Матвей 26

(Мк 14:1-2; Лк 22:1-2; Ин 11:45-53)

1Иисүүс эдэ бүхы һургаалнуудаа номножо дүүргээд, Өөрынгөө шабинарта хандан:

2– Хоёр хоноод, Паасхын һайндэр болохо гэжэ мэдэнэт, тиихэдэ Хүн түрэлтэнэй Хүбүүниие хэрээһэндэ хадажа саазалха, – гэжэ хэлэбэ.

3Тэрэ сагта түрүү санаартан, Хуули заадаг багшанар, улад зоной ахамадууд Кайафа гэдэг ахамад санаартын ордондо сугларба. 4Тэдэ Иисүүсые мэхэдээ оруулжа бариха, тиигээд алаха тухай зүбшөө бэлэй. 5Теэд улад зоной дунда буһалгаанай үүсхэгдэхэгүйн тула һайндэртэ тиимэ юумэ хэхэгүй гэжэ хэлсээ һэн.

Бэтаанида Иисүүсые хангалтай ургамалай шүүһээр түрхинэ

6Иисүүсэй Бэтаанида һэлхэ үбшэндэ дайруулһан Симонэй гэртэ хоол барижа байхадань, 7нэгэ эхэнэр домбо соо ехэ үнэтэй һайхан хангалтай тоһо абажа ерээд, Иисүүсэй толгой дээрэнь адхаба. 8Иисүүсэй шабинар энээниие хараад, сухалаа хүрэжэ:

– Юундэ иимэ гарза гаргана гээшэб? – гэжэ дураа гутаба.

9– Энэ тоһыень ехэ үнэтэйгөөр худалдаад, мүнгыень үгытэйшүүлдэ хубаажа үгэхэ байгаабди, – гэлсэбэ тэдэ.

10Теэд Иисүүс шабинарайгаа хэлэжэ байһые мэдэжэ байгаад, тэдэндээ хандан:

– Энэ эхэнэрые юундэ түбэгшөөлгэбэт? Тэрэ намда ехэл һайн юумэ хэбэл. 11Үгытэй ядуушуул хододоо таанартай байхал, харин Би таанартай ходо байхагүйб. 12Энэ эхэнэр Нам дээрэ тоһо адхахадаа, бэеымни хүдөөлүүлгэдэ бэлдэбэ гээшэ. 13Һайн Мэдээсэлэй бүхы газар дэлхэйгээр хаа хаанагүй номногдоходо, энэ эхэнэрэй хэһэн хэрэг тухай хүнүүд дурсан һанажа байха, хэлэжэ байха гэжэ Би таанадта баталнаб, – гэбэ.

Иудын урбалга

14Тэрэ хирэдэ, арбан хоёр шабинарайнь нэгэн болохо Искариодой Иуда түрүү санаартанда ошоод:

15– Иисүүсые таанадта барижа үгэбэлни, таанар намда юу үгэхэбта? – гэжэ һураба. Тиихэдэнь түрүү санаартан Иудада гушан сагаан мүнгэ тоолоод үгэбэ. 16Иуда тэрэ сагһаа хойшо Иисүүсые барижа үгэхэ таарамжатай нүхэсэл харгалзадаг болоо.

Иисүүс шабинартаяа хамта Паасхын хоол барина

17Эһээгдээгүй хилээмэнэй һайндэрэй түрүүшын үдэртэ шабинарынь Иисүүстэ ерээд:

– Паасхын хоол Танда хаана бэлдэхыемнай Та хүсэхэ байнабта? – гэжэ һураба.

18– Тиимэ нэгэ хүндэ хото ошоод: «Минии саг ойртобо, Би шабинартаяа хамта Паасхын хоол гэртэшни барихамни гэжэ багшамнай хэлэнэ», – гээд хэлээрэйгты, – гэжэ Иисүүс шабинартаа захиба.

19Шабинарынь Иисүүсэй хэлэһэн ёһоор боложо, Паасхын хоол бэлдэбэ.

20Үдэшэ болоходо, Иисүүс арбан хоёр шабинартаяа хамта хоол барихаяа һууба. 21Эдеэлжэ байха үедөө Иисүүс:

– Таанарай нэгэнтнай Намайе барижа үгэхэнь, Би баталан хэлэнэб, – гэбэ.

22Тиихэдэнь шабинарынь ехэл уйдажа, хойно хойноһоон багшаһаа:

– Эзэн, би бэшэ аабзаб? – гэжэ һураба.

