1 Коринфын оліссезлӧ 14
14
1Вынсьӧтчӧ зорамны радейтӧмас. Корӧ Лолыслісь верман-кужан козиннэсӧ#14:1 Ловлӧн верман-кужан козиннэз ─ духовные дары. Буржыка корӧ, медбы вермит Енсянь юӧртны. 2Баитӧ кӧ кин мӧдік кыв вылын, сія баитӧ Еныслӧ, оз отирлӧ. Сійӧ некин оз вежӧрт, сія эд Лов вынӧн тӧдлытӧмсӧ висьтавлӧ. 3Мортыс Енсянь кӧ юӧртӧ, сія отирсӧ вынсьӧтӧ, ӧзйӧтӧ-туйдӧтӧ да бурӧтӧ#14:3 бурӧтны ─ утешить. 4Мӧдік кыв вылын баитісьыс асьсӧ вынсьӧтӧ. Кин Енсянь юӧртӧ, сія вынсьӧтӧ вичкусӧ. 5Ме сьӧрті дак, быдӧнныт бы баитіт мӧдік кыввез вылын. Буржык эд, пондат кӧ Енсянь юӧртны. Отирыслӧ эд Енсянь юӧртісьыс коланажык мӧдік кыввез вылын баитісься. Но мӧдік кыввез вылын баитісьыс пондас кӧ вуджӧтны баитӧмсӧ, сэк сы висьталӧмсянь вичкуыс пондас вынсявны.
6Воннэзӧ, шуам, ме локті тіян дынӧ да понді баитны мӧдік кыввез вылын. Ме тіянӧс ог вежӧртӧт, ог висьтась Енсянь осьтӧмсӧ#14:6 осьтӧм ─ откровение да тӧдӧмӧс, ог Енсянь юӧрт, ог велӧт. Сэк мый ме тіянлӧ вая бурсӧ? 7Босьтам орсаннэз: пӧлян да сиа орсан#14:7 сиа орсан ─ струнный инструмент. Озӧ кӧ нійӧн орсӧ проглаз#14:7 проглаз ─ мотив сьӧрті, верман я сэк тӧдны, мый орсӧны? 8Лэбтісяс я тышкасян выныс, буксансис пондас кӧ петны кытшӧмкӧ тӧдтӧм шы? 9Кыдз тӧдасӧ, мый тійӧ баитат, пондат кӧ баитны тӧдтӧм кыввезӧн? Сія тіян весись баитӧм. 10Му вылас ӧддьӧн уна быдкодь кылыс. Босьт ны коласісь кытшӧмкӧ кыв. Быд кылыс мыйкӧ йылісь висьталӧ. 11Ог кӧ ме вежӧрт висьталӧм кыввесӧ, сэк баитісьыслӧ ме мӧдік муын олісь. Сідз и баитісьыс меным мӧдік муись.
12Тійӧ Лолыслісь ӧддьӧн корат верман-кужан козиннэсӧ. Сідзкӧ, корӧ сэтшӧммезӧ, медбы вермит вичкусӧ вынсьӧтны. 13Мӧдік кыв вылын баитісьыс, кеймы, медбы Вежа Лолыс сетіс вежӧртны да вуджӧтны мӧдік кывсӧ. 14Кейма кӧ ме мӧдік кыв вылын, сэк менам лолӧ кеймӧ. Вежӧрӧ сы коста весь олӧ. 15Мый нӧ сэк керны? Понда кеймыны ловнам, понда кеймыны и вежӧрнам. Понда сьывны ловнам, понда сьывны и вежӧрнам. 16Шуам, тэ пондан Енсӧ ошкыны ловнат. Тэнат ошкӧм бӧрын мортыс вермас разь висьтавны «аминь» кывсӧ? Тэнчит висьталӧмтӧ эд сія оз вежӧрт. 17Тэ бура буркывтан Енсӧ, но мӧдік мортлӧ сія нем оз сет. 18Буркывта ассим Енӧс: ме эд быдӧннытся унажык баита мӧдік кыввез вылын. 19Кристослӧ веритіссезлӧн ӧксьӧм коста унася-уна мӧдік кыв вылын баитӧм туйӧ меным буржык висьтавны вит вежӧртана кыв. Сідз мӧдіккезӧс верма велӧтны.
20Воннэзӧ! Эд лоӧ челядь мывкыдаӧсь. Умӧльсӧ керны лоӧ учӧтӧсь, а мывкыднаныт ыджытӧсь. 21Туйдӧтас тай висьталӧм:
─ Эта отирлӧ мӧдік отир пыр понда баитны,
мӧдік кыввез вылын висьтала,
и сэк озӧ кывзісьӧ Менӧ, шуӧ Дӧсвидзись.
