Захарияа 1

Оршол

1Даариин Персиин хаан боложо үргэмжэлэгдэһөөр хоёрдохи жэлэй наймадахи һарада Иддоогой аша Бэрэхияагай хүбүүн, лүндэншэн Захарияада Эзэн үгэ айладхаба:

2– Танай үбгэ эсэгэнэртэ Би, Эзэн, ехэтэ хилэнлэһэн гээшэб. 3Гэбэшье тэдэндээ хэлэлши:

Түмэн Сэрэгтэ Эзэн

иигэжэ айладажа байна:

Нам руу эрьегты,

тиигэбэл Би таанар руу эрьехэб.

4«Нүгэлтэ харгыһаа, хилэнсэгтэ үйлэ хэрэгүүдһээ зайлагты», – гэжэ урданай лүндэншэд таанарай үбгэ эсэгэнэртэ хэлэдэг байгаашье һаань, тэдэ Намайе дуулаагүй, үгыем анхараагүй. Тиимэрхүү үбгэ эсэгэнэртээ адляар бү байгты гэжэ Түмэн Сэрэгтэ Эзэн айладажа байна.

5– Танай эсэгэнэр хаанаб мүнөө? Лүндэншэдшье хэтэдэ һууха аал? 6Минии богоол болохо лүндэншэдтэ һургаал болгон дамжуулһан Минии үгэнүүд, Минии гаргаһан шиидхэбэринүүд танай эсэгэ элинсэгүүдтэ бэелээгүй гэжэ байгаа гү? Тэдэ хэлэгшэ бэлэй: «Ябаһан харгыемнай, хэһэн хэрэгыемнай Эзэн яажа сэгнээ һэм, тиимээр лэ үйлэ бүтээгээ», – гэжэ Түмэн Сэрэгтэ Эзэн тунхаглаба гэбэ.

Нэгэдэхи үзэгдэл: Моритой хүнүүд

7Даариин хаан боложо үргэмжэлэгдэһөөр хоёрдохи жэлэй шэбаат һарын#1:7 Хоёрдохи жэлэй шэбаат һарын – манай эрын урдахи 519 оной февраль һара. хорин дүрбэнэй үдэртэ Иддоогой аша, Бэрэхияагай хүбүүн лүндэншэ Захарияада Эзэнэй үгэ бууба:

8– Энэ һүни үзэгдэл харабаб: миртын һөөгүүдэй дунда хонхосог соо зээрдэ мори унаһан хүн зогсоно, ара тээнь зээрдэ, алаг, сагаан морид байна. 9«Эдэ юун морид гээшэб?» гэжэ би асуубаб. Намтай хөөрэлдэжэ байһан Эльгээмэл: «Эдэнэй юу хэжэ байһые би шамда харуулхаб» – гэбэ. 10Мирт мододой дунда зогсоошо нэгэн: «Дэлхэй эрьеэд ерэхыень Эзэнэй эльгээгшэд мүн» гэбэ. 11Миртын хажууда зогсоһон Эзэнэй Эльгээмэлдэ тэдэ харюу үгэбэ: «Газар дэлхэйе тойрожо ерээбди. Бүхы амитан зон ан бун, ажана тэгшэ һууна».

12Удаань Эзэнэй Эльгээмэл хэлэбэ: «Түмэн Сэрэгтэ Эзэн! Хэзээ болотор Иерусалимда, Иудын хотонуудта үршөөл хайраяа хүртөөнгүй байха юмта, аяар далан жэл соо тэдээндэ уурланалта». 13Гэхэдэнь намтай ярилдажа байһан Эльгээмэлдэ Эзэн һанааень заһан, урихан үгэнүүдые айладаба. 14Намтай хөөрэлдэжэ байһан тэнгэриин мүнөөхи Эльгээмэл намда хандан үгүүлбэ:

– Иигэжэ зарлагты:

Түмэн Сэрэгтэ Эзэн иигэжэ айладажа байна:

Би Иерусалим болон Сионой түлөө һанаан болоод байнам.

15Амар тайбан һууһан арадуудта Би маша ехээр уурлажа байнаб.

Сухалаа номгоруулхадам, тэдэнэй хоро шараниинь бусална.

16Иерусалим тээшэ эрьежэ хайраяа хүртөөнэм,

тэрэ хото соо Минии үргөө бодохо.

Түмэн Сэрэгтэ Эзэнэй зарлигаар Иерусалим дээгүүр газар хэмжэлгын зурлаа татагдаха.

17Үшөө иигэжэ зарлаарай:

Түмэн Сэрэгтэ Эзэн иигэжэ айладаа:

Минии хотонууд хүгжэн һалбарха.

Эзэн Сиониие дахяад тайбшаруулжа,

Иерусалимые дахин шэлэхэ.

Хоёрдохи үзэгдэл: Эбэрнүүд болон дархашуул

18Толгойгоо дээшэнь үргэхэдэм, дүрбэн эбэр харагдаба. 19Намтай хөөрэлдэһэн Эльгээмэлдэ хандан асуубаб:

– Энэ юун бэ?

Тэрэ харюусаба:

– Иуда, Израиль болон Иерусалимые һандарган тарааһан эбэрнүүд гээшэ.

20Удаань Эзэн намда дүрбэн дархашуулые үзүүлбэ. 21Би асуубаб:

– Эдэ юу хэхэеэ ерээб?

Тэрэ иигэжэ ойлгуулба:

– Эдэ эбэрнүүд Иудын орон нютагые һандарган тараагаа, хэншье тархияа үргэхэ шадалгүй болонхой, харин дархашуул Иудын урдаһаа бодожо, сүйд татаһан үндэһэтэдэй эбэрынь хуха сохижо, һүр һүлдынь дараха гэжэ ябана.

Currently Selected:

Захарияа 1: BurBBL2024

Highlight

Copy

Compare