Коринфиязухъе тӀоцебесеб кагъат 15
15
15 бетӀер
МасихӀ хваралъуса вахъинавичӀев ватани, нужер божи-иман гӀадада ккана
1Гьанже дица нужеда ракӀалде щвезабулеб буго, вацал, нужеда дица лъазабураб, нужецаги къабул гьабураб, нужер божи-иманалъул щулияб кьучӀлъунги бугеб Рохалил хабар. 2Гьеб дица бихьизабураб нухдаса кьуричӀого чӀани, нуж хвасарлъула. Гурони – нужер божи-иман гӀадада ккола.
3Сундасаго цебе дица нужеда бицана дицаги къабул гьабураб хабар: Хириял ТӀухьдузда хъван букӀараб ритӀухълъизе, МасихӀ хвана нилъер мунагьазе гӀоло. 4Гьев хабалъ лъуна. ТӀухьдузда хъван букӀараб ритӀухълъизе, лъабабилеб къоялъ хваралъуса вахъинавуна. 5Пётрида вихьана гьев, цинги анцӀила кӀиявго чапарасдаги вихьана. 6Цинги гьев цого заманалда вихьана щунусгоялдаса цӀикӀкӀарав вацасдаги, гьезул гӀемерисел гьабсагӀатги чӀаго руго, цо-цоял хвана. 7Цинги Якъубида вихьана, цинги киналго чапарзабаздаги вихьана. 8Гьел киназдасаго хадув гьев дидаги вихьана, мех щвечӀого гьабураб лъимада гӀадин. 9Дун вуго бищунго гьитӀинав чапар. Чапарлъун рикӀкӀине мустахӀикъав гьечӀо дун, Аллагьасде иман лъуразул агьлуялъе дица гӀазаб кьолеб букӀиндалха. 10Амма Аллагьасул баркаталдалъун гьанже дун вуго гьав нужеда вихьулев чи. ГӀадада гуро Аллагьас диде баркат рещтӀинабураб. Дол чапарзабаздасаги цӀикӀкӀун хӀалтӀана дун. Дун гуревха хӀалтӀарав, дилъ бугеб Аллагьасул баркат хӀалтӀана. 11Дол рукӀаниги, дун вукӀаниги батӀалъи щиб, нижеца гьедин бицуна Рохалил хабар, нужги гьелда божана.
12Гьедин, МасихӀ хваралъуса вахъин нижеца лъазабидалги, нужер цо-цоязда кин абизе кӀолеб хварал чӀаголъизаруларилан? 13Хварал чӀаголъизаруларел ратани, МасихӀги хваралъуса вахъинавичӀо. 14МасихӀ хваралъуса вахъинавичӀев ватани, нижеца бицараб Рохалил хабарги гӀадада ккана, нужер божи-иманги гӀадада ккана. 15Гьелда тӀадеги, нижеца Аллагьасул хӀакъалъулъ гьересинугӀлъи гьабураблъунги кколеб буго, – Аллагьас МасихӀ хваралъуса вахъинавунилан абулеб мехалъ. Амма хварал чӀаголъизаруларел ратани, МасихӀги гьес хваралъуса вахъинавичӀо. 16Хварал тӀаде рахъинаруларел ратани, МасихӀги хваралъуса вахъинавичӀо. 17МасихӀ хваралъуса вахъинавичӀев ватани, нужер божи-иман гьодораб жо буго, нужги церего гӀадин нужерго мунагьазул кверщаликь руго. 18Гьедин батани, дол МасихӀида божун хваралги тӀубанго хваралищ? 19ГӀицӀго гьаб дуниялалъул чӀаголъиялъулъ МасихӀиде хьул лъун нилъ хьвадулел ругони, бищунго гурхӀизе ккарал чагӀи руго нилъ.
20ХӀакъикъаталдаги МасихӀ хваралъуса вахъинавуна, – хваралъуса рахъинаризе рукӀиналде киназулго хьул лъеялъе гӀоло. 21Цо чи сабаблъун бачӀана хвел, цо чи сабаблъун бачӀана хваралъуса рахъинариги. 22Адамил наслу бугелъул киналго хвезе руго, МасихӀил наслулъун лъугьиндал, киналго хваралъуса рахъинаризе руго. 23Киналго иргадал чӀаголъила: бищун цеве МасихӀ, цинги гьев вачӀараб мехалъ – гьесул агьлуги. 24Цинги дуниял ахирлъила. МасихӀица къезарила тахида ругелги, кверщел бугелги, хӀакимзабилъун ругелги – киналго рухӀал, цинги Эмен – Аллагьасухъе кьела жиндирго парччахӀлъи. 25МасихӀица парччахӀлъи гьабила Аллагьас гьесул киналго тушбаби гьесул малакь чӀезаризегӀан. 26Бищунго ахиралда къезабулеб тушман ккола хвел. 27ТӀухьдузда хъван буго: «Аллагьас кинабго гьесул малакь лъуна». «Киналъулго» бицунаго, гьайгьай, гьелда гьоркьове унаро гьеб кинабго МасихӀил малакь лъурав Аллагь. 28Кинабго жиндир кверщаликье ккараб мехалъ, живго Васги вукӀина гьеб кинабго жиндир малакь лъурасул кверщаликь. Гьебмехалда киналъулго кверщел Аллагьасухъ букӀин бихьила.
