ማቶሳ 6

ማንቆታስ እሞባ

1“አስ በኦ ግድ ህንተ ሎኦ ኦሱዋ አሳ ስንን ኦናዳ ናገትተ። ሄሳ ሀኖና እፅኮ ሳሎን ደእያ ህንተ አዋፐ ዎይቶ ደመከታ።#ማቶ 23:5.

2“ህንተ ማንቆታስ እምያ ዎደ አሳ ስንን ቦንቸታናዉ ግድ ጩቦት ኦግያ ዶናንነ አይሁደ ዎሳ ኬታን ኦይሳዳ አስ በኦ ግድ ኦፍተ። ታ ህንተዉ ቱማ ኦዳይስ፤ ኤንቲ ባንታ ኩመ ዎይቱዋ ኤክዶሶና። 3ሽን ህንተ ማንቆታስ እምያ ዎደ ህንተ ኡሻቻ ኩሸይ ኦይሳ ህንተ ሀድርሳ ኩሸይ ኤሮፖ፤ 4ህንተ እሞይ ጌማን ግዶ። ጌማን ኦይሳ በእያ ህንተ አዋይ ህንተዉ ዎይቱዋ ቆንጨን እማና።

ዎሳባ

(ሉቃ 11:2-4)

5“ዎሳ ዎስሸ ጩቦታ ሀኖፕተ። ኤንቲ፥ ባንታና አስ በኦ ግድ አይሁደ ዎሳ ኬንነ ኦግያ ዶናን ኤቅድ ዎሰይሳ ዶሶሶና። ታ ህንተዉ ቱማ ኦዳይስ፤ ኤንቲ ባንታ ኩመ ዎይቱዋ ኤክዶሶና።#ሉቃ 18:10-14. 6ሽን ኔኒ ዎስያ ዎደ፥ ነ ሶ ገላ፥ ዉላ ጎርዳዳ ጌማን ደእያ ነ አዋኮ ዎሳ፤ ጌማን ኦሰትዳይሳ በእያ ነ አዋይ ነዉ ዎይቱዋ እማና። 7ህንተ ዎስያ ዎደ አማኖና አሳ ጮ ቃላ ዳርስድ ዎሶፍተ። ኤንቲ አዱስ ዎስን ፆሳይ ስኤስ ግድ ቆፖሶና። 8ሄሳ ግሾ፥ ኤንታይሳዳ ሀኖፕተ። አይስ ጊኮ፥ ህንተ አዋይ ህንተዉ አይ ኮሽያኮ ህንተ ዎሳናፐ ስንትድ ኤሬስ።

9“ህዛ፥ ህንተ ያግድ ዎስተ፦

“ ‘ሳሎን ደእያ ኑ አዋዉ፥

ነ ጌሻ ሱንይ አንጀቶ።

10ነ ካዎተይ ዮ፥

ነ ሸነይ ሳሎን ሀንዳይሳዳ

ሳአንካ ሀኖ።

11ጋላሳ ካ ሀች ሀች ኑስ እማ።

12ኑኒ ኑና ቆህዳይሳታ፥ አቶ ገይሳዳ፥

ኑስካ ኑ ቆሁዋ አቶ ጋ።

13ኑና ኢታፐ አሻፈ አትሽን፥

ፓጨን ገልሶፋ።

[ካዎተይ፥ ዎልቃይነ ቦንቾይ

መርናዉ ኔሳ፤ አምንእ።’]

14“ህንተ ህንተና ቆህዳይሳታ አቶ ጊኮ፥ ሳሎን ደእያ ህንተ አዋይ ህንተ ቆሁዋካ አቶ ጋና።#ማር 11:25-26. 15ሽን ህንተ ሀራ አሳ ናጋራ አቶ ጎና እፅኮ ህንተ አዋይ ህንተ ናጋራ አቶ ጌና።

ፆማባ

16“ህንተ ፆምያ ዎደ ጩቦታ ካዮቶፍተ። አይስ ጊኮ፥ ኤንቲ ፆመይሳ አስ ኤራና መላ ባንታ ሶምኡዋ ቅታዮሶና። ታ ቱማ ኦዳይስ፤ ኤንቲ ባንታ ዎይቱዋ ኤክዶሶና።

