1 Коринфын оліссезлӧ 15
15
1Воннэзӧ, тӧдвыланыт вайӧта Бур Юӧрсӧ, кӧдӧ ме одзжык висьтаси тіянлӧ. Тійӧ сійӧ кывсӧ босьтіт сьӧлӧманыт, бура видзсят сы бердӧ. 2Олат кӧ Бур Юӧрыс сьӧрті сідз, кыдз тіянлӧ висьтаси, Бур Юӧрыс отсӧтӧн тійӧ и мезмат. Одӧ кӧ сідз олӧ, сэк веритӧмныт абутӧм туйӧ. 3Ме висьтаси тіянлӧ медколанасӧ, мый ачым босьті сьӧлӧмам. Сія юӧрыс сэтшӧм: Кристосыс куліс миян умӧль керӧммез понда, кыдз и вӧлі гижӧм Вежа Гижӧтас. 4Кристосыс вӧлі дзебӧм. Вежа Гижӧтас висьталӧм сьӧрті куимӧт лунас Сія ловзис. 5Одзжык Кристосыс мыччасис Кифалӧ#15:5 Кифа ─ апостол Петралӧн мӧдік ним, сыбӧрын даскык велӧтчисьлӧ. 6Сэсся мыччасис ӧтлаӧ ӧксьӧм витсёся#15:6 витсё ─ 500 унажык вонлӧ. Ны коласісь мукӧдыс кулісӧ. Унажыкыс ӧнӧдз ловьяӧсь. 7Сыбӧрын мыччасис Яковлӧ да апостоллэслӧ быдӧнныслӧ. 8Быдӧнныс бӧрын мыччасис меным, апостоллэс коласісь медучӧтыслӧ. 9Апостоллэс коласісь ме медбӧрьяыс. Да и апостолнас менӧ нем понда шуны. Ме эд Еныслісь вичкусӧ одзжык вашӧтлі. 10Енлӧн бурсетӧмсянь ме ӧні сэтшӧм, кытшӧмӧн менӧ тӧдат. Сылӧн меным козьналӧм бурсетӧмыс эз вӧв весись. Ме кери мӧдік апостоллэзся унажык. Висьтавны кӧ, ме эг кер ачым. Еныслӧн бурсетӧмыс мекӧт, сія керис. 11Сідзкӧ, мый сэтісь, ме али нія висьтасьӧны? Мийӧ эд ӧтік йылісь висьтасям, и тійӧ пондіт веритны.
Кулӧммезлӧн ловзьӧм йылісь
12Мийӧ юӧртам Кристосыс йылісь сідз: Сія вӧлі кулӧм да ловзис. Тіян коласісь мукӧдыс кыдз нӧ вермӧны висьтавны, кулӧммес пӧ озӧ ловзьӧ? 13Кулӧммес озӧ кӧ ловзьӧ, сэк и Кристосыс эз ловзьы. 14Кристосыс эз кӧ ловзьы, сэк и миян юӧртӧмным весись. Весись и тійӧ веритат. 15Сэк Еныс йылісь миян висьтасьӧмным вӧлі бы бӧбӧтчӧмӧн. Мийӧ эд висьтасим Еныс йылісь, Сія пӧ Кристоссӧ ловзьӧтіс. Но кулӧммес озӧ кӧ ловзьӧ, сэк Сія и Кристоссӧ эз ловзьӧт. 16Кулӧммес кӧ озӧ ловзьӧ, сэк и Кристосыс эз ловзьы. 17Кристосыс кӧ эз ловзьы, сэк весись веритат, и умӧль керӧммезныт одззамоз тіян вылын. 18Сэк и Кристослӧ веритіссес, кӧдна кулісӧ ни, пыр кежӧ оланнысӧ ӧштісӧ. 19Мийӧ Кристосыс вылӧ надейтчам кӧ дзир му вылас олан кад кежӧ, мийӧ сэк быд отирся шудтӧмжыкӧсь.
