Һошээ 13
13
Израиль, ши усадхагдааш, – хэн Минии урдаһаа гаража, шамда туһалхаб?
1Эпрааимай обогой зоной үгэ хэлэхэдэ, бусад обогуудай улад зон шэшэрэлдэн айжа байдаг бэлэй. Эпрааимайхид бусадта хүндэтэй һэн. Теэд тэдэ Баалда шүтэжэ, нүгэл үйлэдэжэ, хосоржо байна. 2Мүнөө тэдэ нүгэлөө бүри олошоруулба: дархашуулай гараар өөһэдын тухайлһанай ёһоор мүнгэн онгонуудые урлуулба. Тиигээд тэдэ эдэ онгонуудта тахил үргэгты гэжэ хэлэнэ. 3Энээнэйнгээ түлөө тэдэ үглөөнэй манан, түргэн хатадаг шүүдэр, таряа сохиходо гарадаг мэхиинэ, соргоор бааяһан утаан мэтэ үгы болохо!
4Теэд Би, Эзэн Бурхантнай, Египедэй газар дайдаһаа таанарые абарааб. Таанад Намһаа бэшэ ондоо бурхадта мүргэхэ ёһогүйт. Намһаа бэшэ ондоо бурхан таанадые абархагүй. 5Хатаһан хуурай газарта Би таанад тушаа һанаагаа табин байгааб. 6Үрэжэлтэй һайн газар олоходоо, таанад садхалан боложо, бардамлажа эхилээт, тиигээд Намайе мартаат. 7Арсалан мэтэ Би таанадта добтолхоб! Ирбэс мэтэ таанадые амадан, харгы замдатнай хэбтэхэб. 8Гүлгэдөө алдаһан эмэ баабгайдал тэдээн руу добтолхоб, яһа ууһыетнай хухалан удара татахаб, эмэ арсаландал залгихаб, хээрын амитад тэдэниие таһа татахал.
9Израиль, ши өөрыгөө һалгаалши даа! Намайе түшэг тулгуубарим гэжэ ойлгоогүйш. 10Хааниие болон удамаршадые эреэ бэлэйш, теэд тэдэ яагаад улад зонииеш абаржа шадахаб?! 11Уур сухал дундаа Би таанадта хааниие үгөө һэм, бушаганаһан сухалайнгаа үедэ тэрэниие танһаа таһалан абааб.
12Израилиин зоной нүгэл болон гэмынь хэмһээ ехэ болоо, тиигээд бүрин бүтэн зандаа хадагалаатай байна. 13Эхын умайһаа гарахаяа арсажа байгааша үхибүүндэл Израиль тэнэг хонгор байна. Теэд тэрэ гэмээ амасаха. 14Үхэлэй оронһоо таанадые Би абархагүйб, үхэлһөө мултаруулхагүйб. Ай, Үхэл, зоболонгуудшни хаанаб? Үхэл, хадхуураараа зониие хадхан алыш, бултыень усадхыш! Би энээн тушаа оройдоошье халаглахагүйб. 15Бусад обогуудта орходоо Эпрааим үнэр олоншье хадаа, зүүн зүгһөө бодоһон һалхинда, сүл губиһаа Минии эльгээһэн һалхинда тэрэнэй үрэжэл хаташаха, булагынь шэргэхэ. Би үнэтэ сэнтэй юумэ нөөсэлһэн һангыень хооһолхоб.
Currently Selected:
Һошээ 13: BurBBL2024
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
