Тархал 15
15
Къурбаназул хӀакъалъулъ амраби
1БЕТӀЕРГЬАНАС Мусада абуна:
2«ГӀизраилазда лъазабе: „Дица нужее ватӀанлъун кьураб ракьалде щвараб мехалда, 3ва нужеца БЕТӀЕРГЬАНАСЕ гӀи-боцӀиялдаса къурбан гьабулеб мехалда – тӀубан бухӀулеб къурбан, назруялъул къурбан, ракълил къурбан яги бокьараб хирияб байрам кӀодо гьабиялда хурхараб къурбан – ва нужеца БЕТӀЕРГЬАНАСЕ цӀадул къурбаналъул гьуинаб махӀ бахъинабулеб мехалда, 4гьелда цадахъго ролъул хирияб садакъаги букӀине ккола: зайтуналъул нахул гиналъул ункъго бутӀа гьабун цо бутӀаги#15:4 Гин – 3,5 литра. гъорлъ жубараб, ефаялъул анцӀго бутӀа гьабун цо бутӀа#15:4 Ефа – 22 литра. бищун лъикӀаб ханждал. 5ТӀубанго бухӀулеб къурбаналъе яги батӀияб къурбаналъе бачӀунеб щибаб кьегӀералда цадахъ гьединго бачӀине ккола гиналъул ункъго бутӀа гьабун цо бутӀа#15:5 ГӀага-шагарго 1 литра. чагъиралъулги.
6Куялда цадахъ бачӀине ккола гиналъул лъабго бутӀа гьабун цо бутӀа зайтуналъул нахги жубараб, ефаялъул анцӀго бутӀа гьабун кӀиго бутӀа бищун лъикӀаб ханждал ва 7гиналъул лъабго бутӀа гьабун цо бутӀа чагъирги. Гьеб букӀине буго БЕТӀЕРГЬАНАСЕ хирияб махӀ бахъинабиялъе.
8БЕТӀЕРГЬАНАСЕ баси къурбанлъун гьабулеб бугони – тӀубан бухӀулеб къурбан, яги назруялъул къурбан, яги ракълил къурбан – 9гьелда цадахъ букӀине ккола ролъул хирияб садакъа: бащдаб гин зайтуналъул нахги гъорлъ жубараб, ефаялъул анцӀго бутӀа гьабун лъабго бутӀа бищун лъикӀаб ханждал. 10Къурбан-бакӀалда тӀаде тӀезе чагъиралъул бащдаб гинги букӀине ккола. Гьеб букӀина цӀадудалъун БЕТӀЕРГЬАНАСЕ гӀоло кьолеб садакъа, Гьесие хирияб буго гьелъул махӀ. 11Гьедин гьабизе ккола къурбаналъе бачӀунеб щибаб басигун, куйгун, кьегӀергун яги бурутӀгун цадахъ. 12Къурбаназул къадар кинаб букӀаниги, щибаб къурбаналъе гьедин гьабе.
13ГӀизраилил халкъалъул щивав чияс гьедин гьабизе ккола, БЕТӀЕРГЬАНАСЕ гӀоло хириял садакъаби гьарулаго ва къурбан бухӀиялдалъун Гьесие хирияб махӀ бахъинабулаго. 14Чияр ракьалдаса вачӀарав ва нужеда гъорлъ гӀумру гьабулев цогидав чиясе бокьани БЕТӀЕРГЬАНАСЕ хирияб махӀ бахъинабизелъун цӀадул къурбан гьабизе, гьесги кинабго гьабизе ккола нужецаго гӀадин. 15Нужееги нужеда цадахъ гӀумру гьабулел чияр ракьаздаса гӀадамазеги цо къанун букӀине ккола. Гьединаб буго рукӀинесел наслабазеги даимаб амру. Нужги къватӀиса рачӀарал гӀадамалги БЕТӀЕРГЬАНАСДА цере ращадал руго. 16Нужееги нужеда цадахъ гӀумру гьабулел чияр халкъазул гӀадамазеги – цо къанун ва цо низам“».
17БЕТӀЕРГЬАНАС Мусада абуна:
18«ГӀизраилазда гьадин абе: „Дица рачунел ругеб ракьалде нуж щваралго 19ва нужеца гьелъул нигӀмат кваналаго, гьелдаса бутӀа БЕТӀЕРГЬАНАСЕ хирияб садакъалъун кье. 20ТӀоцебе ххараб ханждал гьабураб чед хирияб садакъалъун кьезе ккола; гьеб щвезабе гьоцӀиб лал рехулеб мехалъ кьолеб хирияб садакъа хӀисабалда. 21ТӀоцебе ххараб ханждал хирияб садакъа киналго рукӀинесел наслабаз БЕТӀЕРГЬАНАСУЛ Рокъобе кьезе ккола даимго.
