1 Korintus 1
1
Tontoke ingkan Paulus
1:1-3
1 Surat cotuh ingkan akuh, Paulus. Akuh tonaah ika jarin rasul Kristus Yesus awi iyoh kojere Mohotara. Tontoke ka ingkan Sostenes, konduang to co porocaya ka.
2Indan jomaat Mohotara nyan kota Korintus. Ikan jarin ico ponah Kristus Yesus. Ma cara cioh, ikan tomisah ingkan dongam me co aroh porocaya Yesus. Mohotara naah ikan ika jarin dulun husus indai-Eh. Ikan jarin tioh Mohotara sama-samah ma kokon dulun nyan omoh bewe co porocaya ma Tuhan to, Yesus Kristus. Are iyohco Tuhan co bokuasa ma iroh hintang ma ito ka.
3Akuh bodoa ina Mohotara co Taman to hintang Tuhan Yesus Kristus horoholuh porahan kopioi-Eh hintang mihi kongolandah kongolami indam me.
Paulus bosukur awi Mohotara mihi angco pio hinut ma jomaat nyan Korintus
1:4-9
4Akuh horoholuh bosukur ma Mohotarang kuh tului ikan. Akuh bosukur awi Mohotara ocop porahan kopio ma ikan nyan ponah Kristus Yesus. 5Maksudkuh, awi ikan bolum ponah hubungan co haet ma Yesus Kristus, maka Are ocop mihi orong lau aang co pio indam me. Otuh tomasuk komampuan ika momborita tungon-Eh, hintang pongotahuan tintun kokon aranaang co oko kaitai ma kawan aang co rohani. 6Kokon onon tojadi tului kosaksian kaih tintun Kristus bujur-bujur nyolot ponah atoi me. 7Sohinga, ikan arelu oko kotopah ome bewe ponah komampuan husus co tomihi Roh Mohotara, sopondehan ikan nganto Tuhan ito, Yesus Kristus dombut hopuli hia dunia tuh. 8Kristus boh co angar dohop ikan tenden porocaya ma-Eh dapot ahir jaman, sohinga nyan waktu Are hopuli nyan ondo cioh daai ikan aroh hocala nyan tohimo Are. 9Mohotara horoholuh sotia, momonuhi kokon janji-Eh. Are co ocop naah ikan ina oko hubungan haet ma anak-Eh iyohonon Yesus Kristus, Tuhan co bokuasa ma ito.
Hokoleang ponah jomaat Korintus
1:10-17
10Kawan konduang kuh bakah bawe, ma kuasan Tuhan to, Yesus Kristus, akuh nosehat ina ikan hokohico atoi. Aroh ikan topisah jarin bobagai kolompok. Tapi oluleh ikan tuu-tuu hokohico ponah porasaan hintang pikiran me. 11Konduang kuh bakah bawe, akuh mantun nain otuh awi oko kawan dulun ingkan koluarga Klo co mara ma akuh tintun ikan. Iroh mara bahawa ikan bosolisih ico ma co bokon. 12Maksud kuh, oko nyan halo ikan co mantun, “Akuh pongikut Paulus.” Oko tonga co mantun, “Akuh pongikut Apolos.” Atawa “Akuh pongikut Petrus.”#1:12 Teks asli hapo araieh co Kepas. Cioh boh aran Petrus ponah bohasa Aram (bohasa Ibrani hondo-hondo). Tonga eh kole mantun, “Akuh pongikut Kristus.” 13Aroh sanioh. Mohtonai Kristus tobagi-bagi! Akuh, Paulus samah sindo aroh matoi nyan sompolaki indam me! Ikan mahi samah sindo aroh tomombaptis ponah arang kuh! 14Akuh bosukur akuh aroh mombaptis ico beti mahi nyan halo ikan kocuali Krispus doruo Gayus. 15Jadi makitu, arelu oko co boraoi mantun bahawa ikan tomombaptis ponah arang kuh. 16Mula akuh ka co mombaptis kokon dulun co nukui nyan lopo Stepanas. Tapi aroko ingkatkuh bahawa oko dulun bokon kole co tomombaptis kuh. 17Awi, Kristus aroh nyoruhan akuh ika mombaptis dulun. Tapi, Kristus nyoruhan akuh ika momborita Tarung Pio. Waktu akuh momborita Tarung Pio, akuh aroh hapo kolantih hopander bodasar ma akar kolunon. Ma isanioh, pompatoi Kristus nyan sompolaki aroko jarin mohampa.#1:17 Teks asli hapo ‘kuasa sompolaki Kristus’. Kaju sompolaki iyohco banda leh, arelu oko kuasa. Tapi kuasa cotuh boarti kuasa Yesus sobagai Laca Co Tomonjanji Mohotara (Yesaya 53; Pilipi 2:5-11; Epesus 1:20-22). Waktu Are matoi nyan kaju sompolaki, kuasa-Eh ocop tobukti (matan ondo aroko nontang, horden nyan Lopo Mohotara tirat tosah duo, Are bolum hopuli, hintang co bokon-bokon). (Noto Lukas 23:44-45). Dulun Yunani herak ngoneh kawan guru co pintar hapander. Paulus monjelas eh bahawa pongajaran kawan guru isan iyoh korinah bobeda hangki pongajaran Yesus. Tarung tintun Yesus oko kuasa aroko tului pongajaran hebat, tapi awi Yesus oko kuasa tomasuk kuasa ika mongubah cara dulun bolum hintang kuasa ika nyolamat dulun.
