Коринфиязухъе тӀоцебесеб кагъат 16

16 бетӀер

Иерусалималда бугеб иман лъуразул агьлуялъе садакъа

1Гьанже бицинин Иерусалималда бугеб иман лъуразул агьлуялъе гӀарац бакӀариялъул хӀакъалъулъ. Галатиялда бугеб иман лъуразул агьлуялда дица малъухъе гьабе нужецаги. 2Нужер щивав чияс гьатӀан къоялъ батӀаго лъун те нужее щваралда рекъон лъикӀ бихьараб гӀарац. Цинги дун вачӀараб мехалъ гьеб бакӀаризе лъугьине ккеларо. 3Дун гьениве щвейгун, гьеб нужер садакъа Иерусалималде щвезабизе ритӀила нужеца тӀаса рищарал гӀадамал ва гьезда цадахъ битӀила гьел нужер вакилзаби ругилан кагъатги. 4Дунго гьениве ине ккани, дидаго цадахъ рачина гьелги.

Павелица гьабизе бугеб сапаралъул хӀакъалъулъ

5Македониялдаса нужехъеги вачӀина дун – Македониялдасан ине ракӀалда буго дида. 6Цодагьаб мехалъ нужеда аскӀов чӀезеги бегьула, щиб лъалеб, хаселалъго гьенив хутӀизеги бегьула. Гьенисаги дица сапар бухьунеб бугони, нужеца кумек гьабизе ккела дие. 7Сапаралда вукӀаго нужехъе ваккизе вачӀине гурелъулха дие бокьун бугеб, ТӀадегӀанав разилъани, лъикӀаланго заманаялъ гьенив чӀезе хиял буго.

8БачӀин бакӀариялъул байрам тӀаде щвезегӀан чӀела дун Эфесалда. 9Пайдаяб хӀалтӀуе кӀудияб нуцӀа рагьун буго дие, дандечӀаралги гӀезегӀан руго.

10Тимофей гьениве вачӀараб мехалъ, гьениб гьесие хӀинкъи букӀунареб хӀал гьабе. Гьевги, дунго гӀадин, ТӀадегӀанасе гӀололъидалха хӀалтӀулев вугев. 11ГӀамал кӀодого ралагьуге нуж гьесухъ. Аллагьас нух битӀизабегийилан гьарун тӀадвуссун витӀе. Дунги вацалги гьев вачӀиналъухъ ралагьун чӀун руго.

12Нилъер вац Аполлосил хӀакъалъулъ бицани, дица гьесда цӀакъ гьарана вацалгун цадахъ нужехъе щвайилан, амма гьабсагӀат гьениве ине къасд гьечӀо гьесул. Рес ккараб мехалъ вачӀина гьев.

Кагътил ахиралда саламалъул рагӀаби

13РорчӀи ккве, иман щулалъизабе, бахӀарчияллъун ва къуваталлъун рукӀа. 14Нужеца гьабулебщинаб рокьигун гьабе.

15Цоги гьари буго, вацал, нужеде: Стефанасил рукъалъул агьлу Ахаялда тӀоцере МасихӀида божарал чагӀи рукӀин лъалаха нужеда. Аллагьасул халкъалъе тӀубанго хъулухъалъе чӀарал чагӀи руго гьел. 16Дица нужеда гьарила гьединал чагӀазухъги, гьезда цадахъ хӀалтӀулезухъги, хъулухъ гьабулезухъги гӀенеккейилан.

17Дун цӀакъ вохун вуго Стефанасги, Фортунатги, Ахаикги гьанире рачӀиналдаса. Нуж дие камун рукӀин лъазе биччаларо гьез дида. 18Нужер ракӀазе къвакӀи кьураб гӀадин, дир рекӀееги къвакӀи кьола гьез. Гьединал чагӀазул къимат гьабе!

19Асиялда ругел иман лъуразул агьлуялъул салам буго нужеде. Аквилалгун Прискиллал ва гьезул рокъор данделъулел иман лъуразул агьлуялъулги буго нужеде ТӀадегӀанасул цӀар рехсараб, урхъараб салам. 20Гьанир ругел киналгоги вацаз битӀулеб буго нужеде салам. Муъминал вацаз гӀадин, цоцазда баун, салам гьабе.

21Гьаб дирго квералъ хъвалеб буго: Павелил салам буго нужеде. 22ТӀадегӀанав вокьуларесе нагӀана батаги! «Марана-та!» – вачӀа, нижер ТӀадегӀанав! 23ТӀадегӀанав ГӀисал цӀоб лъеги нужеда! 24МасихӀ ГӀисаде цолъарал нуж киналго рокьула дие.

Currently Selected:

Коринфиязухъе тӀоцебесеб кагъат 16: АварАК

Highlight

Copy