Байбихьи 32
32
ГӀисавида дандчӀвазе Якъуб хӀадурлъи
1Гьедин нухда унаго, Аллагьасул малаикзаби данде ккана Якъубида. 2Гьел рихьидал, Якъубица абуна:
«Аллагьасул боялъ урду чӀвараб бакӀ бихьула гьаб!» – ин. Ва гьеб бакӀалда цӀар лъуна Маханаим#32:2 Маханаим – «КӀиго урду». абун.
3Жиндирго вац ГӀисавихъе Эдомалъул улкаялде, Сеиралъул ракьалде, чапарзаби цере ритӀана Якъубица, 4жиндир бетӀергьан ГӀисавида гьадин абейилан тӀадкъайгун:
«Дур лагъ Якъубица гьадин абулеб буго: гьанжелъизегӀан Лаванида аскӀоб гӀумру гьабуна дица. 5Гьанже дир руго оцалги, хӀамулги, гӀи-цӀаниги, лагъзалги, гъаравашалги. Дица битӀулеб буго духъе – дирго бетӀергьанасухъе – гьаб хабар, дидехун дур ракӀ лъикӀлъилилан хьулгун».
6ТӀадруссун рачӀун, чапарзабаз Якъубида абуна:
«Ниж дур вац ГӀисавихъе щвана. Гьанже ункънусго чигун цадахъ, дуда данде вачӀунев вуго дов».
7Гьебмехалъ кӀудияб хӀинкъи рещтӀана Якъубил рекӀелъе. Ургъалабаз чӀвалев гьес жиндирго гӀадамалги, гӀи-боцӀиги, варанабиги кӀийиде рикьана ва кӀиго батӀияб бакӀалда чӀезаруна.
8«Цо къавуде ГӀисав тӀаде кӀанцӀани, – ян пикру гьабуна Якъубица, – цогидаб къавуда ругелалгӀаги лъутун рорчӀила». 9Цинги Якъубица дугӀа гьабуна:
«Я хирияв Аллагь – дир кӀудияв эмен Ибрагьимилги дир эмен ИсхӀакъилги Аллагь! Рокъове гӀагарлъиялъухъе тӀадвуссайилан дие амру гьабурав ва дие хӀалае вахъине рагӀи кьурав БЕТӀЕРГЬАН! 10Нахъаса къотӀичӀого Дуца диде – Дурго лагъасде – рещтӀинабураб баракаталъеги Дур рахӀмуялъеги мустахӀикъав гьечӀо дун. Гьаб Иордан гӀор бахараб мехалъ, дир хъатикь гӀанса гурони букӀинчӀо, гьанже дир кӀиго къавуялъе гӀураб гӀи-боцӀи буго. 11Гьарула Дуда, дир вац ГӀисавидаса хвасар гьаве дун! Дун хӀинкъун вуго, вачӀун гьес руччабигун, лъималгун цадахъ, ниж киналго гъурилилан. 12Дуца дие рагӀи кьун букӀиндал дида баракат лъелилан ва ралъдал салигӀанги гӀемер наслаби дидасан лъугьинарилилан!»
13Якъубица сордо гьениб бана. Ва ГӀисавие сайгъаталъе кьезе, жиндирго рехъабалъа тӀаса рищун, ратӀа гьаруна: 14кӀинусго цӀцӀе, къого дегӀен, кӀинусго чахъу, къого куй, 15лъеберго бечӀчӀулеб варани ва гьезул тӀанчӀи, кӀикъого гӀака, анцӀго оц, къого цӀухӀама ва анцӀго бихьинхӀама. 16Гьес гьел лагъзадерида цере гъуна, щибаб рехъадуй цо-цо вехь кколеб хӀалалъ, цинги гьезда абуна:
«Гьанже нуж цере-цере а, цоцазда гьоркьоб манзилги тун. 17Дир вац ГӀисав дандчӀвараб мехалъ, – ин абуна Якъубица бищунго цеве витӀулев вугев вехьасда, – дос дуда гьикъила: „Мун лъил лагъ? Киве унев чи? Гьаб дуда цебе бугеб боцӀи лъил?“ – абун. 18Дуца жаваб кье: „Дур лагъ Якъубил боцӀи буго гьаб, гьес жиндирго бетӀергьан ГӀисавие сайгъаталъе битӀараб. Живго Якъубги хаду-хадув вачӀунев вуго“, – ян».
19Гьелго рагӀаби абейин ГӀисавидаян амру гьабуна Якъубица кӀиабилев вехьасдеги, лъабабилесдеги ва цогидаздеги.
20«Чара гьечӀого тӀаде жубай: „Дур лагъ Якъубги хаду-хадув вачӀунев вуго“», – ян лъазабуна гьес гӀухьбузда.
Гьедин цере ритӀарал сайгъатаз ГӀисав жиндаго гурхӀизавилародаян хьул букӀана Якъубил. «Цинги дунгоги гьесда аскӀове щвараб мехалъ, дида лъикӀаб дандчӀвай гьабизеги бегьула гьес», – ян пикру гьабуна Якъубица.
21Гьедин, сайгъаталги цере ритӀун, Якъуб жиндирго къайи чӀвараб бакӀалда сордо базе чӀана.
Якъубие цӀияб цӀар кьей
22Гьеб сордоялъ Якъубица кӀияйго лъадиги, кӀияйго гъаравашги, анцӀила цо васги тӀаде рахъинаруна ва гьезда Яббок гӀор бахинабуна. 23Гьел киналго гьес гӀурул доб цояб рагӀалде щвезаруна, жиндирго кинабго бечелъигун цадахъ. 24Живго гьаб рахъалда чӀана.
Ва цо Щивалиго къеркьезе лъугьана гьавгун – тӀубараб сордо ана гьедин. 25Якъуб къуркьизавизе кӀолев гьечӀолъи бихьун, Гьев гьесул мачӀалда хъвана ва ракьаялдаса щекӀ батӀалъизабуна. 26Цинги гьес Якъубида абуна:
«Дун виччанте, хъахӀлъи балеб бугин».
«Дие баракат кьечӀого виччаларо», – ян жаваб кьуна Якъубица.
27«Дуда цӀар щиб?» – ан гьикъана гьес.
«Якъуб буго».
Цинги гьес абуна:
28«Гьанжеялдаса хадуб мун Якъуб гуро, ГӀизраил#32:28 ГӀизраил – жугьутӀазул мацӀалда гьаб цӀаралъул магӀна буго «Аллагь къеркьана» яги «Аллагьгун къеркьана» абураб. вуго. Аллагьгунги гӀадамалгунги къеркьон бергьиндалха мун».
29«Дур цӀарги бицеха дида», – ян гьарана Якъубица.
«Дир цӀар лъан щай дуе?» – ян жаваб кьуна гьес.
Цинги Гьес Якъубида баракат лъуна.
30Гьеб иш ккараб бакӀалда цӀар Пени-Эл#32:30 Пени-Эл – «Аллагьасул гьумер». лъуна Якъубица. «Гьанив дида гьумер дандбитӀун Аллагь вихьана ва чӀаго хутӀана», – ян абуна гьес#32:30 НекӀсияб КъотӀиялда рекъон, Аллагьасул гьумер бихьарав чи чӀаго хутӀулароан..
31Бакъ баккулеб букӀана Якъуб Пени-Элалдаса нахъе унеб мехалъ; ва гьев рекъдулев вукӀана.
32(Гьединлъидал ГӀизраилил наслабазул гӀадамаз гӀи-боцӀул мачӀалзул гьан кунаро: Дов хъвайдалха Якъубил мачӀалда.)
Currently Selected:
Байбихьи 32: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
