Матвей 27
27
(Мк 15:1; Лк 23:1; Ин 18:28)
1Үүр сайха үеэр хамаг түрүү санаартан, улад зоной ахамадууд сугларжа, Иисүүсые үхэлэй саазада хүртөөхэ гэжэ зүбшэн шиидэбэ. 2Иисүүсые тэдэ гэнжээр хүлеэд, Пиладта#27:2 Понтий Пилат – Иудейн можодо дүүрэн эрхэтэй Римэй захирагша (26–36 онууд). абаашажа тушааба.
Иудын хосоролго
3Иисүүстэ урбаһан Иуда Иисүүсые үхэлэй саазада хүртөөхэнь гэжэ дуулахадаа, буруу хэрэг үйлэдэһэнөө мэдэрэн гэмшэжэ, түрүү санаартанда, улад зоной ахамадуудта гушан сагаан мүнгыень бусаажа асараад:
4– Гэм зэмэгүй хүниие барижа үхэлэй саазада хүртүүлхэдээ би нүгэл үйлэдэбэб, – гэбэ.
Нүгөөдүүлынь:
– Тэрэшни манда ямар хамаатай юм? Шиниил хэрэг ха юм, – гэжэ харюусаа һэн.
5Иуда асарһан мүнгэеэ Һүмэ соо хаяад, газаашаа гаража, боожо үхэбэ. 6Түрүү санаартан хаяһан мүнгыень суглуулаад:
– Энэ мүнгые хүнэй ами хороохо зорилготойгоор түлөө, тиимэһээ энээниие Һүмын һанда табиха хэрэггүй, – гэжэ хэлсэбэ. 7Тиигэжэ зүбшэлдэһэн хойноо тэдэнэр мүнгөөрнь шабар амһарта хэдэг нэгэ хүнһөө газар худалдажа абахаар болобо. Тэрэ газар дээрэнь нүгшэһэн хариин зониие хүдөөлүүлжэ байха гэжэ шиидээ бэлэй. 8Тиимэһээ тэрэ газарые хүнүүд мүнөө хүрэтэр «Шуһан талмай» гэжэ нэрлэдэг.
9Тиигэжэ Ерэмияа лүндэншын иигэжэ хэлэһэниинь бүтөө: «Израилиин зоной Тэрэнэй түлөө түлэһэн гушан хэсэг сагаан мүнгэ абаад, 10тэрээгээрнь шабар амһарта хэдэг нэгэ хүнһөө газар худалдажа абаа. Тиигэжэ Эзэн намда захираа».
Пилат Иисүүсые мүшхэнэ
11Иисүүсые Римэй засаглагша Пиладай урда асаржа байлгаба. Тэрэ захирагша Иисүүсһээ:
– Ши еврейнүүдэй хаан гүш? – гэжэ һураба.
– Ши тиигэжэ хэлэнэш, – гэжэ Иисүүс харюусаба. 12Теэд түрүү санаартанай, ахамадуудай Иисүүсые зэмэлхэдэнь, Тэрэ харюу үгэбэгүй.
13Тиихэдэнь Пилат:
– Шамайе иимэ олон хэрэгүүдтэ гэмнэжэ байһые Ши дууланагүй гүш? – гэбэ. 14Теэд Иисүүс харюудань юушье хэлэбэгүй, тиихэдэнь Пилат аргагүй ехээр гайхаа һэн.
Иисүүсые үхэлэй саазада хүртөөбэ
15Паасхын һайндэрэй болоходо, захирагша улад зоной таби гэһэн хаалтада һуугшадай нэгыень сүлөөдэ табидаг заншалтай байгаа. 16Тэрэ сагта улад зондо һайн мэдээжэ Иисүүс Бараббаа гэдэг хүн түрмэдэ һуугаа. 17Тиин улад зоной суглархадань, Пилат тэдэнһээ:
– Таанар ямар хүниие сүлөөдэ табюулха дуратай байнабта: Иисүүс Бараббаае гү, али Бурханай табисуурта Христоос гэжэ алдаршаһан Иисүүсые гү? – гэжэ һураба. 18Иисүүстэ атаархажа байһан дээрэһээ еврейнүүдэй захирагшад Тэрээние барижа асараа гэжэ Пилат һайн мэдэжэ байгаа.
19Пиладай зарга шүүбэри хэдэг газарта һуухадань, тэрэнэй һамганиинь:
– Тэрэ ямаршье гэм зэмэгүй хүндэ муу юумэ бү хэ! Мүнөө һүни Тэрэниие зүүдэндээ харааб, тиин Тэрэнэй түлөө аргагүй һанаагаа зобооб, – гэһэн мэдээсэлтэйгээр хүниие ябуулба.
