Коринфиязухъе кӀиабилеб кагъат 2

2 бетӀер

1Дица хӀукму гьабуна, дун вачӀунилан нужее квеш кколеб батани, гьанже нужехъе вачӀинчӀого чӀезе. Нуж пашманлъизаризе бокьун гьечӀо дие. 2Нуж пашманлъизаруни, дица пашманлъизарураз гурони, лъица дун вохизавилев? 3Дица доб кагъат хъван букӀана нужехъе вачӀараб мехалъ, вохизавизе кколез дун пашманлъизавизе бокьичӀого. Дир ракӀчӀола, дун вохун вугони, нуж киналго рохизе рукӀиналда. 4Доб кагъат хъвалеб мехалъ дун цӀакъ пашманго вукӀана: ракӀги къварилъун букӀана, бераз магӀуги тӀолеб букӀана. Нуж пашманлъизаризе гуреб, нужеде бугеб дир рокьул гьарзалъи бихьизабизейин дица доб кагъат хъван букӀараб.

ГӀайиб ккарасдасаги тӀасалъугьа

5Дун пашманлъизавунилан нужеда ракӀалде ккарав чияс дун гуро пашманлъизавурав. Гьес цодагьалго пашманлъизаруна нуж киналго, гьелъул хӀакъалъулъ тӀокӀаб бицине бокьун гьечӀо дие. 6Нужер гӀемерисез гьабураб тамихӀги гӀела гьев чиясе. 7Гьанже, тӀасаги лъугьун, гьесул ракӀбатизабизе ккела нужеца, – цӀакъго пашманлъун, тату хунгутӀизе. 8Гьединлъидал дица нужеда гьарулеб буго: гьевги нужее вокьулевлъи бихьизабе гьесда. 9Нужер хӀалбихьизе ва сундулъго дие мутӀигӀал ругищалиги лъазе хъван букӀана дица доб кагъат. 10Нуж тӀасалъугьарасдаса дунги тӀасалъугьуна. Дун тӀасалъугьунев вугони (тӀасалъугьине рекъараб жоги бугони), МасихӀги нугӀлъун гьавун, тӀасалъугьуна дун – нужее пайдаялъе. 11Дица гьедин гьабула, илбисалъ нилъго гуккунгутӀизе, – гьелъул къасдал лъаларел чагӀи гурелъулха нилъ.

Павел чапарасул хъулухъ

12МасихӀил хӀакъалъулъ Рохалил хабар лъазабизе дун Троадаялде вачӀараб мехалъ, ТӀадегӀанас дие нуцӀа рагьун батана. 13Амма дир ракӀ гӀодобе биччалеб букӀинчӀо дир диналъул вац Тит гьенив ватичӀелъул. Гьединлъидал, гьенир ругезе къолъикӀги гьабун, дун Македониялде ана.

14МасихӀил бергьенлъиялъул байрамалде ниж рачунев Аллагьасе рецц! Аллагьас ниж ритӀула, махӀ гьуинаб нахул кьеккен гьабулеб гӀадин, МасихӀил хӀакъалъулъ киса-кибего лъазабизе. 15Хвасарлъулезеги холезеги ниж руго – МасихӀица Аллагьасе къурбанлъун кьеккен гьабулеб гьеб махӀ гьуинаб нах. 16Холезе ниж руго – хвалил махӀ, хвасарлъулезе ниж руго – чӀаголъиялъул гьуинаб махӀ.

Гьеб нижее бугеб тӀадкъай тӀубазабизе щал ярагьунел? 17Аллагьасул рагӀабийилан гьерсалги рицун, цогидал гӀемерисел гӀадин гӀиси-бикъинаб дармиде машгъуллъуларелъулха ниж! Аллагьасул чапарзаби ругелъул, Аллагьасда рагӀулеб бугеб гӀадин, МасихӀидеги цолъун, ракӀбацӀцӀадго бицуна нижеца Рохалил хабар.

Currently Selected:

Коринфиязухъе кӀиабилеб кагъат 2: АварАК

Highlight

Copy