20Но Кристосыс ловзис, кулӧммес коласісь медодз Сія ловзис. 21Кулӧмыс локтіс мортсянь. Сідз и кулӧмись ловзьӧмыс локтіс мортсянь. 22Кыдз Адамлӧн керӧмсянь быдӧнныс кулӧны, сідз Кристослӧн керӧмсянь быдӧнныс ловзясӧ. 23Быдыс ловзяс аскадӧ: одзлань Кристосыс, сэсся Сы локтӧм коста Кристослӧн отирыс. 24Кристосыс кӧр паздас#15:24 паздыны ─ разрушить быдпӧлӧс веськӧтліссесӧ, юраліссесӧ да выннэсӧ, сэк Ассис юралӧмсӧ сетас Ен Айыс киӧ. Сы бӧрсянь лоас векпоныс#15:24 векпон ─ конец века. 25Кристослӧ колӧ юравны сэтчӧдз, кытчӧдз Еныс оз пукты паныт лэбтісиссесӧ#15:25 паныт лэбтісись ─ враг Сы коккез увтӧ. 26Медбӧрья паныт лэбтісисьыс ─ кулӧмыс#15:26 кулӧм ─ смерть, и сійӧ паздасӧ. 27Еныс быдӧс пуктіс Кристослӧн коккез увтӧ. Кӧр лоас висьталӧм, «Быдӧс Сы коккез увтын», вежӧртам: Дзир Ен Айыс ӧтнас абу Сы коккез увтын. Сія эд Ачыс быдӧс пуктіс Кристослӧн коккез увтӧ. 28Кӧр быдӧс лоас Сы коккез увтын, сэк Ачыс Зоныс сетас Асьсӧ Еныс киӧ, медбы быдӧсын и быдлаын вӧлі Еныс.
29А мыйлӧ отирыс кулӧммес понда пыртчӧны? Кулӧммес кӧ озӧ ловзьӧ, мыйлӧ нӧ сэк ны туйӧ пыртчыны? 30Мыйлӧ нӧ ӧні мийӧ сідз олам: быд кад эд вермам ӧштыны оланнымӧс? 31Воннэзӧ, висьтала быльсӧ: ме ошшася тіянӧн Дӧсвидзись Кристос Исус одзын. И сія быль: ме быд лун кулӧм одзын. 32Ме Ефесас вермаси вӧрпаэзкӧт#15:32 вӧрпа ─ зверь. Морт мывкыдӧн видзӧтны кӧ, мый меным сэтісь бурыс? Кулӧммес кӧ озӧ ловзьӧ, сэк «пондам сёйны да юны, ашын эд куламӧ!» 33Эд бӧбасьӧ. «Умӧль йӧзкӧт тӧдчӧмыс ылӧтӧ бурас велалӧмсис». 34Вежӧрсялӧ, кыдз колӧ. Эд керӧ умӧльсӧ. Тіянлӧ висьтала, медбы гӧрдӧтіт: тіян коласісь мукӧдыс Енсӧ озӧ тӧдӧ.
Му вылісь да енӧжись вывтыр
35Кинкӧ поди юалас: «Кыдз ловзясӧ кулӧммес? Кытшӧм нылӧн вывтырныс лоас?» 36Мывкыдтӧм! Тэнат кӧдзӧмыт оз петав, оз кӧ кув кӧдзысыс. 37Кӧдзикат тэ он кӧдз быдмассӧ, кӧда петалас. Кӧдзан куш кӧдзыссӧ: шогді, мӧдікӧ я, мый эм. 38Еныс сылӧ сетӧ быдмассӧ, кытшӧмӧ колӧ. Быд кӧдзыслӧн аслас быдмас. 39Быдпӧлӧс ловьяыслӧн вывтырыс абу ӧткодь: ӧтік вывтыр мортлӧн, мӧдкодь вывтыр подалӧн, асланыс вывтыр чериэзлӧн да кайезлӧн. 40Эмӧсь енӧжись вывтыррез, эмӧсь му вылісь вывтыррез. Енӧжиссеслӧн асланыс югьялӧм. Мӧдік югьялӧм ─ му выліссеслӧн. 41Шонділӧн аслас югьялӧм, тӧлісьлӧн аслас, мӧдік ─ кӧдзуввезлӧн#15:41 кӧдзув ─ звезда. Ӧтік кӧдзув мӧдік кӧдзувкӧт озӧ ӧтмоза югьялӧ.
