Матвей 28

(Мк 16:1-8; Лк 24:1-12; Ин 20:1-18)

1Субботын үнгэрһэн хойно, гарагай нэгэнэй үглөөгүүрнь үүр сайхын үеэр Магдалай Мария нүгөө Мариятай хамта Иисүүсэй хэбтэһэн агы нүхэн хуурсагые харахаяа ерээ һэн. 2Гэнтэ тэндэнь газар аймшагтайгаар хүдэлбэ, тиин Эзэнэй Эльгээмэл огторгойһоо бууба. Тэрэ агы нүхэ хааһан шулууе хажуу тээшэнь үмхирүүлээд, дээрэнь һууба. 3Тэрэнэй шэг шарайнь сахилгаандал мэтэ, хубсаһаниинь саһан шэнги сагаан байгаа. 4Харуулшад тэрээнһээ аргагүй ехээр айжа шэшэрэлдэн, үхэһэн хүнүүд шэнги болошобо.

5Бурханай Эльгээмэл эхэнэрнүүдтэ хандан: – Бү айгты. Таанар хэрээһэндэ хадуулһан Иисүүсые бэдэрнэт гэжэ би мэдэнэб. 6Тэрэтнай эндэ үгы! Өөрынгөө хэлээшээр Тэрэтнай амидыраа. Ороод, шарилайнь хэбтэһэн газарые харагты. 7Мүнөө түргэхэн ошожо, шабинартань Тэрэнэй амидырһан тухай хэлэгты. Тэрэ таанадһаа түрүүн Галилей ошохо, тэндэ Тэрэниие харахат гэжэ дуулгагты. Зай, би таанарта энээниие дуулгааб, – гэбэ.

8Тиимэһээ эхэнэрнүүд айһаншье, нүгөө талаһаа баярлаһаншье юумэд яаралтайгаар агы нүхэнһөө гаража, Тэрэнэй шабинартань энэ мэдээсэл дуулгахаяа гүйлдэбэ. 9Замдань гэнтэ тэдэнтэй Иисүүс тааралдажа: – Амар мэндэ, – гэжэ тэдэниие мэндэшэлбэ. Тиихэдэнь эхэнэрнүүд Иисүүстэ ойртоод, хүлһөөнь барижа, Тэрээндэ мүргэбэ. 10Тиихэдэнь Иисүүс: – Бү айгты. Аха дүүнэрни болохо шабинартам ошожо, Галилейдэ ерэхыень хэлэгты, тэдэ Намтай тэндэ уулзаха, – гэбэ.

Харуулшад болоһон ушар тухай хөөрэбэ

11Эхэнэрнүүдэй үшөө замдаа ябахадань, харуулшадай зариманиинь хото орожо, болоһон бүхы юумэнүүд тухай түрүү санаартанда дуулгаба. 12Түрүү санаартан ахамадуудтай уулзажа, зүблөө хээд, сэрэгшэдтэ ехэ мүнгэ үгэжэ: 13– Һүниндөө унтажа байхадамнай Иисүүсэй шабинар ерээд, шарилыень хулуугаа гэжэ хүнүүдтэ хэлэхэ ёһотойт. 14Хэрбээ засаглагшын энээн тухай юумэ дуулабал, бидэ тэрээнтэй уулзажа энэ хэрэг аргалхабди, тиимэһээ таанадта зобохо хэрэггүй, – гэбэ.

15Харуулшад мүнгэ абаад, түрүү санаартанай зааһан ёһоор бүхы юумэ хэбэ. Тиигэжэ тэдэнэй худал хөөрөөн мүнөө хүрэтэр еврейнүүдэй дунда дэлгэрэнхэй.

Агууехэ захяа айладалга

16Арбан нэгэн шабинарынь Иисүүсэй хэлэһэн ёһоор Галилей ошожо, тэндэ хада дээрэ гараа бэлэй. 17Тиигээд Иисүүсые харахадаа, Тэрээндэ дохин мүргэбэ, зүгөөр тэдэнэй зариманиинь бүрин этигэнгүй байгаа. 18Тиигээд Иисүүс тэдэндэ ойртоод:

– Тэнгэридэшье, газар дээрэшье бүрин эрхэ засаг Намда үгтэбэ! 19Зай, ошожо, бүхы арадуудта Минии һургаал айладхагты, Эсэгын, Хүбүүнэй, Арюун Һүлдын нэрээр тэдэниие уһаар арюудхагты. 20Таанарта Минии захиһан бүхы юумэнүүдые сахижа байхыень тэдэниие һургагты. Би таанадтай хамаг юумэнэй эсэс хүрэтэр хододоо хамта байхаб.

Currently Selected:

Матвей 28: BurBBL2024

Highlight

Copy

Compare