Коринфиязухъе тӀоцебесеб кагъат 11

11 бетӀер

1Дица МасихӀидасан мисал босулеб бугеб гӀадин, дидасан нужецаги мисал босе.

ДугӀа гьабизе данделъараб бакӀалда кин рукӀине кколел?

2Дица нуж реццула, дун нужеда киданиги кӀочон толев гьечӀелъул, дие щваралда рекъон нужеда дица малъарабги рехун толеб гьечӀелъул. 3Амма дие бокьун буго нужеда бичӀчӀизе: щивав чиясул бетӀергьан МасихӀ вуго, лъадиялъул бетӀергьан рос вуго, МасихӀил бетӀергьан Аллагь вуго. 4ДугӀа гьабулеб яги иман лъуразул агьлуялда Аллагьасул амру лъазабулеб мехалъ бихьинчияс тӀагъур бахъичӀони, жиндирго бетӀер инжит гьабула гьес. 5ДугӀа гьабулеб яги иман лъуразул агьлуялда Аллагьасул амру лъазабулеб мехалъ чӀужугӀаданалъ кӀаз тӀаса бахъани, жиндирго бетӀер инжит гьабула гьелъ. БетӀер кӀкӀварай гӀадин йикӀунелъулха гьей. 6КӀаз чӀвазе бокьуларей чӀужугӀаданалъ бетӀер къунцӀизе ккела. КъунцӀараб яги кӀкӀвараб бетӀергун хьвадизе гьей намуслъулей йигони, биччанте гьелъ кӀаз чӀвазе. 7Бихьинчияс тӀагъур лъезе бегьуларо, Аллагьас кӀодо гьавизе вижун вугелъул гьев. ЧӀужугӀаданги йижун йиго бихьинчи кӀодо гьавизе. 8ЧӀужугӀаданалдасан вижичӀелъулха бихьинчи, бихьинчиясдасан чӀужугӀадан йижидал. 9ЧӀужугӀаданалъе гӀоло вижичӀелъулха бихьинчи, бихьинчиясе гӀоло чӀужугӀадан йижидал. 10Гьединлъидалин чӀужугӀаданалъ бетӀералда кӀаз чӀвазе кколеб, гьей росасул ихтияралда йикӀин малаикзабазда лъазе. 11Амма ТӀадегӀанасде цолъараб мехалда лъадиги росасул ихтияралда йикӀуна, росги лъадиялъул ихтияралда вукӀуна. 12ЧӀужугӀадан бихьинчиясдасан йижун йикӀаниги, бихьинчи чӀужугӀаданалъ гьавуна. Кинабгоги Аллагьасдасан буго!

13Нужецаго пикру гьабе, чӀужугӀаданалда рекъараб бугищ бетӀерги гӀицӀго тун дугӀа гьабизе? 14Жибго тӀабигӀаталъги бихьизабулеб гьечӀищ нужеда халатаб расалъ бихьинчи суризавулев вукӀин? 15Халатаб расалъ чӀужугӀадан берцинлъизаюлей гьечӀищ? БетӀералда чӀвалеб кӀаз гӀадин буго гьелъие рас. 16Гьелда дагӀба базе бокьарав чиясда дица абила, нилъерги гьечӀин гьединаб гӀадат, иман лъуразул жамагӀатазулги гьечӀин.

ТӀадегӀанасул хӀурматалда гьабулеб квен

17Гьанже гьабизехъин бугеб насихӀаталъулъни дица нуж рецциларо: нужер данделъиялъул зарал цӀикӀкӀараб буго гьелъул пайдаялдаса. 18Цо бугони, дида рагӀана нужер агьлу данделъараб мехалда гьениб дагӀба-рагӀи кколилан. Гьеб тӀубанго гьереси гьабизеги кӀвеларо. 19Жидедаса Аллагь разилъаралал ратӀа рахъизе лъазелъун нужеда гьоркьоб рикьи ккезе кколелъулха. 20Масала, гьенир данделъараб мехалда ТӀадегӀанасул хӀурматалда гуро нуж кваналел. 21Цоясдаса цояв цеве ккезе тӀалаб гьабун кваналел-гьекъолел руго нуж – цояв вакъун хутӀулев вуго, цогидав мехтулев вуго. 22Кваназеги гьекъезеги нужер рукъ гьечӀебищ? Аллагьасде иман лъуразул агьлу инжит гьабизеги мискин-пакъир къварид гьавизегийищ нуж данделъулел? Щибха дица абилеб? Нуж реццизейищ лъугьинев? Лъугьинаро!

23ТӀадегӀанасдасан лъана дида гьаб кинабго нужеда малъулеб бугебщинаб. Досие хиянат гьабураб сордоялъ ТӀадегӀанав ГӀисаца, цо чедги кодобе босун, 24тӀаде дугӀаги гьабун, гьебги бек-бекун абуна: «Гьаб буго нужее гӀоло къурбанлъулеб дир черх. Дунги ракӀалде щун, нужецаги гьабе гьадин». 25Кванан рахъараб мехалъ, додинго щурунги кодобе босун, гьес абуна: «Гьаб буго дир би – ЦӀияб КъотӀи щулалъиялъе тӀолеб би. Гьеб щурминисан чагъир гьекъолеб мехалъ, дун ракӀалде щва нужеда». 26Гьединлъидал гьеб чед кваналебщинахъе ва гьеб щурминисан чагъир гьекъолебщинахъе нужеца, Дов вачӀинегӀан, гӀадамазда лъазабулеб буго ТӀадегӀанасул хвалил хӀакъалъулъ.

27Гьедин, бегьулареб къагӀидаялъ ТӀадегӀанасул чед кваналев ва гьесул щурминисан чагъир гьекъолев чияс мунагь гьабулеб буго – ТӀадегӀанасул черхги биги инжит гьабулеб буго. 28Цин инсан жиндирго рекӀелъе ваккизе ккола, мустахӀикъав вугищали лъазе. Цинги кваназе бегьула гьеб чед ва гьеб щурминисан чагъир гьекъезеги бегьула. 29ТӀадегӀанасул черх бичӀчӀичӀого кваналев ва гьекъолев чияс жиндаго тӀаде тамихӀ цӀалеб буго. 30Гьединлъидалин нужеда гьоркьор загӀипалги унтаралги гӀемерлъун ругел, цо-цоял холелги ругел. 31Цин нилъ нилъерго рекӀелъе раккани, Аллагьасул тамихӀ букӀинаро нилъее. 32Аллагьас нилъее тамихӀги гӀадлуги гьабулеб буго, – цогидаб гӀаламалъе букӀине бугеб жазаялдаса нилъ хвасарлъизе.

33-34Гьединлъидал, вацал, нужер данделъи Аллагьасул тамихӀлъун лъугьинчӀого букӀине, кваназе киналго тӀаде щвезегӀан чӀа. Вакъарав чи рокъовго кванан вачӀа. Цогидал амруял дица нужее кьела дунго гьениве вачӀараб мехалъ.

Currently Selected:

Коринфиязухъе тӀоцебесеб кагъат 11: АварАК

Highlight

Copy