Захарияа 2
2
Гурбадахи үзэгдэл: Газар хэмжэлгэ
1Дахяад толгойгоо үргэжэ харахадам, гартаа хэмжүүрэй ооһор бариһан хүн ябаба.
2– Хайшаа зорибош? – гэжэ асуухадам.
– Иерусалим хотые хэмжэжэ, ута үргэнииень мэдэжэ абахам – гэбэ. 3Намтай хөөрэлдэһэн Эльгээмэлэй ябахадань, нүгөөдэ Эльгээмэл урдаһаань ерэбэ. 4Тэрэ иигэжэ хэлэбэ:
– Түргэн ошожо тэрэ залууда хэлэл даа:
Иерусалимда зон малынь олошорһон ушарһаа
оршон тойронхи газараар таран һууха,
хана хэрэмгүй һуурин мэтэ болохо.
5Эзэн айладажа байна:
«Тэрэ хотые хүреэлһэн галта хана болохоб,
тэрэнэй дунда алдар соломни дэлгэрхэ» гээ.
6«Һүүе! Һүүе! Хойто зүгэй оронһоо бодон тэрьелэгты!
Ушарынь хадаа Би таанарые
тэнгэриин дүрбэн һалхин мэтэ
сасан тарааһан байгааб» гээ.
7«Һэй, Сион, Вавилооной үхинтэй
хамта байрлаһан таанар тэндэһээ зайлагты» гээ.
8«Таанадые дээрмэдэһэн арадуудта
Тэрэ намайе алдар солын тулада эльгээгээ,
танай ойро хүрэбэл, Тэрэнэй нюдэнэй сэсэгыдэ хүрэһэнтэй адли» гээ.
9Түмэн Сэрэгтэ Эзэн айладана:
«Мутараа тэдээндэ далайхадам,
богоолнуудайнгаа олзо болохол даа».
Тиихэдэнь намайе Түмэн Сэрэгтэ Эзэн эльгээгээ гэжэ таанад мэдэхэт.
Иерусалим хото руу бусаха тухай уряал
10Сионой үхин, баярлан дуулыш:
Дундатнай оршохом гэжэ Эзэн айладанал.
11Тэрэ үдэр Эзэн руу олон арадууд ерэхэ, тэдэ Эзэнэй арад болохо; дундатнай Эзэн ерэжэ ажаһууха, тиихэдэм Түмэн Сэрэгтэ Эзэн намайе эльгээгээ гэжэ мэдэхэт. 12Тиигэжэ Эзэн Иерусалимые Өөрын онсо хото болгохо. Тиигэжэ нангин газарта Эзэн Иудын орон нютагые Өөрымни хуби гээд эзэмшэхэ.
13Эзэнэй урда хамаг амитан анираа хатаг!
Өөрын нангин үргөөһөө тэрэ гаража байна.
Currently Selected:
Захарияа 2: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