Akar pikir Mohotara topoleha ma pompatoi Yesus
1:18-25
18Oko kawan dulun co angar tongolumat Mohotara, iroh bopikir bahawa tarung tintun Yesus Kristus matoi nyan sompolaki iyohco aang co uong. Tapi indan ito co angar tonyolamat, ito monau bahawa tarung pio cioh porahan kuasan Mohotara. 19Awi, oko antun Mohotara ponah Surat Borasih co tonulih: “Akuh angar ngolumat akar pikir co oko nyan kawan dulun co pintar monurut kolunon. Akuh angar ngecoh pomahaman kawan dulun pintar.”#1:19-20 Ingkan Yesaya 29:14.
20Jadi, kawan dulun co pintar sobujur eh iroh arelu oko akar pikir eh. Kawan guru co majar Hukum Torat, sobujur eh aroh borati iroh boakar pikir. Sanioh ka kawan dulun co jarin kawan guru pongotahuan, sobujur eh iroh aroko akar pikir eh. Awi Mohotara ocop nguan akar pikir kolunon co oko nyan dunia tuh jarin konguong. 21Tapi Mohotara bujur-bujur boakar pikir. Ma akar pikir-Eh, kolunon aroh boraoi nyono Are hapo akar pikir duniawi. Amun dulun momborita Tarung Pio, aang cioh tomangap kuong. Tapi Mohotara sanang hapo cara cioh ina kawan dulun jarin porocaya ma Yesus paluh lian tonyolamat. 22Orong dulun Yahudi baya nyau noto aang co mosotahir. Orong dulun Yunani baya nganyap kopintar duniawi. 23Tapi kaih momborita bahawa Laca Co Tomonjanji Mohotara matoi nyan sompolaki Aang cioh umpi orong dulun Yahudi tosingung, hintang orong dulun bokon ma Yahudi mangap aang cioh kuong. 24Tapi Mohotara ocop naah kawan dulun, aroko poduli dulun Yahudi atawa dulun co bokon ma Yahudi. Bagi iroh Kristus iyohco kuasa hintang akar pikir Mohotara. 25Awi, roncana Mohotara co pongitan eh uong, tapi sobujur eh meleh boakar pikir hangki akar pikir duniawi. Alogawin Mohotara co pongitan eh lamah, sobujur eh meleh borohon hangki kokuatan kolunon.
Dulun Korintus tonaah ika potinjun akar pikir Mohotara
1:26-31
26Kawan konduang kuh bakah bawe, mingat eh koadaan me kotika Mohotara naah ikan ika jarin porocaya. Arelu orong ingkan halo ikan co tomangap dulun pintar monurut kolunon. Arelu orong co tomangap bopongaruh. Arelu orong co tomangap penting. 27Mula anta Mohotara nyongkohaan kawan dulun pintar, ma mili co tomangap doh uong hintang Are mahi nyongkohaan kawan dulun co bokuasa ma mili co tomangap doh aroh homana. 28Are mili co tomangap aroh penting, co remeh hintang co tomangap aroh borati monurut kolunon. Are nguan iyoh ika kawan aang co tomoleka nyan dunia tuh jarin aroh boleka. 29Tujuan Mohotara ina arelu oko dulun co boraoi mantun bahawa Mohotara mili are awi are labih pio hangki dongai. 30Jadi, ikan oko hubungan haet ma Kristus Yesus baya awi alogawin Mohotara, aroh tului alogawim me. Yesus jarin akar pikir Mohotara indan ito. Molalui Yesus, ito jarin buah nyan tohimo Mohotara. Ito mahi jarin dulun Tioh husus indan Mohotara. Are nahur hukuman dosan to. 31Poko tului iyoh, ito sobulih mingkat ome co tonulih ponah Surat Borasih: “Amun oko dulun co nongkomo banga, olu eh are banga ma alogawin Tuhan.”#1:31 Ingkan buku Yeremia 9:24.
Currently Selected:
1 Korintus 1: TBSS
Highlight
Copy
Compare
Share
Want to have your highlights saved across all your devices? Sign up or sign in
