Байбихьи 31

Якъуб Лаванида аскӀоса лъути

1Жиндир хӀакъалъулъ Лаванил васаз гьадин абулеб букӀин рагӀана Якъубида:

«Нилъер инсул букӀарабщинаб бечелъи кверде босанагури Якъубица. Инсул боцӀи-рикъзиялдалъун бечелъарав чи вуго дов!»

2Якъубида жиндагоги бихьулеб букӀана доб цебе гӀадаб гьуинлъи-гьоркьоблъи Лаванил жиндехун гьечӀеблъи. 3Цинги БЕТӀЕРГЬАНАС Якъубида абуна:

«Дурго умумузул ракьалде ва дурго гӀагарлъиялъухъе тӀад вусса: Дица дуе кумек гьабила».

4Якъубица Рахелидеги Леядеги ругьел битӀана рехъаби кваналеб гӀалахалде рачӀайилан. 5Цинги гьес гьезда абуна:

«Нужер эмен гьанже дихъ цеве гӀадин валагьулев гьечӀевлъи бихьулеб буго дида. Амма дир инсуца гӀибадат гьабулев Аллагьас дун рехун течӀо. 6Нужеда лъала, рухӀги жанги кьун хӀалтӀана дун нужер инсуда цеве, 7амма гьес дун гуккана, ва дие бихьизабураб мухьги чамалиго нухалъ хисизабуна. ГӀицӀго Аллагьас биччачӀо гьес дие квешлъи гьабизе. 8Нужер инсуца дида абуни тӀанкӀал ругел дуе мухьалъе кьелилан, кинабго тӀинчӀ тӀанкӀал ругеб лъугьунаан. Чаралщинал дуе мухьалъе кьелилан гьес абураб мехалда, кинабго тӀинчӀ чараб лъугьунаан. 9Гьеле гьедин, нужер инсухъаги рахъун, Аллагьас дие кьуна рехъаби.

10Цо нухалда гӀи данде биччараб заманалда макьу бихьана дида. Гьеб макьилъ цӀцӀаналъе риччарал киналго дугӀби тӀанкӀал ругел яги чарал рукӀана.

11„Якъуб“, – ин ахӀана макьилъ Аллагьасул малаикас диде. „Я“, – абун жаваб кьуна дица. 12Цинги гьес дида абуна:

„Рихьулищ, цӀцӀаназде кӀанцӀулел ругел киналго дугӀби руго, я тӀанкӀал ругел, яги чарал. Дида бихьулеб буго Лаваница дуе гьабурабщинаб! 13Дун вуго, доба Бет-Эелалда эхетараб ганчӀиде зайтуналъул нахги тӀун, мун Дие гьедарав Аллагь. Гьанже гьаб улкаялдаса нахъе а мун – дурго гӀагараб ракьалде тӀадвусса“, – ян».

14Гьебмехалъ Рахелицаги Леяцаги Якъубида абуна:

«Инсул мулкалдасан нижее кинабгӀаги бутӀа бугебищ? 15Чияр чагӀаздехун гӀадаб гуребищ гьесул нижедехун бербалагьи бугеб? Гьес ричана ниж ва нижее кьезе кколеб букӀарабги жинцаго кванана. 16Гьайгьай, Аллагьас нижер инсухъа бахъарабщинаб боцӀи-бечелъиялъул бетӀергьаби руго нилъги нилъер лъималги. Гьединлъидал, Аллагьас дуда абухъе гьабе».

17Якъубица лъималги лъудбиги варанабазда рекӀинаруна ва, 18жиндирго Паддан-Арамалда щвараб кинабго бечелъиги бакӀа-бахарун, гӀи-боцӀул рехъабиги цере къотӀун, жиндирго эмен ИсхӀакъихъе Ханааналде ине, нухда вахъана. 19Гьеб заманалда Лаван рокъов вукӀинчӀо, гӀи къунцӀизе ун вукӀана. Рахелицайин абуни, инсул рукӀарал рукъалъул аллагьзаби рикъана. 20Гьедин арамеяв Лаванги тохлъизавун, щибниги гьесдаги абичӀого, ана Якъуб, 21жиндиего щвараб кинабго боцӀи-рикъзиги босун. Ефрат гӀорги бахун, ГилгӀадалъул мугӀруздехун валагьун къокъана гьев.

