Захарияа 8
8
Иерусалим хото абаралгын хараа бодомжо
1Түмэн Сэрэгтэ Эзэн намда дахяад айладхаба.
2Түмэн Сэрэгтэ Эзэн иигэжэ айладал буулгаа:
«Би Сионой түлөө ехэ уурлажа байнам,
асари ехэ уур хилэнсэмни хүдэлөөд байна».
3Түмэн Сэрэгтэ Эзэн иигэжэ айладана:
«Би Сион руу эрьежэ, Иерусалимай дунда оршохом.
Тиигээд Иерусалимые Үнэнэй Хото гээд нэрлэхэ,
Түмэн Сэрэгтэ Эзэнэй хадые Нангин хада уула гэжэ дуудадаг болохо».
4Түмэн Сэрэгтэ Эзэн иигэжэ айладана:
Үбгэд хүгшэд Иерусалимай гудамжаар ажаһуудаг болохо.
Зон ута наһа наһалжа, тулгуур дулды тэдээндэ хэрэгтэй болохо.
5Хотын гудамжада наадажа байһан үхи хүүгэд олон болохо.
6Арад түмэнһөө үлэһэн хүнүүдэй нюдэндэ эдэ үдэрнүүд ехэ гайхал түрүүлээ хадаа
Минии мэлмыдэ баһал гайхалтай гээшэ гү?
гэжэ Түмэн Сэрэгтэ Эзэн айладажа байна.
7Түмэн Сэрэгтэ Эзэн иигэжэ айладана:
«Харагты, Би Өөрын арад түмэниие наранай мандаха газарһаа ба
наранай шэнгэхэ газарһаа абарха гэжэ байнаб.
8Би тэдэниие һөөргэнь асаржа, Иерусалимда байрлуулхаб.
Тэдэ Минии арад түмэн боложо, Би үнэн сэхэ Бурханиинь болохоб».
9Түмэн Сэрэгтэ Эзэн иигэжэ айладана:
«Түмэн Сэрэгтэ Эзэнэй үргөөгэй һууриин табигдаһан үдэрһөө хойшо
лүндэншэдэй аманһаа тунхаглагдаһан эдэ үгэнүүдые
эдэ үдэрнүүдтэ шагнажа байһан таанар
Һүмын баригдажа дууһатар хүсэ шадалтай байгты.
10Энээнһээ урагша ажал хэдэг хүндэ, хүлһэлжэ абаһан малай түлөө
ямаршье түлөөһэн гэжэ байгаагүй.
Ороһон гараһан хүндэ амаргүй, дайсантай һэн хойно амгалан бэшэ байгаа.
Би бүхы хүнүүдые хоорондонь нэгэ нэгэндэнь эсэргүү табиһан байгааб.
11Харин мүнөө Би эдэ үлэгшэ хүнүүдтэ урдынхиһаа ондоогоор хандахаб»
гэжэ Түмэн Сэрэгтэ Эзэн айладана.
12«Үрэ таряан амархан ургана.
Уһан үзэм жэмэслэжэ, газар үрэ ургамалаа дэлгээжэ,
тэнгэри уһа шүүдэрээ буулгаха.
Энэ бүхы зүйлые үлэһэн зондо эблүүлжэ үгэнэб.
13Арадуудай дунда Иудын удам, Израилиин уг удам хараал боложо байһые
Би үреэл болгожо, таанарые абархаб.
Бү айгты, шандааһаяа шангадхан хүсэ шадалаа элсүүлэгты».
14Түмэн Сэрэгтэ Эзэн айладана: «Таанарай үбгэ эсэгэнэрэй Минии сухал хүргэхэ үедэ
Би тэдэниие һүнөөхэ гэжэ һанаа һэмби.
15Харин мүнөө Иерусалимда, Иудын уг удамда һайн хэрэг үйлэдэхэ гэжэ
эдэ үдэрнүүдтэ шиидээб. Ушар тиимэһээ бү айгты.
16Таанарай хэхэ юумэн иимэ. Нэгэ нэгэндээ үнэниие хэлэгты.
Үнэн сэхээр хэрэг шүүгты. Шүүлгэтнай амар амгалангай түлөө байгуужаг.
17Хаяа хадхажа һуудаг хүршэнэрэй урдаһаа
хорото мууе бү һанаашалагты. Худал тангариг бү үгэгты.
Иимэшүү юумэ Би үзэн ядадагби». Иигэжэ Түмэн Сэрэгтэ Эзэн айладаа.
18Түмэн Сэрэгтэ Эзэнэй намда айладаһаниинь иимэ.
19Түмэн Сэрэгтэ Эзэн иигэжэ айладажа байна:
Дүрбэдэхи, табадахи, долоодохи, арбадахи һарануудта
гашуудалай масагай үдэрнүүд таанарта бии.
Гашуудалай эдэ үдэрнүүд Иудын уг удамда баяр баясхалантай,
хүхюутэй һайхан һайндэрнүүд болог.
Гансал үнэниие, амар амгалангые хайрлагты.
20Түмэн Сэрэгтэ Эзэн иигэжэ айладажа байна:
Арад түмэн, олон хотонуудһаа зон Иерусалимда ерэхэ.
21Элдэб хотонуудай зон бэе бэетэеэ уулзажа:
«Эзэнэй талархал гуйжа, Түмэн Сэрэгтэ Эзэниие бэдэржэ хамта ябая» гэхэдэнь,
Би тантай баһа ябахам гэлдэхэ зон олдохо.
22Олон тоото арад үндэһэтэд Иерусалимда Түмэн Сэрэгтэ Эзэниие бэдэрхэеэ ерэхэл.
Тэдэ Эзэндэ һүгэдэн мүргэхэеэ ерэхэ.
23Түмэн Сэрэгтэ Эзэн айладана:
Тэдэ үдэрнүүдтэ ондоо хэлэн дээрэ дуугардаг арбан зон
нэгэ иудей хүндэ ерэжэ, хубсаһанһаань татан хэлэхэ:
«Бурхан тантай гэжэ дуулаабди. Бидэниие өөһэдтөө абыт».
Currently Selected:
Захарияа 8: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