17“ሽን ኔኒ ፆምያ ዎደ ነ ሶምኡዋ ሜጫ፥ ነ ሁጵያ ትየታ። 18ሄሳዳ ነ ኦኮ ነ ፆምያ ፆማይ አሳፐ ጌምዳይሳ፥ ሽን ጌማን ደእያ ነ አዋይ ኤርያ ፆማ ግዳና። ጌማን ኦሰትዳይሳ በእያ ነ አዋይ ነዉ ዎይቱዋ እማና።

ሳሎን ሻሎ ሺሾ

19“ብል ምያ በሳን፥ ብራት ሽእያሶን፥ ካይሶይ ቦክድ ኤክያሶን፥ ሀ ሳአን፥ ህንተዉ ሻሎ ሺሾፕተ።#ያይ 5:2. 20ሽን ብል ሞናሶን፥ ብራት ሽኦናሶን፥ ካይሶይ ቦክድ ኤኮናሶን ሳሎን ህንተዉ ሻሎ ሺሽተ። 21ነ ሻሎይ ደእያሱዋን ነ ዎዛናይ ደአና።

22“አይፈይ አሳተስ ፆምፐ። ሄሳ ግሾ፥ ነ አይፈይ ፓፃ ግድኮ ነ ኩመ አሳተይ ፖኦ ግዴስ። 23ነ አይፈይ ሀርጋንቾ ግድኮ ነ ኩመ አሳተይ ማ ግዴስ። ህዛ፥ ነናን ደእያ ፖኦይ ማ ግድኮ፥ ማይ አይ መላ አድ ማንዴሻ!

24“እስ አስ ናምኡ ጎዳስ ሃረታናዉ ዳንዳኤና። እሱዋ ዶስኮ ሀንኩዋ እፄስ፤ ዎይኮ እሱዋ ቦንችኮ ሀንኩዋ ካስ። ፆሳስነ ሚሸስ ሃረታናዉ ዳንዳኤከታ።

ኡንኤቶፍተ

(ሉቃ 12:22-31)

25“ህዛ፥ ስእተ! ህንተ ደኦን ዳናዉ፥ ‘አይ ማኔ? አይ ኡያኔ? አይ ማአኔ?’ ግድ ኡንኤቶፍተ፤ ደኦይ ካፈ ዎይኮ አሳተ ማኦፐ አኔ? 26ሳሎ ካፎታ ፄልተ፤ ኤንቲ ዘሮኮና፥ ቡጮኮና፥ ሻለን የጎኮና፥ ሽን ህንተ ሳሎ አዋይ ኤንታ ሙዜስ። ህንተ ኤንታፈ ዳሮ አከቲ? 27ህንተ ግዶፈ ዳሮ ኡንኤትድ ባ ላይ ቦላ እስ ጋላስ ጉጃናዉ ዳንዳኤይ ደኢ?

28“ቃስ ህንተ ማእያባስ አይስ ኡንኤተቲ? አነ ጪሻታ በእተ፥ ኦሶን ዳቡሮኮና ዎይኮ ሱቆኮና። 29ስእተ! ሀር አቶሽን፥ ካዋ ሶሎሞነይ ባ ቦንቾ ኡባን ሀ ጪሻታፐ እሱዋ መላካ ማእቤና።#1 ካዎ 10:4-7፤ 2 ታር 9:3-6. 30ህንተኖ፥ አማኖይ ፓጭዳይሳቶ፥ ፆሳይ ሀች በንትድ ዎንቶ ታማን ዎናዉ ደእያ ማታ ያትድ ማይዝያባ ግድኮ፥ ህንተና ኤንታፈ አድ ዋት ማይዘኔ? 31ሄሳ ግሾ፥ ‘አይ ማኔ? አይ ኡያኔ? አይ ማአኔ?’ ግድ ኡንኤቶፍተ። 32ሄ ኡባ ፆሳ አማኖና አሳይ ዳርስድ ደማናዉ ኡንኤቶሶና። ህንተ ሳሎ አዋይ ሄ ኡባይ ህንተዉ ኮሸይሳ ኤሬስ። 33ሽን ኡባፈ ስን ፆሳ ካዎተነ እያ ፅሎተ ኮይተ፤ ሄ ኡባይ ህንተዉ ጉጅ እመታና። 34ሄሳ ግሾ፥ ዎንቶስ ቆፕሸ ኡንኤቶፍተ። ዎንቶይስ ዎንቶስ አቆ፤ እስ እስ ጋላሳይ ባዉ ግድያ መቶራ ደኤስ።

Currently Selected:

ማቶሳ 6: GFBEVF

Highlight

Copy

Compare