ማቶሳ 8

ባሮ ሀርጋንቾይ ፓፅስ

(ማር 1:40-45፤ ሉቃ 5:12-16)

1የሱሲ ዙማፐ ዎያ ዎደ ዳሮ አሳይ እያ ካልዶሶና። 2ሄኮ እስ ባሮ ሀርጋንቾይ እያኮ ሺቅድ፥ እያ ስንን ጉልባትድ፥ “ጎዳዉ፥ ነ ሸነ ግድኮ ታና ጌሻዳ ፓናዉ ዳንዳኣሳ” ያግስ። 3የሱሲ ባ ኩሽያ የድድ እያ ቦችድ፥ “ኤ፥ ታ ሸነ፥ ፓፃ” ያግስ። ኡራይ ኢራካ ጌይ አግስ። 4የሱሲ እያኮ፥ “ነ ፓፁዋ ኦደስካ ኦዶፓ። ሽን ባዳ ነ ጌያዳ ፓፆይሳ ካህነ በሳ። ነ ፓፁዋስ ማርካ ግዳና መላ ባዳ ሙሰይ ኪትዳ ያርሹዋ ያርሻ” ያግስ።#ሌወ 14:1.

ማቶ ሀላቃ አማኖ

5የሱሲ ቅፍርናሆማ ካታማ ጋክዳ ዎደ፥ እስ ማቶ ሀላቃይ እያኮ ሺቅድ፥ 6“ጎዳዉ፥ ታ አይለይ አሳተይ ጉንድን ዳሮ ሀርገትድ፥ ሶን ዝንእድ ደኤስ” ያግድ ዎስስ።

7የሱሲ ዛሪድ፥ “ታኒ ባዳ እያ ፓና” ያግስ።

8ሽን ማቶ ሀላቃይ ዛሪድ፥ “ጎዳዉ፥ ነ ታ ሶ ገላናዉ በሲያ አስ ግድከ፥ ሽን ነ ሀን ኡታዳ ቃላ ፃላላ ኦዳ፥ ታ አይለይ ፓፃና። 9አይስ ጊኮ፥ ታፐ ቦላራ ታና ኪትያ አሳት ደኦሶና፥ ቃስ ታፐ ጋርሳራ ታዉ ኪተተይሳት ደኦሶና። ኤንታፈ እሱዋ፥ ‘ባ’ ግያደ ቤስ፤ ሀንኩዋ ቃስ ‘ሃያ!’ ግያደ ዬስ። ታ አይልያ፥ ‘ሀይሳ ኦ’ ግያደ ኦስ” ያግስ።

10የሱሲ ሄሳ ስእዳ ዎደ ማላለትድ፥ ባና ካልያ አሳኮ፥ “ታ ህንተዉ ቱማ ኦዳይስ፤ ታኒ ሀይሳ መላ አማኖ እስራኤለ አሳንካ በአብከ። 11ታ ህንተዉ ኦዳይስ፤ ዳሮት ዶሎሀፐነ ዉሎሀፐ ይድ፥ ሳሎ ካዎተን አብራሃመራ፥ ይሳቃራነ ያይቆባራ እስፈ እማቶ ቦላ ኡታና።#ሉቃ 13:29. 12ሽን ሳሎ ካዎተ ላታናዉ በስሽን አትዳይሳት ካረ ማን ሆለታና። ያን ኤንታዉ ዬሆነ አቻ ጋርጨ ግዳና” ያግስ።#ማቶ 22:13፤ 25:30፤ ሉቃ 13:28.

13የሱሲ ማቶ ሀላቃኮ፥ “ነ ሶ ባ፥ ነ አማኑዋ ነዉ ሀኖ” ያግስ። እያ አይለይ ኢራካ ፓፅ አግስ።

የሱሲ ዳሮ ሀርጋንቾታ ፓስ

(ማር 1:29-34፤ ሉቃ 4:38-41)

14የሱሲ ጰፅሮሳ ሶ ገልያ ዎደ፥ ጰፅሮሳ ማቸ አይያ ቆፆ ምሻ ሀርገን ሳከታዳ ዝንእዳሮ በእስ። 15የሱሲ እ ኩሽያ ቦችዳ ዎደ ቆፆይነ ምሻይ አጋግስ። ፓፃ ደንዳዳ እያ ሞካሱ።

16ሄ ዎደ ኦማርስ ቱና አያናን ኦይከትዳ ዳሮ አሳታ፥ አሳይ የሱሳኮ ኤህዶሶና። እካ ቱና አያናታ ባ ቃላን ከስስ፥ ሀርጋንቾታ ኡባ ፓስ። 17ሄሳንካ ናብያ እሳያስ፥

“እ ኑ ሀርግያ ባዉ ኤክስ፥

ኑ ዳቡራ ቶክስ”

ግዳ ቃላይ ፖለትስ።#እሳ 53:4.

