ማቶሳ 22
22
ያጋኖ ፄሳ ሌምሶ
(ሉቃ 14:15-24)
1የሱሲ አሳስ ዛሪድ ሀይሳዳ ያግድ ሌምሶ ኦድስ። 2“ፆሳ ካዎተይ ባ ናኣስ ያጋኖ ጊግስዳ ካዋ ዳኔስ። 3ሄ ካዎይ ያጋኖ ያና መላ ኦድ ዎዳ አሳታ ፄጋናዉ ባ አይለታ ኪትስ። ሽን አሳት ያናዉ ኮይቦኮና። 4ቃስ ሀራ አይለታ ፄግድ፥ ፄገትዳ አሳታኮ ብድ፥ ‘ታኒ ታ ሳንጋታነ ሞዳ ጋታርመንታ ሹካስ፤ ኡባባይ ጊግስ። ታ ያጋኑዋ ሃ ዪተ ያግተ’ ያግድ ኪትስ። 5ሽን ፄገትዳይሳት ፄሳ እፅድ፥ ባንታ ኦሶስ ኦሶስ ብዶሶና። እሶይ ባ ጎሻስ፥ ሀንኮይ ባ ዛልእያስ ብስ። 6ሀራት ቃስ ካዋ አይለታ ኦይክድ፥ ካዉሽ ዋድ ዎዶሶና።
7“ካዎይ ዳሮ ይሎትድ፥ ባ ዎታዳረታ የድድ ሸምፖ ዎዳይሳታ ዎስስ፥ ኤንታ ካታማካ ፁግስ። 8ሄሳፈ ጉየ፥ ባ አይለታኮ፥ ‘ያጋኖይ ጊግስ፥ ሽን ፄገትዳይሳት ያጋኑዋስ በሲያ አስ ግዶኮና። 9ሄሳ ግሾ፥ ዎጋ ኦገታ ብድ፥ ደምዳ አስ ኡባ ያጋኑዋ ያና መላ ፄግተ’ ያግስ። 10አይለት ኦግያ ቦላ ብድ ባንታ ደምዳ አስ ኡባ ሎኦታነ ኢታታ ኤህድ ያጋኖ ሻቃራ ገልስድ ኩንዶሶና።
11“ሽን ካዎይ ካ ማናዉ ኡትዳ አሳ በአናዉ ገልዳ ዎደ ያጋኖ ማኦ ማእቦና እስ አስ ደምስ። 12እያኮ፥ ‘ላ፥ ነ ያጋኖ ማኦ ማኦና ዋናዳ ሀይሳ ገላዲ?’ ያግስ። ሽን ኡራይ ስእ ግስ።
13“ካዎይ ባ አይለታኮ፥ ‘ሀ ኡራ ኩሽያነ ቶሁዋ ቃችድ፥ ካረ ማ ከስ የግተ። ያን እያዉ ዬሆነ አቻ ጋርጨ ግዳና’ ያግስ።#ማቶ 8:12፤ 25:30፤ ሉቃ 13:28.
14“ሄሳዳካ፥ ፆሳ ካዎተስ ፄገትዳይሳት ዳሮ ሽን ዶረትዳይሳት ጉ” ያግስ።
ጊራባ
(ማር 12:13-17፤ ሉቃ 20:20-26)
15ሄሳፈ ጉየ፥ ፋርሳወት ብድ፥ የሱሳ ዋት ኦዳን ኦይካኔኮ ዞረትዶሶና። 16ባንታ ታማረታነ ሄሮዲሳ ባጋታፐ እሶታ እሶታ ኪትዶሶና። ኤንትካ፥ “አስታማርያዉ፥ ነ ቱማ ኦደይሳ ኑ ኤሮስ። ኔኒ አሳፐ አሰ ሻካካ፥ አሳ ዎይጋንደስ ጋዳ አይኮካ ኦካ፥ ፆሳ ኦገ ቱማተን ታማርሳሳ። 17አነ ኑስ ኦዳ፥ ኑኒ ሮመ ካዋስ ጊራ ጊራናዉ በሲ በሰኔ?” ያግዶሶና።
18ሽን የሱሲ ኤንታ ኢታ ቆፋ ኤርድ፥ “ሀ ጩቦቶ፥ ታና አይስ ፓጨቲ? 19ጊራ ጊርያ ሚሽያ ታና በስተ” ያግስ። ኤንትካ እያዉ ሳንትመ ኤህዶሶና። 20እ፥ “ሀ ሱንይነ ምስለይ ኦደባዬ?” ያግስ።
21ኤንቲ፥ “ሮመ ካዎይሳ” ያግዶሶና።
ያትን የሱሲ ኤንታኮ፥ “ህዛ፥ ካዋስ በሰይሳ ካዋስ፥ ፆሳስ በሰይሳ ፆሳስ እምተ” ያግስ።
22ኤንቲ ሄሳ ስእዳ ዎደ ማላለትድ እያ ማታፐ አግድ ብዶሶና።
ሀይቆፐ ደንዶባ
(ማር 12:18-27፤ ሉቃ 20:27-40)
