Захарияа 10
10
Иудын ба Израилиин сүлөөрэл
1Хабартаа Эзэнһээ бороо гуйгты.
Эзэнэй хайраар аадарай үүлэн бии боложо, бороо орохо.
Хүн бүхэнэй таряалан дээрэ таряан ургаха.
2Онгонууд ерээдүй саг тушаа таамаглана.
Мэдэлшэбди гэдэгүүд худал үзэгдэл хаража, хуурмаг зүүдэ үзэнэ.
Тэрэнь ямаршье ашагүй.
Тиимэһээ хүнүүд хонин мэтэ төөрин, туһа эрин хашхаралдана.
Теэд тэдэниие дахуулха хонишон байхагүй.
3Эзэн иигэжэ айладана:
«Эдэ хонин һүрэг адуулаашадта аргагүй сухални хүрөөд байна.
Минии һүрэгэй түлөө харюусалга тэдээндэ даалгаа бэлэйб».
Түмэн Сэрэгтэ Эзэн Иудын уг удамда Өөрын һүрэгтэ хандаһан шэнги һанаагаа зобожо,
тэдэниие тулалдаанда ороһон һүрөөтэ морин шэнги болгоно.
4Углуугай шулуун, майханай гадаһан, тулалдаанай номо, сэрэг зонхилогшод –
бултадаа эдэ Иудын оронһоо ерэхэ юм.
5Тэдэ гудамжын тооһондо дайсанаа дэбһэн гэшхэхэ шадалтай.
Байлдаанда ороходоо, морито сэрэгые бута сохихо,
юуб гэхэдэ, Эзэн тэдээнтэй суг хамта оролсохо.
6«Би Иудын удамда тэнхээ оруулжа, Иосифой үри һадаһанда дайсанаа илаха шадалтай болгохоб.
Би тэдэниие хайрлаһан ушарһаа гэртэнь бусаахаб.
Би тэдэниие голон орхёогүй мэтэ байхаб. Юуб гэхэдэ би тэдэнэй Эзэн Бурхан болоноб».
7Эпрааим хүсэрхэг эрэ боложо, үзэмэй дараһан архи ууһан мэтэ баясаха.
Хүүгэдынь энээниие харахадаа хүхижэ, тэдэнэй зүрхэ сэдьхэлые Эзэн баярлан хөөрүүлхэ.
8«Би тэдээндэ дохёо үгэжэ, нэгэ газарта суглуулхаб,
юундэб гэхэдэ, тэдэниие түлөөһөөр бусаагааб.
Тэдэ урданайхи шэнги тоо томшогүй олон болохо.
9Тэдэниие Би холын оронуудта тараагаашье һаам,
тэндэ Намайе ходо һанажа байхал.
Тэдэ хамта тэндэ амидарһан хүүгэдтэеэ гэртээ бусажа ерэхэ.
10Би тэдэниие Египедһээ болон Ассириин газарһаа бусаан асаржа,
Галаадай газарта, хүршэ Ливаан орондо түбхинүүлхэб.
Тэндэшье газарынь багадажа болохо».
11Бурханай тэдэниие Египедһээ гаргаһан сагтал адли,
үндэр уһан хана урдань хажуу тээшээ эбхэрэн зайлажа,
зоболонгой далай гаталһан сагай үедэ шэнги
Ассириин бардамыень номгоруулан, Египедэй шадал хүсэ буурааха.
12Эзэн Өөрын арад түмэниие һэргээн, тэдэ Тэрэнэй нэрэ доро ажаһууха болоно.
Эзэн тиигэжэ айладхана.
Currently Selected:
Захарияа 10: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
