Тархал 13
13
АнцӀила кӀиго жасус
1Хадуб халкъ Хацероталдаса сапаралъ бахъана ва Паран салул авлахъалде щведал, гьениб лъалхъи гьабуна.
2БЕТӀЕРГЬАНАС Мусада абуна:
3«Дица гӀизраилазе кьолеб бугеб Ханааналъул ракьалъул цӀех-рех гьабизе жасусал ритӀе: щибаб къавмалъул церехъабазда гьоркьоса цо-цо чи».
4Мусаца гьел ритӀана Паран абураб салул авлахъалдаса, БЕТӀЕРГЬАНАСУЛ амруялда рекъон. Гьел киналго рукӀана гӀизраилазул къавмазул церехъабазда гьоркьоса чагӀи. 5Гьале гьезул цӀарал:
Рувимил къавмалдаса – Заккурил вас Шаммуа;
6Шимеонил къавмалдаса – ХӀорил вас Шафат;
7Ягьудал къавмалдаса – Ефуннил вас Халев;
8Иссахарил къавмалдаса – Юсупил вас Игал;
9Ефраимил къавмалдаса – Нунил вас Гьошеа;
10Буняминил къавмалдаса – Рафул вас Палти;
11Зевулунил къавмалдаса – Содил вас Гьадиэл;
12Юсупил къавмалдаса, гьесул вас Манассил наслуялдаса – Сусийил вас Гьадий;
13Данил къавмалдаса – Гемалийил вас Аммиэл;
14Ашерил къавмалдаса – МикагӀилил вас Сетур;
15Нафталил къавмалдаса – Вафсил вас Нахби;
16Гадил къавмалдаса – Махил вас Геуэл.
17Гьел руго Мусаца ракьазул цӀех-рех гьабизе ритӀарал гӀадамазул цӀарал. Нунил вас Гьошеае#13:17 Гьошеа – «Хвасарлъи». Мусаца хисун Егьошуа#13:17 Егьошуа – «БЕТӀЕРГЬАНАС хвасар гьарула». абураб цӀар кьуна.
18Ханааналъул цӀех-рех гьабизе гьел ритӀулаго Мусаца абуна:
«Нуж Негев къотӀун мугӀрул-щобазде а!
19Халгьабе кинаб ракь гьеб бугебали. Лъазабе кинаб халкъалъ гьениб гӀумру гьабун бугебали: къуватабищ, загӀипабищ гьеб бугеб, дагьал чагӀийищ, ялъуни кӀудияб гӀаламищ гьезул бугеб? 20Гьеб халкъалъ гӀумру гьабулеб ракь кинаб бугеб: гьарзаябищ, мукъсанабищ? Кинал ругел гьезул шагьарал: чадразухъищ гьез гӀумру гьабулеб бугеб, яги сверун къадалги рарал щула гьарурал шагьаразухъищ? 21Кинаб ракь бугеб гьениб, беэнабищ яги хъарцинабищ? Ругищ гьенир гъутӀби, гьечӀищ? Нуж сункьаго хӀинкъуге, гьеб ракьалъул пихъги босе». (ЦӀибил барщулеб заман щун букӀана.)
22Гьел ана ва гьеб ракьалъул хал-шал гьабуна, Цин абураб салул авлахъалдаса бахъараб, битӀахъе Лево-Хаматалда аскӀоб бугеб Реховалде щвезегӀан. 23Негевги нахъа тун гьел щвана Хевроналде; Анакил наслуялъул АхӀиманицаги, Шешайицаги, Талмайицаги гӀумру гьабулеб букӀана гьениб. (Хеврон букӀана Мисриялъул шагьар Цоаналдаса анкьго соналъ цебе бараб шагьар.) 24Эшкол абураб расалъиялде щведал, гьез цо цӀолбол хьоп тӀад бугеб гъабуялъул гӀаркьел къотӀана ва, гӀералдаги бан, гьезул кӀигояс баччана гьеб; гьединго соноги инжирги босана гьениса. 25Гьеб бакӀалда цӀар лъуна Эшколалъул#13:25 Эшкол – «ЦӀолбол Хьоп». расалъи абун, щайгурелъул гьениса гӀизраилаз цӀолбол хьоп къотӀун букӀун. 26КӀикъого къоялдасан гьел сапаралдаса тӀадруссана.
27Ва гьел рачӀана Паран абураб салул авлахъалда бугеб Кадешалде – Мусахъеги, Гьарунихъеги, гӀизраилазул жамагӀаталъухъеги. Гьениб гьездаги халкъалдаги цебе гьез бихьа-таралъул якъинаб баян кьуна ва гьениса босун бачӀараб пихъ бихьизабуна. 28Гьез Мусада абуна:
«Ниж ана дуца ритӀараб ракьалде: хӀакъикъаталдаги, рахьги гьоцӀоги чвахулеб ракь бугоан доб! Гьале гьениса пихъ. 29Амма доба гӀумру гьабулеб халкъ цӀакъ къуватаб буго, гьезул шагьаралги щула гьарурал ва цӀакъго кӀудиял руго. Нижеда дора Анакил наслабицин рихьана! 30Амалекияз гӀумру гьабулеб буго Негевалда, хитиязги, евусиязги, амориязги – мугӀрузда, ханаанияз – ралъдал рагӀаллъиялдаги Иордан гӀурул рагӀаллъиялдаги».
31Халевица хӀалбихьана Мусада цебе халкъ гӀодобуссинабизе ва гьес абуна:
«Рилълъа гьеб ракь кверде босизе! Нилъехъа бажарилагурищ гьеб!»
32Амма гьесда цадахъ рукӀараз абуна:
«Нилъехъа бажаруларо доб халкъгун рагъизе – доб нилъедаса къуватаб халкъ буго», – ян.
33Жидедаго бихьараб ракьалъул рахъалъ халкъалда гьоркьор квешал харбал тӀиритӀизаризе лъугьана гьел:
«Гьениб гӀумру гьабизе рачӀарал чагӀи кваналеб ракь буго гьеб. Нижеда гьенир рихьарал киналго гӀадамал рукӀана нартал гӀадал чӀахӀиял. 34Нижеда гьенир нефилималги рихьана (Анакил наслаби Нефилимидасан лъугьарал ккола). Гьезда аскӀор ниж нижедаго гарцӀалин кколел рукӀана ва гьездаги ниж гарцӀаллъун рихьулел рукӀана».
Currently Selected:
Тархал 13: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
