Ёһээл 1
1
1Пэтүһээлэй хүбүүн Ёһээлдэ Эзэнэй айладаһан үгэ.
Һалаһан ургаса тухай гашуудал
2Аха захатан, энээниие соносогты. Энэ газарта оршон һуугшад, бултадаа Намайе шагнагты. Таанарай гү, али үбгэ эсэгэнэрэйтнай үедэ иимэрхүү ябадал болоо гү? 3Энээн тухай таанар хүүгэдтээ хэлэжэ, тэдэ саашаа өөрын үхи хүбүүдтэ дамжуулан, тэдэнэй хүүгэд удаадахи үедөө дамжуулаг. 4Төөлүүрэй үлөөһэн юумэ һүрэг таршаа шумуул эдеэ, таршаа шумуулай үлөөһэниие үтэ хорхой эдеэ. 5Таанадай аманһаа һалгагдаһан шэхэрлиг үзэмэй дараһан архинай түлөө, үзэмэй дараһан архи уугша бүгэдэн бархиран гашуудагты. Танай хужарлан уудаг ундан үгы болоо. 6Тоолошогүй олон, ехэ хүсэтэй үндэһэтэн Минии орон нютаг эзэлэн абаба. Шүдэнүүдынь арсаланай һоёо шүдэнүүд мэтэ, үргэниинь эмэ арсаланайхида адли. 7Тэдэ минии уһан үзэмэй һөөгүүдые һүйдхэжэ, удамбар жэмэсэй модонуудые һалгааба. Холтоһыень хуулаһан нюсэгэн мүшэрнүүд сайран харагдана. 8Удархай самса нэмэрһэн эхэнэртэ адли эдир залуу үеынгөө нүхэрэй түлөө орилон уйлагты. 9Эзэнэй үргөөһөө үргэлэй эдеэн болон үзэмэй дараһан архи таһалдажа, Эзэнэй үйлэ бүтээдэг санаартад гашуудаба. 10Таряалан хооһоржо, газар гашуудана. Тариһан таряан һалажа, үзэмэй дараһан архи шэргэбэ, олива модоной шэнэ тоһон хатаба. 11Таряашад, гашуудагты, уһан үзэм ургуулагшад бархирагты, таряалангай шэниисэ, ешмээн усадхагдаа. 12Уһан үзэмэй һөөг, удамбар жэмэстэ модон хаташоо. Анар жэмэс, дала модон, алима жэмэсэй модон болон талын бүхы модод хубхайран хатаба. Хүн зоной баяр, хүхюу байдал үсөөрөө. 13Санаартан, гашуудалай хубсаһа нэмэрэн уйлагты. Үргэлэй шэрээдэ үйлэ бүтээгшэд орилогты. Гашуудалай таар хубсаһа үмдөөд, һүниие үнгэргэгты. Ушарынь хадаа Бурханай үргөөдэ эдеэн үргэл, үргэлэй үзэмэй дараһан архи үгы болоо. 14Масаг сахилга тунхаглагты, ёһололой суглаа зарлагты. Ахамад болон орон нютагай хамаг зониие Эзэн Бурханай үргөөдэ суглуулжа, Эзэндэ зальбарагты. 15Тэрэ үдэр гасалантай! Эзэнэй үдэр ойрохон байна. Тэрэ үдэр Түгэс Хүсэтэһөө хэһээлтэ ерэхэ. 16Хараһаар байтарнай хоол хүнэһэн һалгагдажа, Бурханай Һүмэдэ баясхаланта үгэ хүүр замхаба. 17Тариһан таряан хүрьһэнһөө бултайнгүй хаташоо. Орооһоной амбарнууд хаягдажа һандараа. 18Үргүүлхэ туйлдаа хүрэһэн адагуусанай шэмхэхэ ногоон үгы болобо. Хонин хоол олохо шадалгүй хосоржо байна. 19Эзэн манай, Танда хандан туһа эринэм. Хээрын бэлшээри галда абтажа, талын модые дүлэн үрэбхибэ. 20Зэрлиг ан арьяатан Танда баһал хандана. Ушарынь хадаа гол горхонууд уһаяа татажа, хээрын ногоон галда абтаба.
Currently Selected:
Ёһээл 1: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
