Байбихьи 33
33
Якъубги ГӀисавги дандчӀвай
1Цеве валагьидал, Якъубида рикӀкӀадасанго ГӀисав вихьана жинда данде вачӀунев, ункънусго чигун цадахъ. Якъубица Леялги, Рахелилги ва кӀияйго гъаравашалъулги лъималазда лъазабуна жидерго улбузда аскӀор рахъун чӀаян. 2Гьадин чӀезаруна гьес гьел: бищунго цере – гъаравашалги гьезул лъималги, гьезда нахъа – Леяги гьелъул лъималги, гьездаги нахъа – Рахелги Юсупги. 3Живго Якъуб цеве вачӀана ва, вацасде гӀагарлъилалде, анкьго нухалъ къулана гьесие, гӀодоб нодоги цун. 4Амма ГӀисав гьесда аскӀове кӀанцӀун вачӀана, къвалги бан, каранде къана ва убач гьабуна. Цинги кӀиялго гӀодана. 5Руччабиги лъималги рихьидал, ГӀисавица гьикъана:
«Гьал киналго щал дуе кколел?» – ин.
Якъубица жаваб кьуна:
«Дур лагъасе, Аллагьас цӀоб лъун, гьарурал лъимал руго гьал».
6Гъаравашал жидерго лъималгун цадахъ цере рачӀана ва ГӀисавие къулана. 7Цинги, жиндирго лъималги рачун, Лея аскӀое ячӀана ва гьесда цее къулана. Бищун ахиралда Рахелги къулана гьесие Юсупгун цадахъ.
8«Дида данде ккарал гьадал рехъаби цере ритӀиялъул магӀна щиб?» – абун гьикъана ГӀисавица.
«Мун гурхӀилародайилан ритӀун рукӀана, дир бетӀергьан», – абун жаваб кьуна Якъубица.
9«ГӀунги тӀокӀаб бечелъи буго, вац, дир, – ан абуна ГӀисавица. – Дурго боцӀи дуего те».
10«Гьарула, дидехун дур ракӀ бацӀцӀадаб батани, гьал дир сайгъатал нахъчӀваге, – ян абуна Якъубица. – Мун гьедин лъикӀ дандчӀвайдал, Аллагь вихьиялда бащалъана дие гьеб. 11Гьединлъидал гьарула дуда, къабул гьаре дир сайгъатал. Аллагьас дие гӀемераб боцӀи-рикъзи кьуна, кинабго гӀунги тӀокӀалъ буго дир».
Якъубица гьара-кӀачун, ГӀисав разилъана гьесул сайгъатал росизе.
12Хадуб ГӀисавица абуна:
«Гьанже нухда рахъун лъикӀ. Дун дуда цадахъ вилълъина».
13Амма Якъубица абуна:
«Дуда лъалаха, дир бетӀергьан, лъимал загӀипал жал рукӀунеблъи. Гьединго, речӀчӀулел чахъабиги гӀачиги руго нижеда цадахъ. Кьабун гьел цере рачани, гъоб къоялъго гӀодор ккун хвела. 14Мун, дир бетӀергьан, цеве ун лъикӀ, дун – дур лагъ, боцӀиги лъималги рачун бажарулеб хӀалалъ, бигьа гьавун хадув вачӀина духъе – дир бетӀергьанасухъе – Сеиралде».
15Цинги ГӀисавица абуна:
«РачӀа дица дир гӀадамаздасан цо къокъа дуда цадахъ телин», – ан.
Амма Якъубица жаваб гьабуна:
«Щай? Дир бетӀергьан дидехун лъикӀ вукӀинги гӀун буго дие».
16Цинги, гьеб къоялъго, ГӀисав нахъвуссун Сеиралде ана. 17Якъубги Суккоталдехун валагьун ана. Гьенир гьес рана жиндиего минаги боцӀуе тӀадхъелалги. (Гьединлъидал гьеб бакӀалда цӀар буго Суккот.)#33:17 Суккот – гьаб рагӀул магӀна ккола: «Хъошал», «Чадрал», ялъуни «ТӀадхъелал».
18Паддан-Арамалдаса вахъарав Якъуб сах-саламатго щвана Ханааналда бугеб Шехем шагьаралде ва гьенив гӀагарлъухъ чӀана. 19Хаморил васазухъа, гӀарцул нусго шекелги кьун, Якъубица жиндиего ракь босана. Хамор вукӀана Шехемил эмен. 20Гьениб гьес къурбаналъе бакӀ бана ва гьелда цӀарги Эл Элогье-ГӀизраил#33:20 Эл Элогье-ГӀизраил – «Аллагь-ГӀизраилил Аллагь». абун лъуна.
Currently Selected:
Байбихьи 33: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