Лаван Якъубида хадув гӀунтӀи

22Лъабабилеб къоялъ Лаванихъе хабар щвана Якъуб нахъе ун вугилан. 23Жиндирго гӀагарал чагӀиги рачун, Лаван Якъубида хадув лъугьана ва анкьго къоялдасан, ГилгӀадалъул мугӀрузда, гьесда хадув гӀунтӀана. 24Гьеб сордоялъ макьилъ Аллагьас арамеяв Лаванида абуна:

«Воре, дуца Якъубида, я лъикӀаб, я квешаб – щибниги абуге!» – ян.

25Лаван гьанже Якъуб вугеб бакӀалде гӀагарлъун вукӀана. Якъуб ГилгӀадалъул мугӀрузда рещтӀун вукӀана. Гьесда гӀагарлъухъ Лаванги чӀана жиндирго чагӀигун цадахъ. 26Лаваница Якъубиде ахӀана:

«Дуца гьабураб щиб? Дуца гукканагури дун! Рагъда асирлъуде росарал чагӀи гӀадин, дир ясал хъамулел руго дуца. 27Дидаса балъго щай мун арав, щибниги дида цӀарги бахъичӀого? КӀудияб рохалида, жергъен кӀутӀун, бакънал рачун, аваданал кучӀдулги ахӀулаго тӀовитӀилаангури дица мун. 28Дир ясазулгун ва гьезул лъималазулгун къо-лъикӀ гьабизецин рес кьечӀо дуца дие! ГӀантаб жойин дуца гьабураб. 29Дица гьелъухъ лъикӀго рецӀел босилаан дудаса, амма нолъ дур инсул Аллагьас абуна дида: „Воре, дуца Якъубие щибниги гьабуге!“ – ян.

30Гьа, гьанже ун вуго мун, – ин кӀалъана нахъеги Лаван. – Мун дида аскӀоса нахъе ун ватизе бегьула дурго инсул рокъобе ракӀщун букӀун. Амма дир аллагьзаби щай рикъарал дуца?»

31«ХӀинкъун вукӀана дун, дуца хӀал гьабун дурго ясал дихъа нахъе рачинилан ракӀалдеги ккун, – ин жаваб кьуна Лавание Якъубица. 32– Амма дур аллагьзаби кодор ратарав чиясе гӀумру букӀине гьечӀо! НугӀлъиялъе гьел нилъер гӀагарал чагӀиги чӀезарун, чӀухь бай дир гьаниб бугебщиналъул: мун бетӀергьанаб жо батани, нахъе босе!»

(Якъубида лъалеб букӀинчӀо гьел аллагьзаби Рахелица рикъун рукӀин.)

33Лаваница чӀухь бана Якъубил, Леял ва кӀияйго гъаравашалъул чадразухъ, амма щибниги батичӀо гьениб. Леял чадиралъуса Рахелил чадиралъуве вилълъана гьев. 34Рахелица гьел рукъалъул аллагьзаби варанидул кьолода жанир рахчана, жийгоги гьелда тӀад гӀодой чӀана. Инсуца гьелъул чадиралъубги чӀухь бана, амма щибго батичӀо. 35Рахелица гьесда абуна:

«Дур дида ццин бахъуге, дир эмен. Дуда цее яхъун чӀезе бегьулеб хӀал гьечӀо дир: руччабазул букӀунеб гӀузру-хӀайиз лъугьун буго».

Лаваница кинабго бега-битӀана, амма аллагьзаби ратичӀо. 36Гьанже Якъубил кутакалда ццин бахъана Лаванида ва, гьесда кӀалгьикъизе лъугьана:

«Щай мун дида хадув лъугьарав: щиб гӀайиб букӀун, щиб такъсир букӀун? 37Дуца дир кинабго къайи бега-битӀана – мун бетӀергьанаб жо щибха дуда гьениб батараб? Бихьизабе дурго, дур гӀагарал чагӀаз нилъее диван къотӀизе.

