Тархал 14

ГӀизраилазул дандечӀей

1Гьебмехалъ халкъалъ ахӀи-хӀур бахъинабуна. ТӀубараб сордоялъ гӀодана гьел риччан гьаркьалгун ва 2Мусаеги Гьаруниеги бадирчӀваял гьаризе лъугьана. ТӀолабго халкъалъ гьезда абулеб букӀана:

«Унго, Мисриялдаго хварал анищ ниж! Яги гьанир салул авлахъалда хун рукӀарал анищ! 3Щай БЕТӀЕРГЬАНАС ниж гьеб ракьалде рачунел ругел? Гьенир ниж хвалчаца чӀвазе рукӀинейищ? Цинги нижер лъудбиги лъималги асирлъуде ккела! Мисриялдего тӀадруссани лъикӀ букӀина нилъее!» 4Гьез цоцазда абулеб букӀана:

«РачӀа нилъеца цоги бетӀер тӀаса вищизе ва Мисриялде тӀадруссине», – ян.

5Гьебмехалда Мусаги Гьарунги ГӀизраилалъул жамагӀаталда цере накабазда чӀана. 6Ракьазул хал-шал гьабизе аразда гьоркьор рукӀарал Нунил вас Егьошуацаги Ефуннил вас Халевицаги, чара бухӀун, жидедаго тӀад букӀараб партал бихъ-бихъана 7ва гьез гӀизраилазул жамагӀаталда абуна:

«Нилъеца хал-шал гьабураб ракь кутакалда лъикӀаб буго! 8БЕТӀЕРГЬАН нилъеда гурхӀулев ватани, Гьес рачинеги рачун, нилъее кьела рахьги гьоцӀоги чвахулеб доб ракь. 9Амма БЕТӀЕРГЬАНАСДА данде рахъунге ва доб ракьалъул гӀадамазукьа хӀинкъуге, щайгурелъул нилъеца бигьаго къезарила дол! Дозие кумек гьечӀо, нилъгунин абуни, БЕТӀЕРГЬАН вуго. ХӀинкъуге дозукьа!» – ян.

10Гьебмехалъ халкъалъ гьел ганчӀица чӀвазехъин рукӀана, амма циндаго, киназдаго бихьун, БЕТӀЕРГЬАНАСУЛ къудрат загьирлъана ДандчӀваялъул Чадиралъул кӀалтӀа.

11БЕТӀЕРГЬАНАС Мусада абуна:

«КидаллъизегӀан гьаб халкъалъ Дун нахъчӀвазе вугев? КидаллъизегӀан гьел Дида божиларел, Дица жидеда гьоркьор гьаруралщинал гӀаламаталги гӀечӀого? 12Квешаб унтиги тӀаде биччан тӀагӀинабила Дица гьаб халкъ! Ва дудасан бижизабила гьалдасаги цӀикӀкӀараб ва къуватаб халкъ».

13Гьебмехалъ Мусаца БЕТӀЕРГЬАНАСДА абуна:

«Цинги гьеб хабар рагӀила Дуца Дурго къуваталдалъун жидер кверщаликьа гьаб халкъ хвасар гьабурал мисриязда! 14Мисрияз кинабго бицина гьаб ракьалъул халкъазда. Огь дир БЕТӀЕРГЬАН, гьел халкъазда рагӀун бугелъул, Мун Дур халкъалда цадахъ вукӀуневлъи ва Дуца бадиса бадиве Мунго вихьизе толеблъи, я БЕТӀЕРГЬАН! Ханааниязда лъала Дур накӀкӀул парча гӀизраилазда тӀад бугеблъи ва Мун гьезда цадахъ къад – накӀкӀул хӀубилъун, къаси – цӀадул хӀубилъун унев вугеблъиги. 15Цо чи течӀого Дуца гьаб халкъ тӀагӀинабуни, Дур хӀалкӀолъиялъул хабар рагӀарал халкъаз абизе буго: 16„БЕТӀЕРГЬАНАСУХЪА бажаричӀо дозие кьезе амру гьабураб ракьалде доб халкъ бачине. Гьединлъидал Гьес дол салул авлахъалда чӀван руго“, – ян. 17Биччанте гьанже загьирлъун букӀине БетӀергьанасул хӀалкӀолъи, Дуцаго абураб куцалда: 18„БЕТӀЕРГЬАНАСУЛ сабру халатаб, Гьесул рахӀму-цӀоб гӀатӀидаб! Гьев мунагь-хӀакъалдасаги тӀасалъугьуна! Амма гӀайибиял тамихӀалде цӀала – умумузул мунагьазухъ, лъабабилеб ва ункъабилеб наслуялде щвезегӀанги, лъималазул лъималазеги тамихӀ гьабула“, – ян. 19Дур тӀадегӀанаб рахӀму-цӀобалъе гӀоло, тӀасалъугьа гьаб халкъалъул мунагьалдаса, Мисриялдаса рахъаралдаса нахъе жакъа къоялде щвезегӀанги тӀасалъугьунев вукӀаравго гӀадин!»

