1 Korintus 11
11
1Jadi, nontumunleh toladan kuh yoh, samah isan akuh nontumun toladan Kristus.
Bawe bosorudung benang nyan kotika boribadah
11:2-16
2Akuh nara ikan awi ikan horoholuh mingkat akuh. Akuh mahi nara ikan awi ikan horoholuh nontumun kawan ajaran co batuh ocop kuh porapot eh ma ikan. 3Tapi akuh nyau ikan monau aang ico kole, iyohonon bahawa co jarin kuhung sika bakah iyohco Kristus, hintang co jarin kuhung ma oruh iyohco bakah bana, hintang co jarin kuhung ma Kristus iyohco Mohotara. 4Jadi, hiah waktu ico bakah bodoa atawa mantun kawan tungon ingkan Mohotara, aroh are nyorudung kuhung eh ma benang. Amun are nguan iyoh, borati are mohina kuhung eh.#11:4 Oko ahli Alkitab co bopikir mungkin Paulus bomaksud, ‘bakah mohina Kuhung eh, iyohonon Kristus’ ATAWA ‘bakah cioh mohina kuhung eh leh’, ATAWA ‘bakah cioh mohina arop eh tarop’. 5Tapi, hiah waktu ico bawe bodoa atawa mantun kawan tungon ingkan Mohotara, are sobulih nyorudung kuhung eh ma benang. Amun aroh, are isan bawe co tomohina ma cara ngunting baloeh dapot diwek.#11:5 Hiah jaman cioh, bawe ma ballo eh tonotok iyohco bawe co umpi dosa hokoruh. Oko poraturan ponah agama Yahudi bahawa kokon bawe co ngomano sobulih nyorudung kuhung eh ma benang.#11:5 Oko ahli Alkitab co bopikir mungkin Paulus bomaksud, ‘bawe cioh mohina kuhung eh, iyohonon banaieh’ ATAWA ‘bawe cioh mohina kuhung eh leh’, ATAWA ‘bawe cioh mohina arop eh tarop’. 6Awi, amun ico bawe aroh kolu nyorudung kuhung eh ma benang, meleh pio baloeh tonotok leh. Tapi indan bawe, notok atawa ngunting baloeh iyohco aranaang co ngohaan. Poko tului iyoh, meleh pio bawe nyorudung kuhung eh ma benang.
7Bakah moncermin tampa Mohotara. Bakah mahi moncermin bahawa Mohotara iyohco tohormat. Jadi, bakah aroh nyorudung kuhung eh ma benang. Tapi bawe moncermin bahawa banaieh hebat. 8Awi, Mohotara aroh nampa bakah ingkan bawe. Tapi Mohotara nampa bawe ingkan bakah. 9Bokon ma iyoh, Mohotara aroh nampa bakah indan bawe. Tapi Mohotara nampa bawe indan bakah.#11:9 Noto Kojadian 2:18-25. 10Poko tului kokon iyoh, bawe sobulih nyorudung kuhung eh ika ciri are bowibawa. Are mahi sobulih nguan iyoh tului kawan molekat.
11-12Oluco Mohotara nampa bawe ingkan bakah, aroh solingo bawe co nganak kawan bakah. Bakah hintang bawe kawun kokon aranaang borasar ingkan Mohotara. Jadi, ponah pongito Tuhan bawe penting indan bakah hintang bakah penting indan bawe. 13Huwah ikan mikir tarop tintun aang cotuh: Main pas amun bawe bodoa hia Mohotara aroh nyorudung kuhung eh ma benang? 14Malah ocop jarin kobiasaan bahawa amun bakah ombu balo iyohco hinaan indaieh. 15Tapi indan bawe, balo ombu iyohco aranaang co tohormat. Awi, Mohotara mihi balo indan bawe ika nutup kuhung eh.
16Amun oko dulun co nyau mantun naleh ajaran cotuh, sobulih tomingkat, kaih hintang kokon jomaat Mohotara nontumun kobiasaan conon.
Ajaran tintun acara kuman ika mingkat Yesus
11:17-34
17Tintun aang co tonisi kuh pongaan tuh, akuh aroh boraoi nara ikan. Awi amun ikan hokumpur ika boribadah, kohosopopak me yoh aroh mohasir aang co pio molahan co ceet. 18Potama-tama, akuh ngoneh bahawa waktu ikan hokumpur, oko kohokoleang nyan halo ikan. Akuh porocaya tarung cioh oko kobujur eh. 19Mula sobulih oko kohokoleang nyan halo ikan. Awi ina daai angar tonta ome nyan halo ikan co tahan uji.#11:19 Oko duo komungkinan indan arti ayat cotuh. 1) Paulus bomaksud oko kohokoleang awi oko kawan dulun co angar bujur-bujur sotia porocaya ma Yesus hintang oko co aroh. ATAWA 2) Paulus bomaksud bahawa iyoh alasan doh nyau hokoleang. Iroh nyau noto ome co buah hintang ome co sala. Sobujur eh, Paulus jere ina doh hokohico.
