. Oko ka kawan dulun co ihin komampuan ika pomambuh, kawan dulun co ihin komampuan ika dohop dongai, kawan dulun co ihin komampuan ika matur urusan jomaat, paluh kawan dulun co ihin komampuan ika hopander ponah kawan bohasa roh ingkan Mohotara. 29Mohotara aroh umpi kokon dulun porocaya uras jarin rasul! Aroh uras dulun porocaya tomili jarin nabi. Aroh uras dulun tomili jarin pongajar. Aroh uras dulun ihin komampuan ika umpi aang co mosotahir. 30Aroh uras dulun ihin komampuan ika pomambuh. Aroh uras dulun ihin komampuan ika hopander ponah kawan bohasa roh ingkan Roh Mohotara. Aroh uras dulun ihin komampuan ika monjelas arti ingkan antun ponah kawan bohasa taiyoh. 31Tapi ikan sobulih korinah bolingu norima kawan komampuan co poko utama.#12:31 Nyan 14:1, Paulus monjelas kawan komampuan co poko utama iyohco komampuan co lian dohop dongan ina iroh porocaya meleh borohon ma Yesus, atawa ka ina iroh mahi porocaya meleh borohon ma Yesus.
Pongaan tuh akuh angar mara ma ikan tintun cara hapo kawan komampuan taiyoh ma cara co poko pio.
Currently Selected:
1 Korintus 12: TBSS
Highlight
Copy
Compare
Share
Want to have your highlights saved across all your devices? Sign up or sign in
