ማቶሳ 20

ኡነ ኦያ አሳ ሌምሶ

1“ፆሳ ካዎተይ ባ ዎይነ ጋደን ኡነ ኦያ አስ ኦስሳናዉ ዎንታ ጉራ ከይዳ ኡራ ዳኔስ። 2እ ሄ ኡነ ኦያ አሳ ሀች ሀች እስ ድናረ#20:2 እስ ድናረ፦ እስ አስ እስ ጋላስ ኦ ፔእድ ኤክያ ሚሸ። ቃንፃናዉ ኤንታራ ጊግድ፥ ኤንታ ባ ዎይነ ጋድያ ግዶ የድስ።

3“ቃስ ዎንታፈ ሄ ሳተ ግድሽን ከይድ ኦሶ ይድ ግያ ቦላ ኤቅዳ ሀራ አሳታ ደምስ። 4እ ኤንታኮ፥ ‘ህንተካ ታ ዎይነ ጋዴ ግዶ ብድ ኦተ፥ ታኒ ህንተዉ በሲያ ጋትያ ቃንፃና’ ያግስ። 5ኤንትካ ብዶሶና። ቃስካ እ ኡሱፑን ሳተንነ ኡዱፉን ሳተን ከይድ ሄሳዳ ኦስ። 6ታማነ እስ ሳተ ግድሽን እ ከይያ ዎደ ሀራት ያን ኤቅዳይሳታ ደምድ፥ ‘ህንተ ኦሶ ኦና ጋላስ ኩመ ሀይሳን አይስ ኤቅድ ፔእደቲ?’ ያግስ።

7“ኤንቲ ዛሪድ፥ ‘ኑና ኡነ ኦስስያ አስ ይዳ ግሾሳ’ ያግዶሶና።

“እካ፥ ‘ህንተካ ታ ዎይነ ጋድያ ግዶ ብድ ኦተ’ ያግስ።

8“ሳእ ኦማርስን፥ ዎይነ ጋድያ ጎዳይ ኦሳንቾታ ሀላቃኮ፥ ‘ኦሳንቾታ ፄጋዳ ዉርሰን ኦሶ ገልዳይሳታፐ ዶማዳ ኮይሮ ገልዳይሳታ ጋካናዉ ኤንታ ጋትያ ቃንፃ’ ያግስ።#ሌወ 19:13፤ ዛረ 24:15. 9ታማነ እስ ሳተን ኦሶ ኦይክዳይሳት ይድ፥ ሁጰን ሁጰን እስ እስ ድናረ ኤክዶሶና። 10ኮይሮ ኦሶ ኦይክዳይሳት ይድ፥ ባንታዉ ዳሮ እመታና ግድ ቆፕዶሶና። ሽን ኤንትካ ሁጰን ሁጰን እስ እስ ድናረ ኤክዶሶና። 11ባንታ ሚሽያ ኤክ ስሚድ ጎዳ ቦላ ዙዙምዶሶና። 12‘ሀይሳቲ ጉየፐ ይድ እስ ሳተ ፃላላ ኦዶሶና። ሽን ጋላስ ኩመ አዋ ሱላን ዳቡርድ ፔእዳ ኑራ ኤንቲ ዋንድ እስኖ ግዶና’ ያግዶሶና።

13“ዎይንያ ጎዳይ ኦሳንቾታፐ እሱዋኮ፥ ‘ታ እሻዉ፥ ታኒ ነና ቆሀብከ፤ ነ ታራ ጊግዳይ እስ ድናረሳ ግደኔ? 14ነ ሚሽያ ኤካዳ ነ ሶ ባ። ታ ኦማርስ ይዳይሳስካ ነይሳ መላ እማናዉ ኮያይስ። 15ታኒ ታ ሚሽያን ኮይዳባ ኦናዉ ታዉ ማት ባዌ? ዎይኮ ታኒ ኬሀ ግድዳ ግሾ ኔኒ ቃናታይ?’ ያግስ።

16“ሄሳዳ ሀእ ደን ጉየ ግድዳይሳት ስንታና፥ ስንትዳይሳት ቃስ ጉየታና” ያግስ።#ማቶ 19:30፤ ማር 10:31፤ ሉቃ 13:30.

