Коринфиязухъе кӀиабилеб кагъат 1
1
1 бетӀер
Саламалъул рагӀаби
1МасихӀ ГӀисал чапарлъун вукӀине Аллагьас тӀаса вищарав Павелил ва диналъул вац Тимофейил салам буго Коринфалда ругел иман лъуразул агьлуялде, гьединго тӀолабго Ахаялда ругел иман лъуразул агьлуялдеги. 2Нилъер Эмен – Аллагьасул ва ТӀадегӀанав ГӀиса МасихӀил баркатги саламги лъеги нужеда.
Аллагьас нилъер ракӀбатизабула
3Нилъер ТӀадегӀанав ГӀиса МасихӀил Эмен – Аллагьасе рецц! Гьев нилъеда кидаго гурхӀула, гьес нилъер ракӀбатизабула! 4Кинаб къварилъи нилъеде бачӀаниги, Аллагьас ракӀбатизабула нилъер. Гьес нилъееги къуват кьола, – жинца нилъер ракӀбатизабулеб бугеб гӀадин, къварилъиялда ругезул нилъецаги ракӀбатизабизе. 5МасихӀие букӀараб гӀадаб гӀазаб-гӀакъуба нилъее цӀикӀкӀанагӀан, МасихӀидалъун нилъер ракӀбатизабиги цӀикӀкӀуна. 6Нижеца гӀазаб-гӀакъуба хӀехьолеб буго нужер ракӀбатизабизе ва нуж хвасарлъизе гӀоло. Нижер ракӀбатизабурас нужерги ракӀбатизабила. Нижее бугеб гӀадинаб гӀазаб-гӀакъуба нужецаги сабруялда хӀехьани, гьелъги нужер ракӀбатизабила. 7Нуж мекъи ккеларилан ракӀчӀун руго ниж. Нижее бугеб гӀазаб-гӀакъуба нужееги бугеб батани, гьелъ нужер ракӀбатизабилеблъи лъала нижеда.
8Я, вацал, Асиялда нижее букӀараб къварилъиялъул хӀакъалъулъ нужедаги лъазе бокьун буго. Баччизе кӀвеялдаса араб хӀалалде ккедал, чӀаго хутӀиялдаса хьул къотӀун букӀана. 9Къадаралде щвезехъин ругилан ккун, нижедаго божулел рукӀинчӀо, хваралъуса рахъинарулев Аллагьасде тӀамун тун букӀана. 10Гьес хвасар гьаруна ниж гьеб гӀасияб хвалдаса. Гьанжеги хвасар гьарулел руго, ва хадурги хвасар гьарилилан хьулги буго. 11Нужецаги гьари-дугӀа гьабеха, нижеда тӀадрекъон. Нилъер гьари-дугӀа цӀикӀкӀани, Аллагьасги цӀоб лъела, гӀадамаз Аллагьасе гьабулеб реццги цӀикӀкӀина.
Павелица хӀукму гьабун букӀана Коринфалде ине
12Ниж сундаса чӀухӀизе кколел? Гьаб дуниялалда ва хасго нужеда хурхарал ишазулъ ниж хьвадулел руго Аллагьасдасан рещтӀараб ракӀбацӀцӀалъигун ва муъминлъигун. Намус бацӀцӀадго абулеб буго нижеца гьедин. ГӀадамазул гӀакъиллъиялъ малъун гуро ниж гьедин хьвадулел ругел, Аллагьасул баркаталдалъунин. 13-14Кагътидасан нужеца цӀалулеб ва нужеда гьенисан бичӀчӀулеб жо гурони, батӀияб щибго ракӀалде кколаро нижеда гьеб хъвалеб мехалъ. Нижеца бицарабщиналъул цо-цо бутӀа гурони нужеда гьанжелъагӀан бичӀчӀулеб букӀинчӀеб батани, гьанже гьеб нужеда тӀубанго бичӀчӀилилан хьул буго. Ниж нужедаса чӀухӀулел гӀадин, нужги нижедаса чӀухӀила – нилъер ТӀадегӀанав ГӀиса цӀидасан рещтӀараб къоялъ.
15Гьелда ракӀги чӀун, дица хӀукму гьабун букӀана цин нужехъе вачӀинин, ва гьеб дир сапаралъул нужее кӀицӀулго пайда букӀинин. 16Дида ракӀалда букӀана Македониялде унаго нужехъе щвезе, цинги Македониялдаса нахъвуссунаго кӀиабизеги нужехъе вачӀине ва нужер кумекалдалъун Ягьудиялде ине. 17Гьедин къватӀиве вахъине къачӀалаго унго дир пикруйищха хисараб? ГӀадамазул гӀакъиллъиялъ малъунищ дица хӀукму гьабизе кколеб? Дица «уйилан» абуни, «гурилан» абураб магӀнайищха гьелъул кколеб? 18АллагьасхӀаги, нижеца нужеда абичӀо цин «уйилан», цинги «гурилан». 19Жиндир хӀакъалъулъ нижеца – дицаги, Сильваницаги, Тимофейицаги – нужеда Рохалил хабар бицарав ГӀиса МасихӀица, ай Аллагьасул Васас, киданиги абичӀо цин «уйилан», цинги «гурилан». ГӀицӀго «у» букӀана гьесулъ. 20Аллагьас рагӀи кьурабщиналъул рахъалъ гӀицӀго «у» гурищ гьесулъ батараб. Гьединлъидалин, МасихӀил цӀар рехсон Аллагь кӀодо гьавулаго, нилъеца «амин» абулеб. 21-22ГӀиса МасихӀиде цолъизарун нижги нужги къвакӀизарулев Аллагьас нилъ тӀаса рищана, абадияб гӀумруялъул гӀаламатлъун Илагьияб РухӀги нилъер ракӀазулъе рещтӀинабуна.
23АллагьасхӀагийилан ва дирго гӀумруялхӀагийилан гьедулев вуго: нужеца гьабуралда рекъараб рагӀи нужеда хӀунсизе бокьичӀогойин дун тӀокӀав Коринфалде вачӀинчӀев. 24Нужер божи-иманалда тӀад тарал хъаравулзаби гурелъулха ниж, нужер рохелалъе квербакъулел чагӀийин! Нужер божи-иманин абуни, щулалъун буго.
Currently Selected:
Коринфиязухъе кӀиабилеб кагъат 1: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
