ማቶሳ 21

ግታ ቦንቾን የሩሳላመ ገሉዋ

(ማር 11:1-11፤ ሉቃ 19:28-40፤ ዮሀ 12:12-19)

1የሱሳራነ እያ ታማረታራ የሩሳላመ ማትድ፥ ሻማሆ ዙማ ቦላ ደእያ ቤተፋገ ጌተትያ ጉታ ጋክሸ፥ የሱሲ ባ ታማረታፐ ናምአታ ባፐ ስን ያግድ ኪትስ፦ 2“ህንተፈ ስንን ደእያ ጉታ ቢተ። ያን እስ ሀረይ ቃሾን ደእያሮ እ ማራራ ህንተ ደማና። ኤንታ ብልድ ሃ ኤክ ዪተ። 3ኦንካ ህንተና ኦይችኮ፥ ‘ጎዳይ ኤንታና ኮዬስ’ ያግተ። እ ኤንታና ኢራካ የድ አጋና” ያግስ።

4ሄስካ ናበይ፥

5“ፅዮነ ካታማስ፥

‘ሄኮ፥ ነ ካዎይ አሽከ ግድድ፥ ሀረ ቦላነ

ሀረ ማራ ቦላ ኡትድ፥ ኔኮ ዬስ’ ያግተ”

ያግድ ፃፍዳይስ ፖለታና መላ ሄስ ሀንስ።#ዛካ 9:9.

6እያ ታማረት ብድ የሱሲ ኤንታ ኪትዳይሳዳ ኦዶሶና። 7ሃሪውነ ሀረ ማራ ኤህድ ቦላራ ማእዳ ባንታ ማኡዋ ኤንታ ዞኮን የግዶሶና። የሱሲ ማኦታ ቦላ ኡትስ። 8ዳሮ አሳይ ባንታ ማኡዋ ኦግያን ሂፅዶሶና። ሀራት ቦንጮ ታሽድ ኦገ ቦላ የግዶሶና። 9የሱሳፐ ስንራ ሄመተይሳትነ እያፐ ጉየራ ካልያ ዳሮ አሳይ፥

“ሆሳና!#21:9 ሆሳና፦ እብራወ ዶናን ሆሳና ጉሳይ “ኑና አሻ” ጉሱ። ቃስ አሳይ ፆሳ ጋላታናዉ ጎኤትያ ቃላ። ዳዊታ ናአይ ጋላተቶ!

ጎዳ ሱንን የይስ አንጀትዳይሳ!

ቦንቾይ ኡባፈ ቃ ሳሉዋን ፆሳስ ግዶ!”

ያግድ ዋስዶሶና።#ማዝ 118:25.

10የሱሲ የሩሳላመ ካታማ ገልዳ ዎደ ሄ ካታማን ደእያ አሳ ኡባይ፥ “ሀይስ ኦኔ?” ያግድ ያርክዶሶና።

11አሳይ፥ “ሀይስ ጋልላን ደእያ ናዝረተ ካታማፐ ይዳ ናብያ የሱሳ” ያግዶሶና።

ፆሳ ኬፈ ዛልኤይሳታ ከስስ

(ማር 11:15-19፤ ሉቃ 19:45-48፤ ዮሀ 2:13-22)

12የሱሲ ፆሳ ኬ ገልድ፥ ያን ባይዘይሳታነ ሻመይሳታ ኡባ ካረ ጎድስ። ሚሸ ላመይሳታ ፃርጴዛታነ ሆለታ ባይዝያ ኦይደታ ሽር የግስ። 13እካ ኤንታኮ፥ “ፆሳ ቃላን፥ ‘ታ ኬይ ፆሳ ዎስያ ኬ ጌተታና’ ጌተትድ ፃፈትስ። ሽን ህንተ ፓንጋት ቆሰትያ ጎንጎሎ ኦደታ” ያግስ።#እሳ 56:7፤ ኤርም 7:11.

14የሱሲ ፆሳ ኬን ደእሽን ቆቀትነ ጉንዳት እያኮ ይን ኤንታ ፓስ። 15ሽን ካህነ ሀላቃትነ ህገ አስታማረት የሱሲ ኦዳ ማላልስያባታ በእዳይሳስነ ጉ ናይት ፆሳ ኬን፥ “ዳዊታ ናአይ፥ ጋላተቶ” ያግድ ዋሰይሳ ስእድ ሀንቀትዶሶና። 16ኤንቲ የሱሳኮ፥ “ሀይሳቲ ገይሳ ነ ስአይ?” ያግዶሶና።