23– Намтай хамта энэ табаг соо хилээмэеэ дүрэһэн хүн Намайе барижа үгэхэ, – гэжэ Иисүүс тэдээндэ харюусаба. 24– Хүн түрэлхитэнэй Хүбүүн Нангин Бэшэг соо хэлэгдэһэнэй ёһоор үхэхэ. Харин Тэрээниие барижа үгэһэн хүн аймшагтай гай зоболон амсаха: тэрэ хүнэй юрэдөө түрөөгүй һаань, өөртэнь һураггүй дээрэ байха һэн.

25Мүн Иисүүсые барижа үгэхэеэ байһан Иудашье:

– Рабби, би бэшэ аабзаб? – гэжэ һураба. Иисүүс тэрээндэ:

– Ши өөрөө тиигэжэ хэлэбэш, – гэжэ харюусаба.

Эзэнэй үдэшын хоол

26Хоол бариха үедөө Иисүүс гартаа хилээмэ абаад, Бурханда баяр баясхалан хүргөөд, тэрэнээ хухалаад, шабинартаа хубаажа үгэхэ зуураа:

– Энээниие абаад эдигты – энэ Минии бэе гээшэ, – гэбэ.

27Тиигээд аяга абаад, Бурханда баяр баясхалан хүргөөд, шабинартаа үгэбэ.

– Эндэһээ таанад булта уугты. 28Энэ болбол олон хүнүүдэй нүгэл шэбэлнүүдые хүлисүүлхын тулада адхарха Минии шуһан гээшэ, тиин энэ шуһаар Бурхан хүнүүдтэй Шэнэ Хэлсээ батална. 29Энээнһээ хойшо Минии Эсэгын хаан орондо таанартай хамта шэнэ#26:29 Энэ үгые «дахин» гэһэн удхатайгаар тайлбарилжа болохо юм. үзэмэй дараһан архи амсаха үдэрэй болотор Би үзэмэй архи уухагүйб гэжэ таанарта хэлэхэб, – гэбэ. 30Тиигээд тэдэнэр магтаал дуу дуулаһаар Элеон хада дээрэ гараба.

Иисүүс Пётрой арсаха тухай хэлэнэ

31Тэрэ үедэ Иисүүс шабинартаа:

– Энэл һүниндөө таанар бултадаа Намһаа арсажа холодохот, ушарынь гэбэл:

«Хонишонииень дайража һалгаахадамни,

һүрэг хонидынь тарашаха», – гэжэ Нангин Бэшэг соо хэлэгдэнэ.

32Харин амидырһан хойноо Би таанадай түрүүндэ Галилейдэ ошоод байхаб, – гэбэ.

33– Бултанай Таниие орхёошье һаань, Би Танһаа хэзээшье арсахагүйб, – гэжэ Пётр Тэрээндэ хэлэбэ.

34– Энэ һүни эрэ тахяагай дуугархаһаань урда ши Намһаа гурба дахин арсахалши даа гэжэ баталан хэлэнэб, – гээд Иисүүс Пётрто хэлэбэ.

35Пётр урдаһаань:

– Тантай хамта үхэхэшье болобол, би Танһаа арсахагүйб, – гэбэ. Бусадшье шабинарынь бултадаа тиимэ юумэ хэлэбэ.

Иисүүс Гефсимани сэсэрлиг соо зальбарна

36Удаань Иисүүс шабинартайгаа хамта Гефсимани гэдэг газарта ерээд, тэдэндээ:

– Минии тэндэ ошожо зальбараад ерэтэр эндээ һуужа байгты, – гэжэ хэлэбэ.

37Иисүүс Пётрые, Зэбэдэйн хоёр хүбүүдые абажа ошобо. Тэрэ ехэл гашуудажа, ехэл һанаагаа зобожо, 38абажа гараһан шабинартаа:

– Минии ами һүнэһэн туйлай ехээр уйдажа, үхэһэндэл адли байнаб. Таанар эндэ Намтай хамта һэргэг байгты, – гэбэ.

39Тиигээд тээ хажуу тээшээ ошожо, уруугаа харан газар дээрэ хэбтээд:

– Эсэгэмни! Хэрбээ арга бии һаа, энэ аягаһаа амсуулангүй, иимэ ехэ зоболон намһаа зайлуулыт даа. Гэбэшье Минии дура хүсэлөөр бэшэ, харин Танай эрхэ хүсэлөөр болог лэ, – гэжэ зальбарба.

