Roma 16
16
Kawan antun tontiput Paulus ponah surat eh
16:1-27
1Akuh jere posono konduang to co bawe, Pebe. Are dohop jomaat nyan Kengkrea. 2Akuh jere mara ikan iyoh ina me norima are ma cara co pantas indan dulun co porocaya. Norimaboh are ponah Tuhan hintang dohopboh aang co tomorulueh. Awi, are ocop dohop orong dulun, tomasuk akuh mahi.
3Porapot tontoke indan Priskila hintang Akwila.#16:3 Kesah Priskila hintang Akwila oko nyan buku Kesah 18:2. Iroh bogawi samah-samah ma akuh ika molayani Kristus Yesus. 4Iroh piji jonyo matoi tului dohop pomolum kuh. Akuh botorima kasih ma iroh. Malah, uras jomaat dulun bokon ma Yahudi botorima kasih ma iroh. 5Porapot ka tontoke indan jomaat co hokumpur nyan lopo doh.
Tontoke indan Epenetus, konduang co tongasih. Are iyohco dulun co kosulak nyan derah Asia co jarin porocaya ma Kristus. 6Tontoke indan Maria co ocop bogawi bohimat indam me. 7Tontoke indan Andronikus hintang Yunias, kawan konduang ingkan bangsa Yahudi isan akuh. Iroh piji tomokuntam ponah seper homboh akuh. Iroh porocaya ma Kristus soun ma akuh, hintang iroh botisi nyan halo kawan rasul. 8Tontoke indan Ampliatus co tongasih kuh ponah Tuhan. 9Tontoke indan Urbanus co bogawi samah-samah ma kaih ika molayani Kristus. Tontoke indan Stakis co tongasih kuh. 10Tontoke indan Apeles. Are piji tonguji hintang porahan bahawa are tenden porocaya ma Kristus. Tontoke indan koluarga Aristobulus hintang kokon dulun co nukui ponah lopoeh. 11Tontoke indan Herodion, konduang ingkan bangsa Yahudi isan akuh. Tontoke indan koluarga Narkisus hintang kokon dulun co porocaya ma Tuhan co nukui ponah lopoeh. 12Tontoke indan Tripena hintang Triposa co bogawi bohimat molayani Tuhan. Tontoke indan Persis co tongasih kuh ka bogawi bohimat molayani Tuhan. 13Tontoke indan Rupus co tomili Tuhan socara husus. Tontoke ma tinan Rupus ka co ocop jarin isan tinangkuh. 14Tontoke indan Asinkritus, Plegon, Hermes, Patrobas, Hermas hintang kawan konduang bokon co hokohalo ma iroh. 15Tontoke indan Pilologus hintang Yulia; indan Nereus hintang konduang eh co bawe; indan Olimpas hintang indan kokon dulun porocaya co hokohalo ma iroh. 16Mihiboh tontoke komasi ma co bokon. Tontoke ma ikan ingkan kokon jomaat Kristus.
17Kawan konduang. Akuh nyawot asi lau ma ikan ina me botawat tohimo kawan dulun co nyau umpi hokoleang nyan halo ikan. Iroh nyau ina me jarin sasat. Ajaran doh botentangan ma ajaran co ocop tonorima me. Aroh umba iroh! 18Awi, kawan dulun co nguan isan iyoh sobujur eh aroko bogawi molayani Kristus, Tuhan to. Iroh baya nyau nyumpu kojere doh leh. Iroh hotara-tara ma kawan antun co hinut ika nipu dulun co aroko monau tujuan doh co jahat. 19Kokon dulun ocop ngoneh bahawa ikan nuhit Tuhan. Jadi akuh jorih jerah lau tului ikan! Tapi akuh jere ina me horoholuh bopikir akar monau ome co pio hintang aroko umpi kojahat. 20Mohotara co mihi kongolandah kongolami angar jion mohancur kuasan Lacan Setan nyan pinda paam me. Akuh bodoa ina Yesus, Tuhan to, horoholuh porahan koboraoi ma ikan.
21Tontoke indam me ingkan Timotius co bogawi molayani homboh akuh. Tontoke ka ingkan Lukius, Yason, hintang Sosipater, kawan konduang ingkan bangsa Yahudi isan akuh. 22Tontoke ponah Tuhan ingkan akuh Tertius, co nulih antun Paulus ponah surat cotuh. 23Tontoke indam me ingkan Gayus, co norima akuh nukui ponah lopoeh. Are mahi norima ponah lopoeh ome bewe kokon jomaat. Tontoke indam me ingkan Erastus, bondahara kota. Tontoke ka ingkan Kwartus, dulun co porocaya samah isan ito.
[24Akuh bodoa ina Yesus Kristus, Tuhan to, horoholuh porahan koboraoi indan kokon ikan. Amin!
25Topotaraboh Mohotara! Are co bokuasa umpi ikan borohon porocaya sosuai ma Tarung Pio tintun Yesus Kristus co tomomborita kuh. Tarung pio cioh mara tintun roncana Mohotara indan kokon bangsa. Kotahin boabat-abat, arelu oko kolunon co monau roncana Mohotara yoh. 26Tapi makitu Mohotara co bolum sokotahi-tahieh ocop mihi porintah ina roncana-Eh tomara, iyohonon roncana-Eh co ocop tonulih ponah buku kawan nabi. Ma sanioh, roncana Mohotara tomomborita indan kokon bangsa ina doh porocaya hintang nuhit-Eh. 27Areboh kotikas-tikas eh Mohotara. Areboh bopikir akar ponah kokon aranaang. Topotaraboh Are molalui Yesus Kristus indan sokotahi-tahieh. Amin!]
Currently Selected:
Roma 16: TBSS
Highlight
Copy
Compare
Share
Want to have your highlights saved across all your devices? Sign up or sign in