20БЕТӀЕРГЬАНАС жаваб кьуна:

«Дур гьариялъе гӀоло тӀасалъугьина Дун гьеб халкъалдаса. 21Амма Дирго цӀаралхӀаги ва дуниялго цӀезабураб Дирго реццалхӀаги, – 22Дир къудратги бихьарал, Мисриялда ва салул авлахъалда Дица гьарурал хӀикматал ишалги рихьарал, амма гьебги гӀечӀого, тӀокӀалъ чӀечӀого Дир хӀалалги рихьун, Дие мутӀигӀлъичӀел чагӀазда 23бихьизе гьечӀо, гьезие кьезе бугин абун гьезул умумузе Дун гьедараб ракь. Дун рихарав цониги чиясда гьеб бихьиларо! 24Амма дир лагъ Халев гьезда релълъарав гьечӀо, гьев ракӀ-ракӀалъ Дида божарав вуго. Гьелъухъ Дица гьев щвезавила гьесда бихьараб ракьалде ва гьесул наслаби рукӀина гьелъул бетӀергьабилъун. 25ГӀатӀиракьалда амалекиялги ханааниялги руго гӀумру гьабулел, гьединлъидал метер нуж тӀадрусса ва, БагӀараб ралъдахъе унеб нухккун, салул авлахъалде а».

Халкъалъе жаза гьаби

26БЕТӀЕРГЬАНАС Мусадаги Гьарунидаги абуна: 27«КидаллъизегӀан Дида данде гӀарзахъдизе бугеб гьаб ццидал цӀураб халкъ? Гьезул разигьечӀолъиялъул къулкъуди рагӀулеб буго Дида. 28Гьезда абе: „Дирго цӀаралхӀаги, – ян абулеб бугин БЕТӀЕРГЬАНАС, – нужеца бицаралда рекъон гьабила Дица нужее. 29Нужер жаназаби гьаб салул авлахъалда хутӀила; халкъалъул сияхӀалда хъварав къогоялдаса тӀаде сон барав ва Диде къулкъудулев вукӀарав щивав чиясул жаназа гьаб авлахъалда хутӀила. 30Нужер цонигияс хӀетӀе чӀеларо Дица нужер улкалъун гьабизе рагӀи кьун букӀараб ракьалда, Ефуннил вас Халевицаги Нунил вас Егьошуацаги гурони. 31Нужерго лъимал асирлъуде ккезе гурин хӀинкъун рукӀана нуж. Гьеле гьел рачина Дица нужеца инкар гьабураб ракьалде. 32Амма нужер жаназаби гьаб салул авлахъалде рехун тела. 33Нужер лъимал рукӀина кӀикъого соналъ гьаб авлахъалда, гӀухьби кинигин, нужер пасикълъиялъухъ гӀакъуба чӀамулел, нужер ахирисев чи хвезегӀан. 34КӀикъого соналъ – нужеца доб Ханааналъул цӀех-рех гьабулаго бараб кӀикъого къоялъул щибаб къоялъухъ цо-цо сон рикӀкӀун – нуж рукӀина гӀазабалда, нужерго мунагьал сабаблъун, ва гьебмехалъ лъала нужеда Диргун тушманлъи гьабиялъул кьогӀлъи“. 35Дица – БЕТӀЕРГЬАНАС – абулеб буго гьедин! Дица чара гьечӀого гьедин гьабила Дида данде бахъараб тӀолабго гьаб ццидал цӀураб халкъалъе. Гьаб салул авлахъалда тӀагӀина гьел! Гьел киналго хвезе руго гьанир!»

36Мусаца доб ракьалъул цӀех-рех гьабизе ритӀун рукӀарал чагӀаз, гьениса тӀадруссун хадуб квешал харбал тӀиритӀизаризе лъугьана, ва тӀолабго халкъги гьезда рекъон Мусада данде къулкъудана. 37Гьеб ракьалъул хӀакъалъулъ хӀинкъарал харбал тӀиритӀизаруралъухъ, гьел киналго, квешаб унтиги ккун, хвана. БЕТӀЕРГЬАНАС жаза гьабуна гьезие. 38Ракьалъул хал-шал гьабизе ун рукӀаразда гьоркьоса чӀаго хутӀана гӀицӀго Нунил вас Егьошуаги Ефуннил вас Халевги.

39Мусаца БетӀергьанасул рагӀи гӀизраилазда бицараб мехалъ, тӀолабго ГӀизраилил халкъ гӀек-гӀекиялда гӀодана. 40Нахъисеб къоялъ цудунго тӀадеги рахъун, гьел мугӀруздехун къокъана.

«Нижеца мунагь гьабуна! – ян абулеб букӀана гьез. – БукӀаниги, гьанже ниж ина БЕТӀЕРГЬАНАС абураб бакӀалде».

41Амма Мусаца абуна:

«Щай нужеца БЕТӀЕРГЬАНАСУЛ амру тӀубазабулареб? Гьеб ишалъул нужее лъикӀаб хӀасил кколаро. 42Кирего унге, нужеда цадахъ БЕТӀЕРГЬАН гьечӀелъул гьанже; ани, тушбабаца щущахъ риххизаризе руго нуж. 43Нухда нужеда данде рагъила амалекиялги ханааниялги ва гьез чӀвала нуж. Нужеца БЕТӀЕРГЬАНАСДЕ мугъ рехана, гьединлъидал Гьесул квербакъи букӀунаро нужее», – ян.

44Амма, жидедаго ракӀчӀун, мугӀруздехун ралагьун нухда рахъана гьел чагӀи; БЕТӀЕРГЬАНАСУЛ КъотӀиялъул гъамасги Мусаги ругелъурго чӀана. 45Цинги мугӀрузда чӀарал амалекиязги ханааниязги, гьезда дандеги рачӀун, гьел щущахъ риххизаруна ва Хормаялде щвезегӀан лъутизаруна.

Currently Selected:

Тархал 14: АварАК

Highlight

Copy