23ሄ ጋላስ ሀይቆፐ ደንዶይ ባዋ ግያ ሳዱቃወት የሱሳኮ ይድ፥ ያግድ እያ ኦይችዶሶና።#ሀዋ 23:8. 24“አስታማርያዉ፥ ‘ሙሰይ፥ እስ አስ ናአ የሎና ሀይቅኮ፥ ሄ ሀይቅዳይሳ እሻይ እያ ማችዉ ኤክድ፥ ባ እሻስ ናአ የሎ’ ያግድ ኪትስ።#ዛረ 25:5. 25ኑ ኤርያ ላፑን እሻት ደኦሶና። ባይራይ ማቾ ኤክድ ናአ የሎና ሀይቅስ። እያ ማችዉ እያ ካሎ እሻይ ኤክስ። 26ሄሳዳካ፥ ሄ ማጫስዉ ኤክዳ ናምአንይካ፥ ሄንይካ፥ ብድ ላፑናት ዉራና ጋካናዉ ኡባይ ሀይቅዶሶና። 27ኡባፈ ጉየ ሄ ማጫስያ ሀይቃሱ። 28ያትን፥ ላፑናት ኡባይ እዮ ኤክዳ ግሾ፥ ሀይቆፐ ደንድያ ጋላስ፥ ሄ ማጫስያ ላፑናታፐ አዉሳስ ማቾ ግዳኔ?” ያግዶሶና።
29የሱሲ ዛሪድ፥ “ህንተ ፆሳ ቃላይ ታማርስያባ ዎይኮ እያ ዎልቃ ኤሮና ግሾ ባሌታ። 30አሳይ ሀይቆፐ ደንድያ ዎደ ሳሎን ደእያ ኪታንቾታ መላ ግዳናፐ አትሽን፥ ኤኮኮና ገሎኮና። 31ቃስ ሀይቅዳ አሳት ሀይቆፐ ደንዳናባ ፆሳይ ህንተዉ ኦድዳይሳ ናባብበከቲ? 32ፆሳይ፥ ‘ታኒ አብራሃመ ፆሳ፥ ይሳቃ ፆሳ፥ ያይቆባ ፆሳ’ ያግስ። ሄሳ ግሾ፥ ፆሳይ ፓፃ ደኤይሳታ ፆሳፈ አትሽን፥ ሀይቅዳይሳታ ፆሳ ግደና”#22:32 ፆሳይ ፓፃ ደኤይሳታ ፆሳፈ አትሽን፥ ሀይቅዳይሳታ ፆሳ ግደና፦ የሱሲ ሀ በሳን ኦደይ ፆሳይ ሀ ሀይቅዳ ሄታስ ፆሰ ግድኮ ኤንቲ ደኦን ደኦሶና ያገይሳ። ያግስ።#ከሳ 3:6.
33ዳሮ አሳይ ሄሳ ስእድ፥ እያ ትምርትያን ማላለትዶሶና።
ኡባፈ ባይራ ኪታ
(ማር 12:28-34፤ ሉቃ 10:25-28)
34የሱሲ ሳዱቃወታስ ጋናባ ይስዳይሳ ፋርሳወት ስእዳ ዎደ እስፈ ሺቅዶሶና። 35ኤንታ ግዶፈ እስ ህገ አስታማረይ የሱሳ ፓጨ ኦይሾ ኦይችስ። 36“አስታማርያዉ፥ ህገ ኡባፈ አይስ አዉሴ?” ያግድ ኦይችስ።
37የሱሲ ዛሪድ፥ “ ‘ነ ጎዳ፥ ነ ፆሳ፥ ነ ኩመ ዎዛናፐ፥ ነ ኩመ ሸምፑዋፈ፥ ነ ኩመ ቆፋፐ ዶሳ።#ዛረ 6:5. 38ኡባፈ አይስነ ባይራ ኪታይ ሀይሳ። 39ናምአን ኡባፈ አያ ኪታይ፥ አሰ ኡባ ነ ሁጵያ ነ ዶሰይሳዳ ዶሳ’ ያገይሳ።#ሌወ 19:18. 40ሙሰ ህገይነ ናበታ ትምርተይ ኡባይ ሀ ኪታታ ቦላ ካቶሶና” ያግስ።#ሉቃ 10:25-28.
ክርስቶስ ኦደ ናኤ?
(ማር 12:35-37፤ ሉቃ 20:41-44)
41ፋርሳወት እስ ቦላ ሺቅድ ደእሽን፥ የሱሲ ኤንታና፥ 42“ክርስቶሳባ ህንተ ዎይገቲ? እ ኦደ ናኤ?” ያግድ ኦይችስ።
ኤንቲ፥ “እ ካዋ ዳዊታ ናአ” ያግድ ዛርዶሶና።
43የሱሲ ኤንታኮ፥ “ያትን፥ ዳዊቲ ጌሻ አያናን ግድድ ዋትድ ክርስቶሳ፥ ‘ጎዳ’ ግድ ፄጊ? ዳዊታ ግሸ፥
44“ ‘ጎዳ ፆሳይ፥ ታ ጎዳኮ፥#22:44 ታ ጎዳኮ፦ ሀ በሳን ዳዊቲ ታ ጎዳ ግድ ፄገይ ክርስቶሳ።#ማዝ 110:1.
ነ ሞርከታ ነ ቶሆይ የያሶ ኦና ጋካናዉ፥
ሀይሳን ታፐ ኡሻቻ ባጋን#22:44 ኡሻቻ ባጋን፦ ማታነ ቦንቾ በሲ። ኡታ’ ግስ።#ማዝ 110:1.
45ህዛ፥ ዳዊቲ ክርስቶሳ ጎዳ ግድ ፄግኮ፥ ዋንድ ክርስቶስ ዳዊታ ናአ ግዲ?”
ያግስ።
46የሱሳስ እስ ቃላ ዛራናዉ ዳንዳእዳ አስ ኦንካ ባዋ። ቃስ ሄ ጋላሳፐ ዶምድ ሀራ ኦይሻ ኦይቻናዉ ኦንካ ዳንዳእቤና።
Currently Selected:
ማቶሳ 22: GFBEVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