29Гьеб гьереси букӀарабани, хваразе гӀологи гӀадамал лъадалъ ччун щай рахъилел рукӀарал? Хварал чӀаголъуларел ратани, гьезие гӀологи гӀадамал лъадалъ ччун щай рахъулел? 30Щай нилъ кидаго хӀинкъиялда гъоркь рукӀине ккелел? 31Щибаб къоялъ хвалил хӀинкъи буго, вацал, дие. Нилъер ТӀадегӀанав МасихӀ ГӀисада цебе нужедаса бугеб чӀухӀиялхӀагийилан гьедизе кӀвела гьедин бугилан. 32Эфесалда ругел гьал жанаваралгун гӀадамазул къагӀидаялъ вагъиялдасан дие бугеб пайда щиб, дирго напсалъул пикруялда вугони? Хварал чӀаголъулел ратичӀони, «рачӀа кваназе-гьекъезе, метер нилъ хвезе ругин». 33Нужго гуккизе чӀоге. Квешазда аскӀоре къани, лъикӀаб гӀамалалдаса ратӀалъула. 34КантӀе, тӀокӀаб мунагьги гьабуге. Нужер цо-цоязда Аллагь лъаларо. Дица гьеб абулеб буго нуж намуслъизе.
Хварал кин чӀаголъулел
35Амма цо лъицаниги гьикъизе бегьила хварал кин чӀаголъулелилан. Кинаб черхгун гьел тӀаде рахъунелилан. 36ГӀабдал вуго гьев. Дуца ракьулъ мугь чӀола, амма цин жибго хвечӀони, гьеб тӀаде баккуларо. 37Дуца ракьулъ чӀолеб жо, ролъул букӀа яги цогидалъул букӀа, гӀицӀаб мугь буго, гьелдасан лъугьунеб «черх» гуро гьеб. 38Аллагьас кьола гьелъие жинцаго тӀаса бищараб черх – хьодул щибаб тайпаялъе батӀи-батӀияб. 39Киналго чурхдул релълъарал гьечӀо: гӀадамазул батӀиял руго, хӀайваназул батӀиял руго, хӀанчӀазул батӀиял руго, ччугӀбузул батӀиял руго. 40Руго зобалазулал чурхдул, руго ракьалъулалги. Зобалазулал чурхдузул жидерго берцинлъи буго, ракьалъулал чурхдузулги жидерго берцинлъи буго. 41Бакъул батӀияб, моцӀрол батӀияб, цӀвабзазул батӀияб буго берцинлъи. Щибаб цӀваялъулгицин буго жиндирго берцинлъи.
42Гьелдаго релълъун букӀина хварал чӀаголъизариги. Ракьулъе кколебщинаб хола, тӀаде баккулебщиналъе хвел гьечӀо. 43Ракьулъе сурукъго уна, тӀаде берцинго баккула. Ракьулъе загӀипго уна, тӀаде гучалда баккула. 44Ракьулъе тӀабигӀияб черх уна, тӀаде рухӀалъ цӀураб черх баккула. ТӀабигӀияб черхги букӀуна, рухӀалъ цӀураб черхги букӀуна.
45ТӀухьдузда хъван буго: «ТӀоцевесев инсанасда – Адамида рухӀ лъуна». Ахирисев Адам#15:45 Гьаниб МасихӀил бицунеб буго. – чӀаголъи кьолеб РухӀлъун лъугьана. 46РухӀалъ цӀурабаб бачӀунаро тӀоцебе, тӀабигӀияб черх бугебаб бачӀуна. Цинги бачӀуна рухӀалъ цӀурабги. 47ТӀоцевесев Адам ракьул хӀуралдасан вижана, ракьалдаса вачӀана. КӀиабилев Адам зобалаздаса вачӀана. 48Ракьалдасан ругелал ракьалдаса вачӀарасда релълъуна. Зобалаздасан ругелал зобалаздаса вачӀарасда релълъуна. 49Ракьалдаса вачӀарасул сипат-сурат нилъелъ бугеб гӀадин, зобалаздаса вачӀарасул сипат-суратги букӀина нилъелъ. 50Дица нужеда абулеб буго, вацал, черхалъеги биялъеги Аллагьасул парччахӀлъи насиблъуларин, холебалъе холаребаб насиблъуларин.
51-52Цо балъголъи рагьила нужее: киналго гуро нилъ холел, амма ахирзаманалда ссур пураб мехалъ, бер къапизегӀан заман иналде, хиса-сверула нилъ. Ссур пула ва хварал тӀаде рахъинарула. Хвел гьечӀеллъун рахъина гьел тӀаде. Нилъги хиса-сверила. 53Турулебаб турулареблъун лъугьине ккола, холебабги холареблъун лъугьине ккола. 54Турулебаб турулареблъун лъугьараб мехалъ, холебабги холареблъун лъугьараб мехалъ ритӀухълъила ТӀухьдузда хъван бугеб гьадинаб калима: «Хвел къулчӀана, къезабуна». 55Хадубги: «Хвел, киб бугеб дур бергьенлъи! Хвел, киб бугеб дур хеч!» 56Хвалил хеч ккола мунагь. Мунагьалъе къуват Къануналдасан щола. 57Нилъер ТӀадегӀанав ГӀиса МасихӀидалъун нилъ бергьинарулев Аллагьасе рецц!
58Гьеле гьедин, дир хириял вацал, къвакӀун чӀа нуж, къуркьуге нуж. ТӀадегӀанасе гӀоло тӀадчӀун хӀалтӀе. Нужеда лъан букӀа: ТӀадегӀанасде цолъун гьабураб нужер хӀалтӀи гӀадада холаро.
Currently Selected:
Коринфиязухъе тӀоцебесеб кагъат 15: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