42Сідз и ловзьӧмыс коста: пуктӧны сісьман вывтыр, а чеччӧ сісьмытӧм. 43Пуктӧны нёштӧмӧ, чеччӧ югьялана. Пуктӧны садьтӧмӧ, чеччӧ вына. 44Пуктӧны мортлісь вывтыр, чеччӧ ловлӧн вывтыр. Эм мортлӧн вывтыр, эм ловлӧн вывтыр.
45Вежа Гижӧтас висьталӧм: «Медодзза мортыс ─ Адам, лоис ловья олісьӧн». А медбӧрья Адамыс ─ Ловзьӧтісь Лов. 46Одзжык вӧлі му вылісьыс, сэсся вӧлись енӧжисьыс. 47Одзза мортыс аркмӧтӧм муись, сія му вылісь. Мӧд мортыс ─ Дӧсвидзись. Сія локтіс енӧжсянь. 48Кытшӧм мусис керӧм мортыс, сэтшӧмӧсь и му вылын оліссес. Кытшӧм енӧжсянь Локтӧмыс, сэтшӧмӧсь и енӧжын оліссес. 49Ӧні мийӧ быдӧсын му вывсяыс кодьӧсь. Сэсся быдӧсын лоам енӧжсянь Локтӧмыс кодьӧсь.
50Воннэзӧ, ӧтікӧ висьтала тіянлӧ: вир яйись вывтыр оз пыр Енлӧн Юраланінӧ. Сісьманаыс оз босьт сісьмытӧмсӧ. 51Висьтала тіянлӧ тӧдлытӧмсӧ: мийӧ огӧ кулӧ быдӧнным, быдӧнным вежсямӧ. 52Быдӧс аркмас видзчисьтӧг, синӧн кваркыш он ешты керны. Кӧр букӧстас медбӧрья буксан#15:52 буксан ─ труба, сэк кулӧммес чеччасӧ сісьмытӧмӧсь, а мийӧ вежсямӧ. 53Сісьман-кулан вывтыр вежсяс мӧдік вывтырӧ, кӧда оз кув, оз сісьмы. 54Кӧр сісьман-кулан вывтыр вежсяс мӧдік вывтырӧ, кӧда оз кув, оз сісьмы, сэк аркмас гижӧм кыв сьӧрті:
─ Кулӧмсӧ#15:54 кулӧм ─ смерть вермӧм,
сійӧ ньылыштӧм, сія ӧні абу.
55Кулӧм, кытӧн тэнат чушканыт?
Ад! Кытӧн тэнат вермӧмыт?
56Кулӧмыслӧн чушканыс ─ умӧль керӧм. А умӧль керӧмыс вынсӧ босьтӧ Туйдӧтсис. 57Буркывтам Енсӧ! Сія сетӧ миянлӧ вермавны Дӧсвидзись Кристос Исусным пыр! 58Менам дона воннэзӧ, сідзкӧ, ёна сулалӧ, эд вӧрзьӧ. Дугдывтӧг керӧ Дӧсвидзисьлісь уджсӧ. Тӧдӧ, абу весись Дӧсвидзись понда керӧм уджныт.
Ерусалимись вежа отирлӧ отсӧт ӧктӧм
Currently Selected:
1 Коринфын оліссезлӧ 15: БЮ19
Highlight
Share
Copy
Want to have your highlights saved across all your devices? Sign up or sign in