РакӀалда гьечӀого ккараб мунагьалъухъ къурбан
22БЕТӀЕРГЬАНАС Мусаде гьарурал амраби нагагь нужехъа тӀуразаричӀого хутӀани, 23БЕТӀЕРГЬАНАС Мусадасан тӀалаб гьарурал киналго амрабиги хӀисабалде росун – БЕТӀЕРГЬАНАС тӀоцебе амру гьабураб къоялдаса бахъараб – гьанжеги нужер хадусел гӀелазги гьадин гьабе. 24Гьеб халкъалъухъа лъачӀого ккараб гъалатӀ батани, тӀолго жамагӀаталъул рахъалдасан тӀубан бухӀулеб ва БЕТӀЕРГЬАНАСЕ хирияб махӀ бахъинабулеб къурбаналъе кьезе ккола баси, ва гьелда цадахъ букӀине ккола ролъул садакъаги, къурбан-бакӀалда тӀаде тӀолеб жоги. Мунагь чуриялъул къурбаналъе цо дегӀенги хъвезе ккола. 25Биччанте кашишас тӀобитӀизе ГӀизраилалъул тӀолго жамагӀаталъул мунагь чуриялъул къурбан, халкъ мунагьалдаса бацӀцӀалъизе букӀине, щайгурелъул гьеб халкъалъухъа лъачӀого ккараб гъалатӀлъидал букӀараб; гьеб гъалатӀалъухъ халкъалъ БЕТӀЕРГЬАНАСЕ къурбанги гьелда цадахъ кьезе кколел садакъабиги кьела, БЕТӀЕРГЬАНАСДА цебе мунагь чуриялъул къурбанги хъвела. 26ГӀизраилалъул тӀолабго халкъалъулги ва гьезда гьоркьор ругел чияр халкъазул гӀадамазулги мунагьалдаса Аллагь тӀасалъугьина, щайгурелъул халкъалъухъа лъачӀого ккараб мунагь букӀиндал гьеб.
27Гьединаб мунагь цо чияс гьабун бугони, мунагь чуриялъул къурбаналъе гьес кьезе ккола лъагӀараб цӀцӀе. 28Кашишас БЕТӀЕРГЬАНАСДА цебе тӀобитӀила тохлъукье мунагьалъукье ккарав чи вацӀцӀалъиялъе къурбан, ва гьесул мунагьаздаса тӀаса лъугьина. 29Цого низам букӀине ккола тохлъукье мунагь гьабурав щивав чиясе – гӀизраиласеги чияр халкъалъул чиясеги.
30Амма цониги чияс – гӀизраилав вукӀа, гочун вачӀарав вукӀа – ургъунго мунагь гьабуни, гьеб ккола БЕТӀЕРГЬАН хӀакъир гьави; гьединав чи халкъалда гьоркьов тезе бегьуларо, нахъе гъезе ккола. 31Гьес БЕТӀЕРГЬАНАСУЛ рагӀул сан гьабичӀо, гьес Гьесул амру хвезабуна: гьев чара гьечӀого, халкъалда гьоркьоса вачахъизе ккола – гьесие жаза гьабизе ккола“».
Шаматкъоялъул адаб тарасе тамихӀ
32ГӀизраилал салул авлахъалда рукӀаго, гьезда вихьана цо чи шаматкъоялъ цӀул бакӀарулев. 33Гьедин гьев вихьарал гӀадамаз гьев вачана Мусахъеги, Гьарунихъеги, тӀолабго жамагӀаталъухъеги. 34Гьев жанив тӀамуна, хъаравулзабиги тана, щайгурелъул лъалеб букӀинчӀо щиб гьесие гьабилебали. 35Гьебмехалда БЕТӀЕРГЬАНАС Мусада абуна:
«Гьев чи чӀвазе ккола. Биччанте тӀолабго халкъалъ, халкъ рещтӀараб бакӀалдаса къватӀивеги вачун, гьев ганчӀица чӀвазе». 36Цинги халкъалъ гьев, халкъ чӀараб бакӀалдаса довегӀанги вачун, БЕТӀЕРГЬАНАС Мусаде гьабураб амруялда рекъон, ганчӀица чӀвана.
РатӀлида гӀертелал раялъул хӀакъалъулъ
37БЕТӀЕРГЬАНАС Мусада абуна:
38«ГӀизраилазда гьадин абе: „Куназул гӀертелал рукъе нужерго ратӀлил ахада, щибаб гӀертелалде канчӀхъахӀилаб кьералъул кунги жубай. РукӀинесел гӀелазги даим гьедин гьабизе ккола. 39Гьел гӀертелазухъ балагьун, нужеда ракӀалде щвела БЕТӀЕРГЬАНАСУЛ киналго амраби ва, напсалъги беразги тӀалаб гьабулелда хадур инчӀого, нужеца гьел амраби тӀуразарила. 40Цинги нужеда кӀочон теларо Дир амраби; нуж гьезда рекъон хьвадила ва Аллагьасда цере рацӀцӀадаллъун рукӀина. 41Дун вуго Мисриялдаса нуж къватӀире рачарав нужер БЕТӀЕРГЬАН Аллагь. Дун вуго БЕТӀЕРГЬАН – нужер Аллагь!“»
Currently Selected:
Тархал 15: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