የሱሲ ባ ሀይቁዋባ ሄን ኦድስ

(ማር 10:32-34፤ ሉቃ 18:31-34)

17የሱሲ የሩሳላመ ብሸ፥ ታማነ ናምኡ ታማረታ ዱማ ጋፃ ከስድ ኤንታኮ ያግስ፦ 18“ሄኮ፥ ኑኒ ሀእ የሩሳላመ ቡሳ ቦላ ደኦስ። ያን አሳ ናአይ ካህነ ሀላቃታስነ ህገ አስታማረታስ አድ እመታና። ኤንቲ እያ ቦላ ሀይቆ ፕርዳ ፕርዳና። 19እያ አይሁደ ግዶና ደርያስ አድ እማና። ኤንቲ እያ ካዉሻና፥ ጋራፋና፥ ያትድ እያ ማስቃልያ ቦላ ካቃና። ሽን እ ሄን ጋላስ ሀይቆፐ ደንዳና” ያግስ።

ዛብድዮሳ ናይታ አየ ዎሳ

(ማር 10:35-45)

20ሄ ዎደ ዛብድዮሳ ማችያ ባ ናምኡ አደ ናይታራ የሱሳኮ ያዳ፥ እያ ስንን ጉልባታዳ እስባ እያ ዎሳሱ።

21የሱሲ ኢኮ፥ “ነ አይ ኮያይ?” ያግስ።

እያ ዛራዳ፥ “ነ ካዎተን ሀ ታ ናምኡ ናይት እሶይ ነ ኡሻቻን እሶይ ነ ሀድርሳን ኡቶ ጋርክ!” ያጋሱ።

22ሽን የሱሲ ናይታኮ ዛሪድ፥ “ህንተ አይ ዎስያኮ ኤረከታ፤ ታኒ ኡያናዉ ደእያ ዋየ ፁኣ ኡያናዉ ዳንዳኤቲ?” ያግስ።

ኤንትካ፥ “ኤ ዳንዳኦስ” ያግዶሶና።

23የሱሲ፥ “ቱማካ ታኒ ኡያናዉ ደእያ ፁአፐ ህንተ ኡያና። ሽን ታ ኡሻቻንነ ሀድርሳን ኡታናይሳታ ዶረይ ታና ግድከ። ሄ በሳይ እመተይ፥ ታ አዋይ እማናዉ ጊግስዳ አሳታሳ” ያግስ።

24አትዳ ታሙ እያ ታማረት ሄሳ ስእዳ ዎደ ናምኡ እሻታ ቦላ ሀንቀትዶሶና። 25ሽን የሱሲ ኤንታ ኡባ ፄግድ ሀይሳዳ ያግስ። “አይሁደ ግዶና አሳ ሃረይሳት ባንታ አሳ ቦላ ጎዳተይሳነ ኤንታ ካለይሳት ዎልቃን ሃረይሳ ህንተ ኤሬታ። 26ሽን ህንተ ግዶን ሄሳዳ ግዶፖ። ህንተፈ ግታታናዉ ኮይያ ኦንካ ህንተዉ አይለ ግዶ።#ማቶ 23:11፤ ማር 9:35፤ ሉቃ 22:26. 27ህንተ ግዶን ኡባፈ ቦላ ግዳናዉ ኮይያ ኦንካ ህንተዉ አይለ ግዳናዉ በሴስ። 28ሄሳዳካ፥ አሳ ናአይ አሰ ሀጋዛናዉነ ዳሮ አሳ ዎዛናዉ ባ ሸምፑዋ እማናዉ ይስፐ አትሽን፥ አሳን ሀጋዘታናዉ ይቤና” ያግስ።

ናምኡ ቆቀት ፓፅዶሶና

(ማር 10:46-52፤ ሉቃ 18:35-43)

29ሄሳፈ ጉየ፥ የሱሲ ባ ታማረታራ እያርኮፈ ከይድ ብሽን፥ ዳሮ አሳይ ኤንታና ካልዶሶና። 30ኦገ ጋፃን ኡትዳ ናምኡ ቆቀት የሱሲ ያራ አይሳ ስእድ፥ “ጎዳዉ፥ ዳዊታ ናአዉ፥ ኑስ ቃታርክ” ያግድ ዋስዶሶና። 31ዳሮ አሳይ ኤንታና፥ “ሀይዝተ” ያግድ ካጭዶሶና። ሽን ኤንቲ፥ “ጎዳዉ፥ ዳዊታ ናአዉ፥ ኑስ ቃታርክ” ግድ ጉጅ ዋስዶሶና።

32የሱሲ ኤቅድ፥ ኤንታ ፄግድ፥ “ታ ህንተዉ አይ ኦና መላ ኮዬቲ?” ያግድ ኦይችስ።

33ኤንትካ፥ “ጎዳዉ፥ ኑ አይፈይ ፄላና መላ ኮዮስ” ያግዶሶና። 34የሱሲ ኤንታዉ ቃትድ፥ ኤንታ አይፍያ ቦችስ። ኤለስድ ኤንታ አይፈይ ፄልስ፤ ኤንቲ እያ ካልድ ብዶሶና።

Currently Selected:

ማቶሳ 20: GFBEVF

Highlight

Copy

Compare