38Къого соналъ хӀалтӀана дун дуда цеве. Цониги чахъдаца яги цӀцӀеца тӀинчӀ рехизе биччачӀого, вехьлъи гьабуна. Дур рехъалъа куйдул хъун гьанги дица кваначӀо. 39Нагагь рехъалъ хъумур речӀчӀун чахъу-цӀцӀе чӀвани, гьебги босун дуда аскӀове вачӀинчӀо, дицаго бецӀана. Къад тӀагӀаралъухъги къаси бикъаралъухъги рецӀел тӀалаб гьабуна дуца дидаса. 40Къад бакъуца воркьулаан, къаси квачалъ гӀазаб кьун, бер данде бачунароан. 41Къого сон ана гьедин дуда аскӀоб. АнцӀила ункъго соналъ хӀалтӀана дур ясазе хъалималъе, анлъго соналъ диего гӀи гӀезабизеги хӀалтӀана. АнцӀго нухалъ хис-хисизабуна дуца дие бихьизабураб мухьги. 42Дир инсулги Ибрагьимилги Аллагьас – ИсхӀакъ жиндикьа хӀинкъулев Аллагьас – дие кумек гьабичӀебани, дуца дун чӀового нахъе витӀилаан. Амма Аллагьасда бихьана дица хӀехьараб къварилъиги баччараб захӀматги. Живго Аллагь вахъана нолъ дие хӀалае!»

43Лаваница Якъубида абуна:

«Гьал руччабиги дир ясал руго, лъималги – дир лъималазул лъимал, гьал рехъабиги – дир, гьаб кинабго дур берда цебе бугеб бечелъиги – дир. Дирго ясалги гьезул лъималги дица къварид гьарилищ? 44Гьединлъидал рачӀа нилъеца къотӀи-къай гьабизе, гьелъие нугӀги букӀине биччанте».

45Гьебмехалда Якъубица цо кӀудияб гамачӀ бахъун чӀезабуна 46ва ганчӀал ракӀареян абуна жиндирго гӀагарал чагӀазда.

Гьез ракӀарун ганчӀазул гохӀ лъугьинабуна ва гьелда аскӀоб кваназе гӀодор чӀезе бакӀги къачӀана. 47Лаваница гьеб гохӀалда цӀар лъуна Егар-Сахадута, Якъубица лъуна – Гал-Эд#31:47 Егар-Сахадута – арамеязул мацӀалда гьелъул магӀна буго «НугӀлъиялъул гохӀ». Гал-Эд – жугьутӀ мацӀалда гьебго магӀнаялъул цӀар..

48Лаваница абуна:

«Нилъер къотӀиялъул нугӀ буго гьаб гохӀ», – ин.

Гьединлъидал гьеб гохӀалда цӀар буго Гал-Эд. 49Цогидаб цӀар буго Мицпа#31:49 Мицпа – «Халкколеб си». – гьениб Лаваница гьадин абидалха:

«Цоцаздаса нилъ ратӀалъараб ва рикӀкӀалъараб мехалъ, биччанте БЕТӀЕРГЬАНАС нилъеда хадуб хал кквезе. 50Дуца дир ясал къварид гьаруни яги гьазда тӀаде лъудби рачани, дуда лъан букӀа: инсан гурев, Аллагь вукӀина нилъее нугӀлъун!»

51Цинги Лаваница Якъубида абуна:

«Гьаб ганчӀазул гохӀалъухъги, нилъеда гьоркьоб дица бахъун чӀезабураб ганчӀихъги валагье; 52гьел руго нилъер къотӀиялъул нугӀзал. Квешаб къасдгун дун вачӀинаро, гьаб гохӀги бахун, дур рахъалдехун, мунги квешаб къасдгун вачӀунге, гьаб гохӀги мукъадасаб гамачӀги бахун, дир рахъалдехун. 53Биччанте Ибрагьимилги, Нахорилги, гьезул инсулги Аллагьас диван къотӀизе нилъеда гьоркьоб».

Гьебмехалъ Якъуб гьедана жиндирго эмен ИсхӀакъ хӀинкъулев Аллагьасул цӀарги бахъун. 54Хадуб Якъубица гьениб магӀарда къурбан хъуна ва кинабго гӀагарлъи кваназе ахӀана. Квананги рахъун, сордо базе гьенир чӀана гьел. 55Радал Лаваница жиндирго ясазулгун ва гьезул лъималазулгун къо-лъикӀ гьабуна. Гьезие баракатги гьарун, гьезда убачал гьаруна ва рокъове нахъвуссун ана.

Currently Selected:

Байбихьи 31: АварАК

Highlight

Copy