ማቶሳ 7

አሳ ቦላ ፕርዶፋ

(ሉቃ 6:37-42)

1“ህንተ ቦላ ፕርደቶና መላ ሀራታ ቦላ ፕርዶፍተ። 2አይስ ጊኮ፥ ሀራታ ቦላ ህንተ ፕርደይሳዳ ህንተ ቦላ ፕርደታና፤ ህንተ ሀራታስ ማክዳባን ህንተዉ ዛር ማከታና።#ማር 4:24. 3ነ አይፈን ደእያ ቱሱ ዳነይሳ በኦና ነ እሻ አይፈን ደእያ ቡርያ አይስ በአይ? 4ነ አይፈን ቱስ ደእሽን ነ እሻ አይፈን ደእያ ቡርያ ከሶ ጋናዉ ዋና ዳንዳአይ? 5ነኖ ጩቡዋዉ፥ ኮይሮታዳ ነ አይፈን ደእያ ቱስ ዳነይሳ ከሳ። እያፐ ጉየ፥ ነ እሻ አይፈን ደእያ ቡርያ ከሳናዉ ነ ጌሻ ፄላና።

6“ጉየ ስሚድ ህንተና ሳፆና መላ ጌሻባ ካናታስ የጎፍተ። ባንታ ቶሁዋን የድ ኢሶና መላ ህንተ አልኦ እንቁዋ ጉዱንታ ስንን የጎፍተ።

ዎስተ ኮይተ ፄግተ

(ሉቃ 11:9-13)

7“ዎስተ ህንተዉ እመታና፥ ኮይተ ህንተ ደማና፥ ካረ ይድ ፄግተ ህንተዉ ዶየታና። 8ዎስያ ኦደስካ እመታና፥ ኮይያ ኦደስካ በንታና፥ ካረ ይድ ፄግያ ኦደስካ ዶየተና።

9“ህንተ ግዶፈ ባ ናእ ኡይ ዎስኮ ሹች እመይ ኦኔ? 10ዎይኮ ሞሎ ዎስኮ ሾሽ እመይ ደኢ? 11ያትን ህንተ ኢታ ግድሸ ህንተ ናይታስ ሎኦባ እሞ ኤርኮ፥ ህንተ ሳሎ አዋይ ባና ዎሰይሳታስ ሎኦባ ዋት ዳርስድ እመኔ? 12ሀራት ህንተዉ ኦና መላ ህንተ ኮያባ ኡባ ህንተካ ሀራታስ ኦተ። አይስ ጊኮ፥ ሙሰ ህገይነ ናበት ታማርሰይ ሀይሳ።#ሉቃ 6:31.

13“ፁን ዉላራ ገልተ፤ አይስ ጊኮ፥ ዮስ ኤፍያ ኦገይ ዎጋ፥ ዉላይካ ዳልጋ። እያራ ገልያ አሳይካ ዳሮ። 14ሽን ደኡዋኮ ኤፍያ ኦገይነ ዉላይ ፁን፤ ያ ገልያ አሳይካ ጉ።

ም ባ አይፈን ኤረቴስ

(ሉቃ 6:43-44)

15“ቦላ ባጋራ ዶርሰ ዳንድ ባንታ ጋን ሱመ ግድድ ህንተ ግዶ ገልያ ዎርዳንቾ ናበታፐ ናገትተ። 16ህንተ ኤንታ፥ ኤንታ አይፍያፐ ኤራና፤ አጉንፈ ዎይነይ፥ ክንቾተፐ ላደይ ማፀተና። 17ሄሳ መላ ሎኦ ም ኡባይ ሎኦ አይፈ አይፌስ፤ ኢታ ም ኢታ አይፈ አይፌስ። 18ሎኦ ም ኢታ አይፈ አይፈና፥ ቃስ ኢታ ም ሎኦ አይፈ አይፋናዉ ዳንዳኤና። 19ሎኦ አይፈ አይፎና ም ኡባይ ቃንፀትድ ታማን ፁገታና።#ማቶ 3:10፤ ሉቃ 3:9. 20ሄሳ ግሾ፥ ህንተ ኤንታ፥ ኤንታ አይፍያን ኤራና።#ማቶ 12:33.

21“ሳሎን ደእያ ታ አዋ ሸንያ ኦያ ኡራይ ሳሎ ካዎተ ገላናፐ አትሽን፥ ጮ ታና ‘ጎዳዉ፥ ጎዳዉ’ ግያ ኡባይ ሳሎ ካዎተ ገለና። 22ፕርዳ ጋላስ ዳሮት፥ ‘ጎዳዉ፥ ጎዳዉ፥ ነ ሱንን ትንብተ ኦድቦኮ? ነ ሱንን ቱና አያናታ ከስቦኮ? ነ ሱንን ማላታታ ኦቦኮ?’ ያጋና። 23ሄ ዎደ ታኒ፥ ‘ታ ህንተና ኡባራካ ኤርከ፥ ህንተ ኢታ ኦይሳት ታፐ ሃክተ’ ያጋና።#ማዝ 6:8.

ኬ ኬፅያ ናምኡ አሳታ

24“ህዛ፥ ሀ ታ ቃላ ስእድ ኦያ ኦንካ ባ ኬ ሹቻ ቦላ ኬፅዳ ዎዛናማ አሳ መላ። 25እራይ ቡክስ፥ ድኦይ ድእስ፥ ጫርኮይካ ጫርክድ ሄ ኬ ሱግስ። ሽን ኬይ ሹቻ ባሶ ቦላ ኬፀትዳ ግሾ ኩንድቤና። 26ሀ ታ ቃላ ስእድ ኦና ኦንካ ባ ኬ ሻፈ ቦላ ኬፅዳ ኤያ ኡራ መላ። 27እራይ ቡክድ፥ ድኦይ ድእድ፥ ጫርኮይካ ጫርክድ፥ ሄ ኬ ሱግን፥ ሄ ኬይ ኩንድስ፤ እያ ኩንደይካ ዎልቃማ” ያግስ።

28-29የሱሲ ባ ኦዳ ኦንግዳ ዎደ እያ ትምርተይ ህገ አስታማረታ መላ ግዶናሽን፥ ማታራ ግድያ ግሾ አሳይ እያ ትምርትያን ማላለትዶሶና።#ማር 1:22፤ ሉቃ 4:32.

Currently Selected:

ማቶሳ 7: GFBEVF

Highlight

Copy

Compare