Коринфиязухъе тӀоцебесеб кагъат 13
13
13 бетӀер
Рокьиялъе гьабураб рецц
1Киналго халкъазул, малаикзабазулгицин мацӀалда кӀалъазе лъалеб бугониги, дилъ рокьи гьечӀони – дун ккола бухулеб къалиги пулеб зурмаги. 2Аллагьасул киналго амруял дица халкъалда лъазарулел ругониги, кинабго балъгояб гӀелму-лъай дилъ бугониги, мугӀрул рилълъанхъизаризе кӀолеб божи-иман бугониги, – дилъ рокьи гьечӀони, дунги гьечӀо. 3Дица дир бугебщинаб боцӀи-рикъзи мискинзабазе бикьаниги, дирго черх бухӀизе кьуниги – дилъ рокьи гьечