Захарияа 11
11
1Ливаан, хаалгаяа нээ. Хуша модыеш гал үрэбхиг.
2Агар зандан уйлаха, юуб гэхэдэ хуша модон хосороо.
Башаанай сарса модон уйлаха, үдхэн ой усадхагдаа.
3Тунга ногоон бэлшээри халсаржа, малшадай уйлаха дуулдана.
Иорданай һүр жабхалан һүйдхэгдэжэ, залуу арсалангуудай хэрхирхэнь соностоно.
Һайн һанаата хонишон
4Эзэн Бурхамни иигэжэ айладхана:
– Нядалагдаха үйлэ руунь һүрэг малаа харюулагты. 5Адуулагшадынь эзэд ба мүнгэ олзо намнаашадта адли. Эзэдынь малаа алажархёод, хэһээлтэгүй үлэнэ. Хони худалдагшадынь «Эзэндэ магтаал соло дуудая! Би баяжааб» гэлсэнэ. 6Би тэндэ һуудаг зониие энэрхэгүйб гэжэ Эзэн тунхаглаад, «Би хүн бүхэниие хүршынь гарта, хаанай дарлалтада унагаанаб. Тэдэнэй орон газараа һандаргаажа байхадань абархагүйб» гэнэ.
7Нядалхаар илгагдаһан, хариин наймаашадта хабаатай хонин һүрэг Би харюулдаг болобоб. Өөртөө хоёр дулды абабаб. Нэгыень Үршөөл гэжэ дуудаад, нүгөөдыень Нэгэдэлгэ гэжэ нэрлэбэб. 8Би нэгэ һарын туршада гурбан хонишодые үлдэбэб. Ушарынь хадаа тэдэниие тэсэжэ байха Минии тэсэбэри дууһаа бэлэй, тэдэшье үзэн ядадаг болобо. 9Би хэлэбэб: «Таанадые бэшэ адуулхагүйб. Үхэхэтнай үхүүжэг, хюдуулхатнай хюдуулуужаг, үлэгшэдынь бэе бэеынгээ мяха эдюужэг».
10Удаань Би бүхы арадуудтай баталһан Өөрын хэлсээ һалгабаб гэжэ харуулхын тулада Үршөөл гэжэ дулдыгаа хухалбаб. 11Иигэжэ Эзэнэй арадуудтай баталһан Хэрээ хүсөө алдаба. Намайе хаража байһан хонин һүрэг энэ хадаа Эзэнһээ бууһан үйлэ гэжэ ойлгоо.
12Би тэдээндэ хэлэбэб: «Таанар зохихо гэжэ һанаа һаа, Намда хүлһэ түлэгты. Хэрэггүй гэжэ һанаа һаатнай, хэрэггүй юм ааб даа».
Тиихэдэм гушан хэсэг сагаан мүнгэ түлэбэ. 13Эзэн иигэжэ айладаба:
– Намайе үнэлэн сэгнэһэн гайхамшагта түлбэрииень Һүмын мүнгэ хадагалдаг һаба руу хая.
Би гушан хэсэг мүнгэн шээкэл абажа, Эзэнэй үргөө дотор түмэршэндэ шэдэбэб. 14Удаань би Иуда болон Израилиин хоорондо аха дүүгэй харилсаан һалаба гэжэ харуулхын тула Нэгэдэл гэжэ дулдые хоёр болгожо хухалбаб.
15Эзэн намда айладаба:
– Тэнэг хонишоной хэрэгсэлые өөртөө дахин аба. 16Юуб гэхэдэ, энэ газарта би ондоо хонишониие табихамни. Тэрэ хадаа
үхэжэ байһан хонин тухай һанаа зобохогүй,
үгы болоһониие бэдэрхэгүй, үбшэнтэниие эмшэлхэгүй,
элүүртэниие эдеэлүүлхэгүй һэн тула
тарган хониной мяха эдижэ, гансал турууень үлөөхэ.
17Һүрэгөө орхиһон адуулагша хараалда хүртүүжэг.
Тэрэнэй гар болон баруун нюдэн дээрэнь эритэ илдэ буулгагты.
Гарынь бүхэлеэрээ хатажа, баруун нюдэниинь огто харахаяа болюужаг!
Currently Selected:
Захарияа 11: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