40Удаань шабинартаа бусажа ерэхэдэнь, тэдэнь унтажа байба. Тиимэһээ Тэрэ Пётрто хандан:

– Таанар гансаханшье саг соо унтангүй, Намтай һэргэлэн байлсаха аргагүй гээшэ гүт? 41Хорхойтуулгада абтахагүйн тула таанад һэргэг байгты, зальбарагты: сэдьхэл дорюуншье һаа, бэе ахир һула бшуу, – гэжэ хэлэбэ.

42Иисүүс дахин хажуу тээшээ ошожо:

– Эсэгэмни! Хэрбээ энэ аягаһаа амсуулангүй, энэ зоболон Намһаа зайлуулха аргагүй һаа, Танай дура хүсэлөөр болог лэ, – гэжэ зальбарба. 43Тэрэнэй шабинартаа ерэхэдэнь, тэдэнь баһал унтажа байба. Тэдэнэй нюдэниинь анилдаад нээгдэжэ үгэнгүй байгаа бшуу.

44Иисүүс дахин тэдэнээ орхижо, хажуу тээшээ ошоод, түрүүн зальбарһандаал адляар гурбадахияа зальбарба. 45Тиигээд Тэрэ шабинартаа ерээд:

– Таанад үшөөл унтажа, амаржа байна гүт? Зай, иигээд Хүн түрэлхитэнэй Хүбүүнэй нүгэл үйлэдэгшэдэй гарта тушаагдаха саг ерэбэ даа. 46Бодогты, ябаябди: Намда урбагша тээ тэрэ ойртожо ябана, – гэжэ хэлэбэ.

Иисүүсые бариба

47Иисүүсэй иигэжэ хэлэжэ байтарнь, арбан хоёр шабинарайнь нэгэн болохо Иуда ерэбэ. Тэрээнтэй хамта түрүү санаартанай, улад зоной ахамадуудай, Хуули заадаг багшанарай эльгээһэн һэлмэ, шиидам һаднаг бариһан олон зон байба. 48Урбагша хамта ябаһан зондоо ямар дохёо тэмдэг үгэхэ тухайгаа хэлсэжэ:

– Минии таалан мэндэшэлхэ хүн танда хэрэгтэй хүн гээшэ, тэрэниие баряарайгты, – гэбэ.

49Иуда сэхэ Иисүүстэ дүтэлэн ерэжэ:

– Рабби, амар мэндэ! – гэмсээрээ Тэрээниие таалаба.

50Иисүүс тэрээндэ:

– Нүхэр, ши һанаашалһан юумэеэ гүйсэдхэ#26:50 Энэ зүйлые «Ши юундэ ерээбши?» гэжэ тайлбарилжа болохо юм., – гэбэ.

Тиихэдэнь ерэһэн хүнүүд ойртожо, Иисүүсые барижа, харуул дооро абаба.

51Иисүүстэй байлсаһан нэгэ хүн һэлмэеэ гаргажа далайгаад, ахамад санаартын зарасын шэхые таһа сабшаба. 52Тиихэдэнь Иисүүс шабидаа:

– Һэлмэеэ байрандань бусаажа хэ. Һэлмэ баригшад булта һэлмэһээ хосорхо юм. 53Мүнөө Эсэгэһээ туһаламжа гуйхатаймни сасуу Намда Эльгээмэлнүүдэй арбан хоёр сэрэгһээ үлүү ехэ сэрэг тэрэ дороо ябуулха аргатай гэжэ мэдэнэгүй аалши? 54Теэд тиимэ юумэ гуйбални, Нангин Бэшэг соо хэлээтэй байһан зүйлнүүд яажа бүтэхэб? – гэжэ хэлэбэ.

55Тиигээд Иисүүс зэбсэгтэй ерэһэн улад зондо хандажа:

– Таанар дээрмэшэниие барихаяа гараһандал һэлмэ, шиидам һаднагтайгаар Намайе барихаяа ерэбэ гүт? Теэд үдэр бүхэн таанадые Һүмэ соо һургахадамни Намайе барижа хаадаггүй бэлэйлта, – гэбэ. 56Эдэ бүгэдэ Нангин Бэшэг соо лүндэншэдэй бэшэһэн мүрнүүдэй бэелхын тула болоо.

Тиихэдэнь Иисүүсэй шабинарынь булта Тэрэнээ орхёод, зугадаба.