20Waktu ikan hokumpur, ikan aroh bujur-bujur moraya pojamuan Tuhan. 21Awi hiah waktu kuman sika dulun hotosoun kuman kanon co ehen doh leh. Tului isanioh oko co aroh haba ome-ome, sadangkan co bokon oko co buso. 22Sopunaeh ikan boraoi kuman ngorih nyan kawan lopo me tarop. Jadi, aroh mohina jomaat Mohotara hintang kawan dulun co mala ma alogawi isan iyoh! Mainboh ikan moharap akuh nara ikan ma alogawi isan iyoh? Mositi arelu kuh nara ikan!
23 Tapi amun ikan hokumpur, umpiboh porayaan pojamuan Tuhan ma cara co ocop kuh porapot eh ma ikan. Tuhan leh ocop majar iyoh ma akuh. Iyohonon: Hiah komomi sorinai Yesus tonyarah hia kawan musuh-Eh, Are hokumpur ma kawan murid-Eh.#11:23 Yesus hokumpur ma kawan murid-Eh ika moraya Paskah. Tapi, Yesus mongganti arti ingkan acara cioh ika Mingkat Are. Noto Mat. 26:26-30; Mrk. 14:22-26; Luk. 22:14-23. Yesus monu rute 24paluh mongucap doa sukur ma rute cioh. Are hosila rute cioh ma silui-Eh, Hie-Eh, “Tuhboh beting-Kuh co tongurban Mohotara indam me. Nguanboh otuh horoholuh ika mingkat Akuh.” 25Opah doh umbot kuman rute hintang kanon Paskah paluh, ma cara co samah ma rute nin, Yesus mihi cangkir angur hia iroh. Samir iyoh, Are mantun, “Danum angur ponah cangkir cotuh iyohco Porjanjian co Baa ingkan Mohotara#11:25 Mohotara umpi Pojanjian Baa ma kolunon ina sika dulun ihin kosempatan ika jarin anggota umat-Eh. Hiah jaman sinan, dulun Israel tomalak sobagai ciri iroh umat Mohotara. Iroh momposembah komolum ina dosan doh tomampun, Tapi Yesus nahur hukuman dosan to hiah waktu Are matoi nyan kaju sompolaki. Jadi makitu ome bewe co porocaya ma Yesus hintang bolum sosuai kojere-Eh, dulun cioh tomampun paluh jarin umat-Eh. hintang ocop tomonsah molalui daha-Kuh. Sotiap kali ikan ngorih eh, nguan aang cioh ika mingkat Akuh.” 26Awi, sotiap kali ikan kuman rute hintang ngorih angur cioh, artieh ikan momborita tintun pompatoi Tuhan dapot Are dombut hopuli.
27Jadi, amun oko dulun co kuman rute hintang ngorih angur ponah acara cioh ma cara aroh mohormati Tuhan, maka are bodosa tohimo betin hintang daha Tuhan. 28Poko tului iyoh, sika dulun sobulih morisa arop eh houn. Opah iyoh, hanyar are boraoi kuman rute hintang ngorih angur cioh. 29Awi, amun are kuman hintang ngorih ponah acara cioh aroh mongakui betin Tuhan,#11:29 Oko duo komungkinan indan arti ayat cotuh. 1) Dulun co kuman hintang ngorih sobulih sadar bahawa rute hintang angur cioh bujur-bujur mowakili betin hintang daha Yesus. Aroh mangap isan kanon biasa. ATAWA 2) Dulun co kuman hintang ngorih sobulih momporhati kawan dulun bokon co porocaya. Aroh lansung monu kanon tarop aroh momporhati kawan dongan, iyohonon betin Yesus. (Noto 1 Korintus 12:12; Epesus 4:12.) are angar tomohukum. 30Ononboh tuluieh orong ingkan ikan jarin lamah hintang hotoro. Cukup orong ka ocop matoi. 31Tapi amun ito morisa arop to houn, maka ito aroh angar tomohukum. 32Hintang amun Tuhan majap ito co porocaya ma-Are, borati Are dahat mondidik ito ina daai ito aroh angar tomohukum homboh dulun bokon nyan dunia tuh co aroko porocaya.
33Poko tului iyoh Konduang bawe bakah, kotika ikan hokumpur kuman ika moraya pojamuan Tuhan, ikan sobulih hokanto co bokon. Aroh kuman kanon co ehem me hopomasing. 34Amun oko co dou, keleh are kuman houn nyan lopoeh. Nguan kokoieh yoh, ina kotika ikan hokumpur, ikan aroh jarin ponyebap Mohotara mohukum ikan. Nyan waktu akuh dombut hia Korintus, akuh angar majar ikan tintun kawan aang co bokon kole.
Currently Selected:
1 Korintus 11: TBSS
Highlight
Copy
Compare
Share
Want to have your highlights saved across all your devices? Sign up or sign in
