Захарияа 9
9
Найдуулһан шэнэ орон нютаг
1Хадраах нютаг ба Дамааск хото тухай Эзэнэй айладхал бууба.
Эзэнэй нюдэн хамаг зондо, илангаяа Израилиин обогуудта ханданхай.
2Тиир, Сидоон шэнги Хадраах оронтой хилэ нэгэтэй Хамаат тээшэ
Тэрэнэй нюдэн баһал хандана.
3Тиир бата бэхи хэрэм бодхоогоод, шорой мэтэ ехэ мүнгэ,
гудамжын шабар мэтэ алта элбэгээр суглууланхай.
4Гэбэшье Эзэн эд баялигыень абажа, далай руу хаяжа,
хотонь галда шатаагдаха.
5Ашхэлоон энээниие хараад һүрдэхэ,
Гааза болон Экрооной зон айн шэшэрэлдэхэ,
тэдэнэй найдалынь таһарха.
Гаазада хааниинь һүнэхэ, Ашхэлоондо хүнүүд байхаяа болихо.
6Ашдоодто эсэгэеэ мэдэхэгүй эрлиизүүд хариһаа ерэжэ һуурижаха.
Пилиштүүдэй бардамые усадхахаб.
7Тэдэ шуһатай мяха болон бузартай бусад хоол эдихэеэ болихо.
Амиды үлэһэн пилиштүүд Минии арадай хуби,
Иудын нэгэ үе залгалаа болохо.
Экрооной зон евүүсүүд шэнги Минии арад түмэнэй хуби болохо.
8Орон соогуур сэрэг зон һүндэлхэеэ болихо,
ямаршье дарлагшад дээгүүрнь ябахагүй.
Би энээниие алдангүй хаража байхаб, үргөөгөө Өөрөө хамгаалхаб.
9Сионой басаган, баярлыш!
Иерусалим үхин, илалтын баяр тэмдэглыш!
Харыш, номгон даруу шинии хаан эмэ элжэгэ зайдаланхай,
тэрэнэй унага – даагыень зайдаланхай, шамда заларжа ерэнэ.
10Энэ хаан тунхаглана: «Эпрааимай дайшалхы тэргэнүүдые бута сохихоб,
Иерусалимда моритониие таһа татахаб. Дайнай һурша номо усадхагдаха».
Энэ хаан энхэ тайбаниие тунхаглажа, Тэрэнэй эзэрхэл
далайһаа далай хүрэтэр, Евфрадай заха хүрэтэр оршохо.
Сүлэлгэһөө мултаралга
11Би шинии арадые уһагүй нүхэнһөө сүлөөлнэб,
юундэб гэхэдэ, манай хэрээ хэлсээн шуһаар баталагдаа.
12Шорондо һуугшад, гэртээ ябагты!
Найдаха найдабари танда бии, Би таанадта бусанам.
13Иудые Би Өөрын номо болгон татажа, Эпрааимые һурша болгохоб.
Сионой хүбүүдые илдэ болгон далайжа,
грек угсаатанда эсэргүү бодхооноб.
14Эзэн тэдэнэй дээрэ үзэгдэн, Тэрэнэй сахилгаан һомон шэнги харбаха.
Эзэн бүреэгээ үлеэжэ, хүсэтэ шуурган шэнги дабшаха.
15Түмэн Сэрэгтэ Эзэн тэдэниие хамгаална.
Сэрэгшэд шулуу шэдэжэ, дайсанаа унагаана.
Тахилай тогооной үзэмэй дараһан архяар дүүрэһэн мэтэ шуһан урдаха.
16Тэдэ үдэрнүүдтэ малшанай һүрэгөө аршалһандал Эзэн арад түмэнөө абарха.
Титимэй эрдэни шулуун мэтэ тэдэ Эзэнэй нютагта ялалзаха.
17Үршөөл хайрань ямар ехэб даа.
Үрэжэлтэ таряан долгисохо, шэнэ үзэмэй сэсэрлиг салгидаха, хүбүүд басагад баясан хүгжэхэ!
Currently Selected:
Захарияа 9: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