22Мӧдік кыввез вылын баитӧмыс ─ пас нылӧ, кӧдна озӧ веритӧ, абу веритіссеслӧ. Енсянь юӧртӧмыс ─ веритіссеслӧ, абу вериттӧммеслӧ. 23Шуам, веритіссес быдӧнныс ӧксясӧ ӧтлаӧ. Сэтӧн быдӧнныт пондат баитны тӧдтӧм кыввез вылын. Сы коста тіян дынӧ пырасӧ вериттӧм отир, кӧдна озӧ тӧдӧ, мый керсьӧ. Озӧ я нія висьталӧ, тійӧ пӧ бӧбмӧмныт? 24Шуам, тійӧ быдӧнныт Енсянь юӧртат, сы коста пырас морт, кӧда оз верит, оз тӧд. Еныс быдӧнныт пыр осьтас сылісь умӧль керӧммесӧ, сійӧ осудитас. 25Сідз сылӧн сьӧлӧм вылас видзӧмыс оссьӧ. Сія уськӧтчас джоджас, копыртчас Еныслӧ да висьталас: «Былись эд тіянкӧт Еныс!»
Ӧксьӧм коста быдӧс бытшӧма чулӧтӧм
26Воннэзӧ, мый шуа сэтчӧ? Ӧксьӧмныт коста быдыс тіян коласісь вермӧ мыйкӧ керны: ӧтік ─ сьывны, мӧдік ─ велӧтны, кинкӧ Енлісь осьтӧм висьтавны, кинкӧ мӧдік кыввез вылын баитны, кинкӧ вежӧртӧ вуджӧтны сылісь баитӧмсӧ. Ась тіян эта быдӧс лоӧ ӧксьӧммесӧ вынсьӧтӧм могись. 27Мӧдік кыв вылын баитіссез, вермат баитны кыкӧн, унажыксӧ куимӧн. Баитӧ торйӧн, а кинкӧ ась вежӧртӧтӧ баитӧмнытӧ. 28Абу кӧ вежӧртӧтісьыс, сэк мӧдік кыввез вылын баитісьыс вичкуын ась чӧлӧ. Ась баитӧ аслыс да Еныслӧ. 29Енсянь юӧртіссес ась баитӧны кыкӧн, куимӧн я. Мӧддэс висьталӧмсӧ ась тӧдмалӧны да авйӧны. 30Кывзіссес коласісь кинлӧкӧ Еныс мыйкӧ осьтас кӧ, сы коста баитісьыслӧ колӧ дугдыны баитны. 31Енсянь юӧртны сьӧрсьӧн-бӧрсьӧн вермат быдӧнныт. Сэк быдӧнныт вермат велӧтчыны, ӧтамӧднытӧ вынсьӧтны. 32Енсянь юӧртіссес вермӧны веськӧтлыны Ловсянь сетӧм висьталӧмнас. 33Еныс эд абу арттӧмсӧ#14:33 арттӧм ─ беспорядок вайись Ен, а лӧньсӧ сетісь Ен.
Сідз керсьӧ вежа отирлӧн вичкуэзын быд ӧксьӧм коста. 34Ӧксьӧмныт коста инькаэс ась чӧлӧны, нылӧ баитны оз туй. Нылӧ колӧ кывзісьны. Сідз Туйдӧтын гижӧм. 35Нія мӧдӧны кӧ мыйкӧ тӧдны, ась юасьӧны гортаныс жӧниккезныслісь. Инькалӧ ӧксьӧм коста баитны небытшӧм. 36Тіян дынісь разь петіс Еныслӧн кылыс? Поди, дзир тіян дынӧ локтіс?
37Кин пуктӧ асьсӧ Енсянь юӧртісьӧ, Лов сьӧрті олісьӧ я, ась вежӧртӧ: менам гижӧмӧ ─ Дӧсвидзисьлӧн тшӧктӧммез. 38Кин оз кӧ вежӧрт, ась оз вежӧрт. 39Воннэзӧ! Сідзкӧ, корӧ, медбы вермит Енсянь юӧртны. Лэдзӧ баитны и мӧдік кыввез вылын. 40Вичкуас ась быдӧс керсьӧ бура, лӧсьӧтӧмӧн, медбы быдӧс вӧлі арта#14:40 арта ─ в порядке.
Кристослӧн ловзьӧм йылісь
Currently Selected:
1 Коринфын оліссезлӧ 14: БЮ19
Highlight
Share
Copy
Want to have your highlights saved across all your devices? Sign up or sign in