Иисүүс Зүблэлэй гэшүүдэй урда зогсоно

57Иисүүсые барижа абаһан хүнүүд Тэрээниие Кайафа гэдэг ахамад санаартын гэртэ хүтэлжэ абаашаба. Тэндэнь Хуули заадаг багшанар, ахамадууд суглараад байгаа. 58Пётр зай баряад, ахамад санаартын хорёо хүрэтэр Иисүүсэй хойноһоо гэтэн ябаа. Тиигээд хорёо соо орожо, юунэй болохые харахаяа харуулшадаар хамта һуулсаба. 59Түрүү санаартан, ахамадууд, Зүблэлэй гэшүүд булта Иисүүсые үхэлэй саазада хүртөөхэ һанаатай байгаа. Тиимэһээ тэдэнэр Иисүүсые гэмнэхэ хуурмаг гэршэ баримта бэдэрбэ, 60теэд олон худал гэршэнэрэй ерээд, Тэрээн тухай худал юумэ хэлэбэшье, хэрэгтэйнүүдые олобогүй. Һүүлэй һүүлдэ хардаха хоёр гэршэнэр ерээд:

61– «Би Һүмые бута буулгаад, гурбан үдэр соо дахин бодхоожо шадахаб» гэжэ Тэрэнэй хэлэхые дуулаа һэмди, – гэбэд.

62Тиихэдэнь ахамад санаарта бодожо, Иисүүстэ хандан:

– Ши юундэ харюусанагүйбши? Шамайе зэмэлһэн гэршэлгэнүүдые дууланагүй гүш? – гэжэ һураба.

63Теэд Иисүүс юумэ дуугарбагүй. Тиихэдэнь ахамад санаарта Тэрээндэ:

– Амиды Бурханай урда тангариглан ши манда хэлэжэ үгэ, ши Бурханай табисуурта, Бурханай Хүбүүниинь гүш? – гэжэ хэлэбэ.

64Иисүүс тэрээндэ:

– Ши тиигэжэ хэлээш. Харин би та бүхэндэ иигэжэ хэлэхэб:

Мэнэ гэһээр таанад

Хүн түрэлхитэнэй Хүбүүе

Һүр хүсэтэй Бурханай

баруун талада һуухыень,

тэнгэриин үүлэнүүд дээрэ

тамаран ерэхыень үзэхэт, – гэбэ.

65Тиихэдэнь ахамад санаарта хубсаһаяа шуу татаад:

– Энэтнай Бурханиие доромжолжо байна! Бидэндэ үшөө ямар гэршэ хэрэгтэйб? Мүнөө һая энээнэй Бурханиие доромжолхыень дуулабат! 66Таанад юун гэжэ һананабта? – гэхэдэнь,

– Энэшни зэмэтэй, үхэлэй саазада хүртэхэ ёһотой, – гэжэ булта харюусаба.

67Тиигээд тэдэнэр Иисүүсэй нюур руунь нёлбобо, нюдаргаараа сохибо, зариман Тэрэнэй хасарые альгадажа байгаад:

68– Бурханай табисуурта Христоос, манда абарал буулгыш! Шамайе хэн сохёоб гэжэ манда хэлэжэ үгыш! – гэбэ.

Пётр Иисүүсһээ арсаба

69Пётрой газаа хорёодо һуухадань, нэгэ зараса һамган тэрээндэ ерэжэ:

– Ши баһал Галилейн Иисүүстэй хамта байлсаа һэнши, – гэбэ.

70Теэд Пётр:

– Шинии юун тухай хэлэжэ байһыешни би огто мэдэнэгүйб, – гээд бүгэдын урда мэлзэбэ. 71Баһа хорёогой үүдээр Пётрой гаража ябахадань, ондоо зараса һамган тэрээниие хараад:

– Энэ хүн баһа Назаредэй Иисүүстэй ябалсаа һэн, – гэжэ тэндэ байһан хүнүүдтэ хэлэбэ.

72– Би тэрэ хүниие огто танихагүйб, – гэжэ Пётр тангариглан мэлзэбэ.

73Нэгэ хэды болоод, тэндэ байһан хэдэн хүн Пётрто дүтэлжэ:

– Нээрээл ши тэдэнэй нэгэниинь байнаш, тиигээд аялга дууншни шамайе Галилейһээш гэжэ элирхэйлнэ, – гэбэ.

74– Энэ хүниие би огто мэдэхэгүйб, – гэжэ Пётр Бурханиие дурдажа байгаад тангариглаба.

Эгээл тэрэ үедэ гэнтэ эрэ тахяа дуугарба. 75Тиихэдэнь Пётр «Эрэ тахяагай дуугархаһаань урда ши Намһаа гурба дахин арсахалши даа», – гэжэ Иисүүсэй хэлэһые һанажархиба. Тиигээд тэндэһээ гараад, гунигтайгаар уйлаба.

Currently Selected:

Матвей 26: BurBBL2024

Highlight

Copy

Compare