Захарияа 12
12
Иерусалимай һэргэлгэ
1Үзэл: Израиль тухай Эзэнэй үгэ. Тэнгэри дэлгэжэ, дэлхэйн һуури табиһан, хүнэй һүнэһэ һүлдэ доторынь бии болгоһон Эзэн тунхаглажа байна: 2«Үзэгты, Би Иерусалимые тойронхи арад түмэнэйнь хоротой аяга болгохоб. Иерусалимые бүһэлэн дайлаха сагта энэнь Иудада эсэргүү байха болоно. 3Тэрэ үдэр Би Иерусалимые шулуун шэнги бэхи бүхэ болгохоб. Тэрэниие дайлан абаха гэһэн хүнүүд хуу бэртэхэ. Дэлхэйн бүхы үндэһэтэн Иерусалимда эсэргүүсэн сугларха.
4Тэрэ үдэр Би хүлэг моридыень, морин сэрэгыень галзуу үбшөөр сохихоб.
Бүхы арадуудай моридые нюдэ һохор болгохоб, харин Минии нюдэн нээлтэтэй байха.
Би Иудын уг удамые харгалзан хаража байхаб», – гэжэ Эзэн айладана.
5Иудын ахамад тэргүүтэн зоной сэдьхэлдэ дали ургуулха. Иерусалимда оршон һуугшад «Эзэн танай хүсэтэ Бурхан, Түмэн Сэрэгтэ Эзэн бидэндэ хүсэтэ туһа болоо» гэлдэхэ. 6Тэрэ үдэр Би Иудын тэргүүтэниие зэргэлһэн модон соохи галта түүдэг мэтэ болгохоб, тэдэ тойроһон арадуудые таряанай хуурай һолоомо галдаһан шэнги шатааха. Тэдэ баруун зүүн талын арадуудые илажа, Иерусалимда оршон һуугшад амгалан амилха. 7Давидай удамай алдар, Иерусалимда һуугшадай суу алдар Иудаһаа үлүү байхагүйн тулада Эзэн түрүүн Иудын майхануудые абарха.
8Тэрэ үдэр Эзэн Иерусалимда оршон һуугшадые хамгаална. Тэдэнэй дорой нэгэниинь Давид мэтэ боложо, Давидай гэр Бурхан мэтэ, тэдэнэй үмэнэ Эзэнэй тэнгэриин Эльгээмэл мэтэ байха болоно. 9Тэрэ үдэр Би Иерусалимда эсэргүү ерэһэн бүхы арад үндэһэтэниие усадхахаб.
10Давидай гэр, Иерусалимай зон сэдьхэл даруу номгон болохо, гэмээ наманшалан, нигүүлсэлтэ бодолоор хамаг зондо хандаха гэжэ оролдохо. Өөһэдөө жадаараа сүм хадхаһан хүнөө, Намайе тэдэ хараха, ууган хүбүүнэйнгөө түлөө гашуудажа байһан мэтэ гашуудаха. 11Тэрэ үдэр Иерусалимда асари ехэ гашуудал Мэгиддооной талада Һадаад-Риммоон тухай арад зоной уйлаһан мэтэ болохо. 12Орон нютаг бүхыдөө, уг угаараа шаналан гашуудаха:
Давидай ураг садан амяараа, һамгадтаяа хамта;
Натаанай ураг садан амяараа, һамгадтаяа хамта;
13Левиин ураг түрэл гэрээрээ, һамгадтаяа хамта;
Шимэйн ураг түрэл амяараа, һамгадтаяа хамта;
14үлэһэн бүхы угууд амяараа, һамгадтаяа хамта.
Currently Selected:
Захарияа 12: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