የሱሲ፥ “ኤ ስአይስ፥ ፆሳ ቃላን፥ ‘ጉ ናይታ ዶናንነ ምያ ናይታ ዶናን ጋላታ ዎዳሳ’ ጌተትድ ፃፈትዳይሳ ህንተ ናባብበከቲ?” ያግስ። 17ኤንታና ያን አግድ ብታነ ካታማ ብድ አቅስ።

የሱሲ ባድዳ ባላሰ ምዉ

(ማር 11:12-14፥ 20-24)

18የሱሲ ዎንታ ጉራ ካታማ ስሚድ ይሸ ኮሻትስ። 19ኦገ ጋፃን እስ ባላሰ ም በእድ ኢኮ ብስ። ሽን ሀይፈ አትሽን፥ ሀራ አይኮካ ደምቤና። ሄሳ ግሾ፥ እዮ፥ “ህዛፐ ናምአን አይፈ አይፎፓ!” ያግስ። ሄ ባላሰ ምያ ኤለሳዳ መላ አጋሱ።

20እያ ታማረት ሄሳ በእድ፥ “ሀ ባላስያ ዋናዳ ኤለሳ መላዴ?” ያግድ ማላለትዶሶና።

21የሱሲ ዛሪድ፥ “ታኒ ህንተዉ ቱማ ኦዳይስ፤ ህንተዉ አማኖይ ደእኮ፥ ቃስ ህንተ ስና እፅኮ ባላሰ ቦላ ታኒ ኦዳይሳ መላ ፃላላ ኦከታ፥ ሽን ‘ሀ ዙማ ሾደታዳ አባን ዎ’ ያግኮ ሀናና።#ማቶ 17:20፤ 2 ቆሮ 13:2. 22አማንድ ህንተ ዎስያባ አይብባ ግድኮካ ህንተ ኤካና” ያግስ።

የሱሳ ማታይ ኦይሸተ

(ማር 11:27-33፤ ሉቃ 20:1-8)

23የሱሲ ፆሳ ኬ ገልድ ታማርስሽን፥ ካህነ ሀላቃትነ አይሁደ ጭማት እያኮ ይድ፥ “ኔኒ ሀይሳ ኦና መላ ነዉ አይ ማት ደኢ? ነዉ ሀ ማታ እምዳይ ኦኔ?” ያግድ ኦይችዶሶና።

24የሱሲ ኤንታኮ፥ “ታንካ ህንተና እስባ ኦይቻይስ፤ ህንተ ታዉ ሄሳ ዛርኮ፥ ታኒ አይ ማታን ኦያኮ ህንተዉ ኦዳና። 25ዮሃንስ ፃማቃና መላ ማታይ አዉፐ እመትዴ? ፆሳፈየ አሳፔ?” ያግስ።

ኤንቲ ባንታ ግዶን ዞረትድ፥ “ኑኒ፥ ‘ፆሳፈ’ ጊኮ፥ እ ኑና፥ ‘ያትን አይስ አማንበከቲ?’ ያጋና። 26ኑኒ፥ ‘አሳፐ’ ጊኮ፥ አሳ ኡባይ ዮሃንሳ ናበ ኦ ፄልያ ግሾ፥ አሳ ያዮስ” ያግዶሶና። 27ሄሳ ግሾ፥ “ኑኒ ኤሮኮ” ያግድ ዛርዶሶና።

እካ፥ “ህዛ፥ ታንካ ሀይሳ አይ ማታን ኦያኮ ህንተዉ ኦድከ” ያግስ።

ናምኡ ናይታ ሌምሶ

28“የሱሲ ካልድካ ሀይሳዳ ያግስ፦ ናምኡ አደ ናይት ደእያ እስ ኡራይ ደኤስ። ሄ ኡራይ ባይራ ናኣኮ ብድ፥ ‘ታ ናአዉ፥ ሀች ዎይነ ግዶ ባዳ ኦ’ ያግስ። 29ናአይ ዛሪድ፥ ‘አቶ ቢከ’ ያግስ። ሽን ጉየፐ ባ ዎዛናን ቆፕ ኤክድ ኦናዉ ብስ። 30አዋይ ባ ካሎ ናኣኮ ብድ፥ ባ ባይራ ናኣኮ ግዳይሳዳ ኪትስ። እካ፥ ‘ኤሮ፥ ታ አዋዉ’ ያግስ። ሽን ብቤና። 31ሀ ናምኡ ናይታፐ ባ አዋስ ኪተትዳይስ አዉሴ?” ያግስ።

ኤንትካ፥ “ባይራ” ያግዶሶና።

የሱሲ ኤንታኮ፥ “ታ ህንተዉ ቱማ ኦዳይስ፤ ቃራፃ ቃንፅሰይሳትነ ላይማተይሳት ህንተፈ ስንትድ ፆሳ ካዎተ ገላና። 32ፃማቅያ ዮሃንስ ሱረ ኦግያ ታማርስሸ ይን እ ገይሳ አማንበከታ። ሽን ቃራፃ ቃንፅሰይሳትነ ላይማተይሳት አማንዶሶና። ህንተ ሀር አቶሽን፥ ኤንታ በእድካ ህንተ ናጋራፐ ስሚድ አማንበከታ” ያግስ።#ሉቃ 3:12፤ 7:29-30.