20Гэбэшье түрүү санаартан, ахамадууд Бараббаае сүлөөдэ табихыень, харин Иисүүсые үхэлэй саазада хүртөөхыень гуйгты гэжэ улад зониие идхаба. 21Пилат улад зонһоо:
– Эдэ хоёрой хэнииень танда табихабиб? – гэжэ дахин асууба.
– Бараббаае, – гэжэ зон харюусаба.
22Пилат тэдэнһээ:
– Бурханай табисуурта Христоос гэжэ алдаршаһан Иисүүсые би яаха болонобиб? – гэжэ һураба.
– Тэрээниие хэрээһэндэ хада! – гэжэ улад зон бүгэдэ харюусажа байгаа.
23– Ямар гэмтэй юумэ Тэрэ хээб? – гэжэ Пиладай һурахадань,
улад зон харюудань:
– Тэрээниие хэрээһэндэ хада! – гэжэ бүри шангаар гааралдан хашхарба. 24Юушье хэхэ аргагүй байһанаа хараад, теэдшье буһалгаан үймөөнэй үүсхэгдэхэ гэжэ байһые ойлгоходоо, Пилат уһа абаад, улад зоной урда гараа угаагаад:
– Энэ хүнэй үхэлдэ би ямаршье зэмэгүйб; энэ таанадай үйлэдэһэн хэрэг, – гэжэ хэлэбэ.
25– Тэрээнэй үхэлдэ бидэ, манай үри хүүгэд зэмэтэй байха, – гэжэ улад зон баран харюусаба.
26Тиихэдэнь Пилат тэдэндэ Бараббаае табиба, харин Иисүүсые сохёод, хэрээһэндэ хадахыень захирба.
Сэрэгшэд Иисүүсые шоолоно
27Тиихэдэнь Пиладай сэрэгшэд Иисүүсые ордоной хэрэмэй хорёодо абаашаба. Тэндэнь олон сэрэгшэд суглараад байгаа. 28Тэдэ Иисүүсэй хубсаһа тайлажа хаяад, Тэрээндэ улаан суба үмдэхүүлбэ, 29тиигээд үүргэнээр гүрлөө гүрэжэ, толгойдонь үмдэхүүлбэ, баруун гартань модон таяга барюулба. Тиин тэдэнэр Иисүүсэй урда үбдэглэн һуугаад:
– Еврейнүүдэй хаан мандаха болтогой! – гэхэ мэтээр Тэрээниие шооложо байгаа. 30Тиигээд Тэрээниие нёлбобо, таягынь абаад, тархи түрүүень сохибо. 31Тиигэжэ Иисүүсые ханатараа баһаад, удаань үнөөхи улаан субыень тайлажа хаяа. Тиигээд Өөрынь хубсаһа үмдэхүүлээд, хэрээһэндэ хадахаяа абаашаа һэн.
Иисүүсые хэрээһэндэ хадаба
32Замдаа тэдэ Хэрээн нютагай Симон гэдэг хүнтэй тааралдаад, Иисүүсэй хэрээһэ үргэлөөд ябахыень баалаба. 33Тэдэнэр «Хохимой» (еврей хэлээр «Голгофо») гэдэг газарта хүрэжэ ерээ. 34Тэндэ Иисүүстэ гашуун юумэнтэй холиһон үзэмэй дараһан архи уухыень үгэхэдэнь, Иисүүс тэрээнииень амсаад, уубагүй. 35Сэрэгшэд Иисүүсые хэрээһэндэ хадаад, жээрэб татажа, хубсаһыень дундаа хубаагаа һэн. 36Тиигээд тэндээ һуугаад, Иисүүсые харууһалжа байгаа. 37Иисүүсэй толгойн дээрэхэнэ тэдэ «Энэ еврейнүүдэй хаан Иисүүс» гэжэ хэрээһэндэ хадуулһан шалтагаанииень харуулһан модон хабтагай үлгэбэ. 38Тиихэдэ Иисүүстэй хамта хоёр дээрмэшэдые: нэгыень баруун таладань, нүгөөдыень зүүн тээнь хэрээһэндэ хадаба.
39Хажуугаарнь үнгэрһэн зон толгойгоо һэжэржэ, Иисүүсые шоглон:
40– Һүмые һандаргаад, гурбан үдэр соо бодхоохоб гээ бэлэйт! Хэрбээ Та Бурханай Хүбүүн юм һаа, Өөрыгөө абарыт! Хэрээһэнһээ буугыт, – гэжэ байба. 41Тон тиигэжэл түрүү санаартан, Хуули заадаг багшанар, ахамадууд, фарисейнүүд Иисүүсые шооложо:
42– Бусадые абардаг аад, харин Өөрыгөө абаржа шаданагүйл! Хэрбээ энэ Израилиин Хаан юм һаа, мүнөө хэрээһэнһээ бууг лэ! Тиигэбэлнь бидэ Тэрээндэ этигэхэбди. 43Тэрэ Бурханда найдадаг байгаа, Өөрыгөө Бурханай Хүбүүнби гэжэ нэрлээ. Зай, тиигэбэл, Бурханда хэрэгтэй юм һаань, Бурхан Тэрээниие абараг лэ! – гэлдэбэ.
