Коринфиязухъе тӀоцебесеб кагъат 12
12
12 бетӀер
Илагьияб РухӀалъ кьураб батӀи-батӀияб махщел-гьунар
1Илагьияб РухӀалъ кьураб махщел-гьунаралъул рахъалъ абуни, дие бокьун гьечӀо, вацал, нужеда гьеб мекъи бичӀчӀизе. 2Нужеда ракӀалда бугищ, мажусияллъун рукӀараб заманалда аллагьзабийилан тарал, кӀалъазе кӀал гьечӀел жалазе лагълъи гьабиялъ нуж батӀи-батӀияб къагӀидаялъ къосинарураб куц? 3Гьединлъидал дие бокьун буго нужеда бичӀчӀизе: инсанасулъ Аллагьасул РухӀ бугони, гьес абиларо ГӀисае нагӀана батагийилан. Жиндилъ Илагьияб РухӀ гьечӀони, лъицаниги абиларо ГӀиса ТӀадегӀанав вугилан!
4Махщел-гьунар батӀи-батӀияб букӀуна. Амма гьеб кинабго цохӀо Илагьияб РухӀалъ кьола. 5Хъулухъ гьабиялъулги руго батӀи-батӀиял къагӀидаби. Амма гьел киналго цохӀо ТӀадегӀанасе руго. 6ХӀалтӀи-ишги батӀи-батӀияб буго. Гьеб кинабго гьабизе киналго тӀамулев Аллагь цохӀо вуго. 7Щивав инсанасулъе РухӀ хасаб къагӀидаялъ рещтӀуна киназего пайдаялъе. 8Цоясе РухӀалъ кьола гӀакъилаб калам, цогидасе гьебго РухӀалъ кьола гӀелму-лъай малъизе махщел. 9Гьебго РухӀалъ цогидасулъе иман тӀинкӀула, цогидасе гьебго РухӀалъ кьола унтарал сахлъизаризе гьунар; 10цоясе кьола мугӀжизат бихьизабизе къудрат, цогидасе – иман лъуразул агьлуялда Аллагьасул амру лъазабизе махщел; цоясе – РухӀалдасан бугебги гьелдасан гьечӀебги батӀа гьабизе гьунар, цогидасе – батӀи-батӀиял мацӀазда кӀалъазе лъай, яги батӀи-батӀиял мацӀазда бицунеб жо цогидазда бичӀчӀизабе бажари. 11Гьеб кинабго гьабула цохӀо РухӀалъ, гьедин жиндиего бокьухъе щивав чиясе кьола гьелъ махщел-гьунар.
12Мисалалъе босилин инсанасул черх. Черх цо буго, лугби гӀемер руго. КигӀан гӀемер ругониги гьел лугбуздасан лъугьун буго цохӀо черх. Гьединав вуго МасихӀги. 13ЦохӀо РухӀалдалъун киналго нилъ чурун рацӀцӀалъана, цого черхлъун лъугьана – жугьутӀалги, грекалги, лагъзалги, уздензабиги. Цого РухӀалдасан гьекъезаруна киналго.
14Цо лагаялдасан гуро черх лъугьун бугеб, гӀемераздасанин. 15Масала, бохалъ жиб квер гурин ва гьаб черхалъул лагаги гурилан абуниги, чорхол лагалъун хутӀулагури гьеб. 16Яги гӀиналъ жиб бер гурин ва гьаб черхалъул лагаги гурилан абуни, чорхол лагалъун хутӀулагури гьеб. 17ТӀолабго черх цохӀо бералдасан гӀуцӀараб букӀарабани, гьелда кин рагӀилеб букӀараб? ТӀолабго черх гӀиналдасан гӀуцӀараб букӀарабани, махӀ кин гьелда лъалеб букӀараб? 18Амма Аллагьас киналго лугби ургъунго цо чорхолъ рекъезарун руго ва щибаб лагаялъе бакӀги бихьизабун буго. 19Кинабго цо лага бугони, черх букӀинищха. 20Гьединлъидал лугби гӀемер руго, черх цо буго. 21Бералъ квералда абизе рес гьечӀо дие мун къваригӀунарилан. Яги бетӀералъ бохдузда абизе рес гьечӀо дие нуж къваригӀунарилан. 22Амма бищунго загӀипалилан кколел лугби чорхое лъугьун ратула бищунго къваригӀунеллъун. 23-24«ХӀурмат гьабизе» кколарелилан рикӀкӀунел лугбузул гурищ нилъеца цӀикӀкӀун тӀалаб гьабулеб? Берцинал лугбуздехун гьечӀеб тӀалаб-агъаз гьабулагури нилъеца сураралилан кколел лугбузул. Аллагьас черх гӀуцӀун буго къимат гьечӀел лугбузул тӀалаб-агъаз цӀикӀкӀунеб къагӀидаялъ, 25– чорхолъ дагӀба-рагӀи ккечӀого букӀине ва киналго лугбуз бащадго цоцазул тӀалаб-агъазги гьабизе. 26Цо лага унтани, киналгоги унтула. Цо лага беццани, киналгоги рохула.
27Нуж киналго МасихӀил черх ккола. Нужер щивав чи гьеб чорхол лагаги бутӀаги ккола. 28Иман лъуразул агьлуялъе Аллагьас тӀоцере чапарзаби тӀамуна, кӀиабизе – халкъалда Аллагьасул амру лъазабулел чагӀи, лъабабизе – мугӀалимзаби, цинги мугӀжизат бихьизабулел чагӀи, цинги гӀадамал сахлъизарулел чагӀи, кумекчагӀи, бетӀерлъи гьабулел чагӀи, батӀи-батӀиял мацӀазда кӀалъалел чагӀи ритӀана. 29Кинавго чи чапар вукӀуневищ? Кинавго чиясухъа бажарулебищ Аллагьасул амру халкъалда лъазабизе? Кинавго чи мугӀалим вукӀуневищ? Кинавго чиясда кӀолебищ мугӀжизат бихьизабизе? 30Кинавго чиясул букӀунебищ унтарал сахлъизаризе гьунар? Кинавго чиясухъа бажарулебищ батӀи-батӀиял мацӀазда кӀалъазе? Кинавго чиясухъа бажарулебищ батӀи-батӀиял мацӀазда цогидазда бичӀчӀизабизе?
31Амма нужеца тӀалаб гьабе бищунго лъикӀаб махщел-гьунар щвезе.
Гьанже дица нужеда бихьизабила гьелдасаги лъикӀалде нуж рачунеб нух.
Currently Selected:
Коринфиязухъе тӀоцебесеб кагъат 12: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