ጎሻንቾታ ሌምሶ

(ማር 12:1-12፤ ሉቃ 20:9-19)

33ቃስካ የሱሲ ሀይሳዳ ያግስ፤ “ሀራ ሌምሶ ስእተ፥ ዎይነ ቶክዳ እስ ኡራይ ደኤስ። ሄ ዎይንያ ዩሹዋ ድርስ። ዎይነ ጉምእያ ኦላ ቦክስ። ዎይንያ ናጋናዉ ሻኮ ሻክስ። ሄሳፈ ጉየ፥ ጋድያ ኮ እምድ ሀራ ቢታ ብስ።#እሳ 5:1-2. 34ዎይነ አይፍያ ማፅያ ዎደይ ጋክን ባና ጋክያ ባጋ ኤክድ ያና መላ ባ አይለታ ኤንታኮ የድስ። 35ኮ አዋት እያ አይለታ ኦይክድ እሱዋ ዋዶሶና፥ ሀንኩዋ ዎዶሶና ቃስ አትዳይሳ ሹቻን ጫድዶሶና። 36ዎይነ አታክልትያ ጎዳይ ካሰይሳታፐ ዳርያ ሀራ አይለታ ኪትስ። ኮ አዋት ኤንታ ቦላካ ሀንኮይሳታ ቦላ ኦዳይሳዳ ኦዶሶና። 37ዉርሰን እ፥ ‘ታ ናኣ ኤንቲ ቦንቻና!’ ያግድ ባ ናኣ ኤንታኮ ኪትስ።

38“ሽን ኮ አዋት ናኣ በእድ ባንታ ግዶን ‘ጋድያ ላታናይስ ሀይሳ፥ እያ ዎድ ጋድያ ኑኒ ላቶስ!’ ያግዶሶና። 39ናአ ኦይክድ ዎይነ ጋድያ ግዶፈ ጋፃ ከስድ ዎዶሶና።

40“ህዛ፥ ዎይነ ጋድያ ጎዳይ ያ ዎደ ሄ ኮ አዋታ ዋታኔ?” ያግድ ኦይችስ።

41ኤንቲ ዛሪድ፥ “እ ሄ ኢታ አሳታ ኢታ ዎ ዎድ፥ ዎይነይ አይፍያ ዎደ እያ ጋክያ ባጋ ዎደን ዎደን እምያ ሀራ ኮ አዋታስ እማና” ያግዶሶና።

42የሱሲ ዛሪድ ኤንታኮ፥ ፆሳ ቃላን፥

“ ‘ግምበይሳት ቦርድ እፅዳ ሹቻይ፥

ጎዳ ፃጱዋ ምንያ፥ ኡባፈ አያ ሹቻ ግድስ።

ሀይስ ጎዳይ ኦዳባ፤

ኑ አይፍያስ ማላልስያባ’

ጌተትድ ፃፈትዳይሳ ናባብበከቲ?#ማዝ 118:22.

43“ሄሳ ግሾ፥ ታኒ ህንተዉ ኦዳይስ፤ ፆሳ ካዎተይ ህንተፈ ኤከትድ ሎኦ አይፈ አይፍያ አሳታስ እመታና። 44[ሀ ሹቻ ቦላ ኩንድያ ኦንካ መቀረታና። ቃስ ሀ ሹቻይ እያ ቦላ ዎያ ኡራይካ ጋጨታና”]#21:44 እስ እስ በን ማፃፋት ፓይዶ 44 ጉጆሶና። (ሉቃ 20:18 ፄልተ) ያግስ።

45ካህነ ሀላቃትነ ፋርሳወት የሱሲ ኦድዳ ሌምሱዋን ባንታና ኦድዳይሳ ኤርዶሶና። 46ኤንቲ የሱሳ ኦይካናዉ ኮይዶሶና፥ ሽን አሳይ የሱሳ ናበ ኦድ ፄልያ ግሾ፥ አሳስ ያይዶሶና።

Currently Selected:

ማቶሳ 21: GFBEVF

Highlight

Copy

Compare