የሱሳ ካሎይ ጭግስያ ጋተ

(ሉቃ 9:57-62)

18የሱሲ ዳሮ አሳይ እያ ዩሹዋን ኤቅዳይሳ በእድ፥ አባፈ ሄፍን ፕናና መላ ባ ታማረታ ኪትስ። 19ህገ አስታማረታፐ እሶይ፥ “አስታማርያዉ፥ ነ ብያ በሳ ኡባ ታ ካላና” ያግስ።

20የሱሲ እያኮ “ዎርካናታስ ኦል ደኤስ፥ ሳሎ ካፎታስ ኬ ደኤስ። ሽን አሳ ናኣስ ባ ሁጵያ ሸምፕስያ በሲ ባዋ” ያግስ።

21የሱሳ ካልያ አሳታፐ እሶይ፥ “ጎዳዉ፥ ታኒ ስንታ ባዳ ታ አዋ ሞጋዳ ያና” ያግስ።

22ሽን የሱሲ፥ “ሀይቅዳይሳት ባንታ ሀይቆታ ሞጎ፤ ኔኒ ታና ካላ” ያግስ።

የሱሲ ሆቢያ ሴርስ

(ማር 4:35-41፤ ሉቃ 8:22-25)

23የሱሲ ባናዉ ዎጎሉዋን ገልዳ ዎደ፥ እያ ታማረትካ እያራ ባናዉ ገልዶሶና። 24ኤንቲ ቆፖና ደእሽን፥ ዎልቃማ ሆበይ ሃ ቦላ ደንድን ዎጎሎይ ምተታናዉ ጋክስ። ሽን የሱሲ ስክስ። 25እያ ታማረት እያኮ ሺቅድ እያ ባርከድ፥ “ጎዳዉ፥ ኑ ዮስ ኑና አሻርክ” ያግዶሶና።

26የሱሲ ኤንታኮ፥ “ህንተኖ፥ አማኖይ ፓጭዳይሳቶ፥ አይስ ያየቲ?” ያግስ። ደንድድ፥ ሆቢያነ ጎትያ ኤስስ። ኤለስድ ኡባባይ ስእ ግስ።

27እያ ታማረት ማላለትድ፥ “ሀይስ፥ ሀር አቶሽን፥ ሆበይነ ጎተይ ኪተተይስ ዋንዳ አሴ?” ያግዶሶና።

ቱና አያን ኦይክዳ ናምኡ አሳታ

(ማር 5:1-20፤ ሉቃ 8:26-39)

28የሱሲ አባፈ ሄፍንን ደእያ ገርገሶነ ቢታ ጋክዳ ዎደ ቱና አያናይ ኦይክዳ ናምኡ አሳት ዱፎፐ ከይድ እያራ ጋሄትዶሶና። ኤንቲ ዳሮ ኢታነ ያሽያ አሳታ ግድያ ግሾ አስ ሄ በሳራ አናዉ ዳንዳኤና። 29ኤንትካ፥ “ፆሳ ናአዉ፥ ኑናነ ነና አይበ ጋይ? ዎደይ ጋኮና ደእሽን ኑና ፕርዳናዉ ያዲ?” ግድ ዋስዶሶና።

30ኤንታፈ ዳሮ ሃኮና ጉዱን ዉደይ ሄመቴስ። 31ቱና አያናት የሱሳ፥ “ነ ኑና ከሳናባ ግድኮ፥ ህን ጉዱን ዉድያ ግዶ የዳርክ” ያግድ ዎስዶሶና።

32የሱሲ፥ “ቢተ” ያግስ። ቱና አያናት አሳታፐ ከይድ ጉዱንታን ገልዶሶና። ጉዱንት ኡባይ አፎ ዶናራ ድርግድ ብድ አባን ምተትድ ሀይቅዶሶና።

33ጉዱን ዉድያ ሄመይሳት ባቃትድ ካታማ ብድ፥ ሀንዳባነ ቱና አያናይ ኦይክዳ አሳታ ቦላ ኦሰትዳባ ኡባ ኦድዶሶና። 34ያትን፥ ካታማን ደእያ አሳ ኡባይ የሱሳ በአናዉ ከይዶሶና። ኤንቲ የሱሳ በእዳ ዎደ ባንታ ቢታፈ ከይድ ባና መላ ዎስዶሶና።

Currently Selected:

ማቶሳ 8: GFBEVF

Highlight

Copy

Compare