44Мүн Иисүүстэй хамта хэрээһэндэ хадуулһан дээрмэшэдшье Тэрээниие шоглон баһажа байгаа.
Иисүүс амяа табиба
45Хахад үдэрһөө гурбан саг хүрэтэр бүхы газар дэлхэй шэб харанхыда хушагдаба. 46Гурбан сагай багта Иисүүс:
– Элии, Элии! Лема сабахтани? (Бурхамни, Бурхамни! Юундэ Намайе орхибот?) – гэжэ шангаар хашхарба.
47Тэндэ зогсожо байһан зарим зон хэлэһыень дуулаад:
– Тэрэ Элияае дуудана, – гэлсэбэ. 48Тэдэнэй нэгэниинь дары гүйжэ ошомсоороо, бамбагар юумэ абажа, дээрэнь уксус нэбтэртэрынь адхаад, тэрэнээ тулуурай үзүүртэ табяад, Иисүүстэ уухыень үгэбэ.
49Харин бусад зон:
– Байза, Элияа Тэрээниие абархаяа ерэгшэ аа гү, харая, – гэлдэбэ.
50Иисүүс дахин шангаар хашхараад, амяа табиба.
51Тиихэдэнь Һүмэдэ Хамагай Нангин газарта ороходо үлгөөтэй байһан хүшэгэ дээрэһээ доошоо шууража, хоёр боложо хахарба, газар хүдэлбэ, шулуунууд хамхарба, 52мүн агы нүхэн хуурсагууд нээгдэжэ, наһа бараһан хутагтанууд олоороо амидырба. 53Иисүүсэй амидырһан хойно тэдэнэр агы нүхэн хуурсагуудһаа гаража, нангин Иерусалим хото ороо, тэндэ тэдэниие олон хүн хараһан байгаа.
54Тиихэдэ зуунай дарга, мүн тэрээнтэй хамта Иисүүсые һахилсагша сэрэгшэд газарай хүдэлхые, мүн бусадшье болоһон үзэгдэлнүүдые хараад, ехэ айн һүрдэжэ:
– Тэрэ үнэхөөрөө Бурханай Хүбүүн байгаа, – гэлсэбэ.
55Галилейһээ Иисүүсые дахажа ерэһэн, Тэрээндэ туһалжа байһан олон эхэнэр баһа тээ холохоно зогсоод хаража байгаа. 56Тэдэнэй дунда Магдалай Мария, мүн Яков Ёшияа хоёрой эхэ Мария, баһа Зэбэдэйн хүбүүдэй эжынь байлсаа.
Иисүүсые хүдөөлүүлгэ
57Үдэшэ болоходо Иисүүсэй шабинь байһан Иосиф гэдэг баян хүн Аримафейһээ хүрэжэ ерээ. 58Тэрэ хүн Пиладта ерээд, Иисүүсэй шарилые үгэхыень гуйба. Тиихэдэнь Пилат Иисүүсэй шарилые Иосифто үгэхыень захираа һэн. 59Иосиф шарилыень абаад, сэбэр бүдөөр орёогоод, 60хабсагайда түнхинэжэ бэлдэһэн шэнэ агы нүхэн соо Тэрээниие хадагалба, агы нүхэнэй амһар томо шулуугаар хаагаад ябаба. 61Тэрэ сагта Магдалай Мария нүгөө Мариятай хамта агы нүхэн хуурсагайн тушаа һуугаа бэлэй.
62Хойто үдэрынь, субботодо түрүү санаартан, фарисейнүүд Пиладтай уулзажа:
63– Ноён аа! Тэрэ мэхэшэнэй үшөө амиды байхадаа: «Гурбан үдэрһөө амидырхаб», – гэжэ хэлэһые һанабабди. 64Тиимэһээ гурбан хоног үнгэртэр агы нүхыень һахиха захиралта үгыт. Тиигээгүй һаатнай, Тэрэнэй шабинар һүниндөө ошожо, бэеынь хулуужа магадгүй, харин улад зондо «Тэрэ амидыраа» гэжэ хэлэхэдээ болохо. Тиигэбэлнь, энэ һүүлшын мэхэ түрүүшынхиһээ аймшагтай байха, – гэбэд.
65– Харуулшадые абагты. Ошожо, өөһэдынгөө мэдэхээр һахижа харуулжа байгты, – гэжэ Пилат тэдэндэ хэлэбэ.
66Тиимэһээ тэдэ агы нүхэ таглаһан шулууе тамгалаад, хажуудань харуул табиба.
Currently Selected:
Матвей 27: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
