Һошээ 14
14
Израиль, Эзэн Бурхандаа эрьеыш!
1Минии урдаһаа буһалгаалһанайнгаа түлөө Самари усадхагдаха. Улад зониинь һэлмээр сабшагдаха, нарай нялхануудынь тэһэ хаюулагдаха, хээлитэй эхэнэрнүүдынь хаха зүһэгдэхэ.
2Израилиин улад зон, Эзэн Бурхандаа эрьеыт! Нүгэл шэбэлтнай таанадые бүдэрүүлэн унагаажа байна. 3Эзэндээ эрьежэ, үгэнүүдээ зорюулан, иигэжэ хэлыт: «Нүгэлымнай арюудхыт, зальбаралыемнай дуулыт! Найдуулһанайнгаа ёһоор, бидэ Таниие магтан байхалди. 4Ассири маанадые абархагүй, дайнай моридто һуугаашье һаа, абарагдахагүйбди. Манай бурхад гэжэ онгонуудые бэшэ нэрлэхэгүйбди. Эзэмнай! Үншэн хэнзэ маанартаа энэрэл хайраяа бэлэглыт!»
Эзэн Израилиие дахин һалбаруулан мандуулха, элбэг дэлбэгээр үршөөхэ
5Эзэн иигэжэ айладхана:
Өөрын арадые һөөргэнь бусаахаб,
үнэнхэ зүрхэнһөө тэдэндэ дурлахаб.
Би тэдээндэ бэшэ уурлахагүйб.
6Хатаһан газарые уһалһан бороодол адли
Би Израильда болохоб.
Тиихэдэм тэрэ сарнай сэсэгтэл һалбаржа,
Ливаанай үнэтэ мододтол бүхэ үндэһэтэй болохо.
7Мүшэрынь һаглагар-саглагар боложо,
оливадал адли һайхан болохо,
Ливаанай үнэтэ хушадал адли анхилма үнэр хангалтуулха.
8Минии хамгаалалта доро тэдэ дахин ажаһуудаг болохо,
үрэжэл ехэтэй таряандал,
жэмэс олон уһан үзэмэй модондол,
Ливаанай үзэмэй дараһан архидал адли алдар суутай болон байха.
9Израилиин улад зон онгонуудта бэшэ мүргэхэгүй.
Би тэдэнэй гуйлтануудыень дуулажа,
тэдээн тушаа һанаа табин байхаб.
Жэлэй дүрбэн сагта ногоорон байдаг модондол,
Би тэдэниие аршалан хамгаалан байхаб,
үршөөл хайраяа бэлэглэхэб.
Түгэсхэл
10Энээниие ойлгохо сэсэн мэргэн ухаатай хэн байнаб? Энээниие мэдэхэ ухаан түгэлдэр хэн бииб? Эзэнэй харгы зам зүб. Залан сэхэ һайн зон тэрэ харгыгаарнь ябадаг, харин нүгэлтэйшүүл бүдэрэн унадаг юм.
Currently Selected:
Һошээ 14: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
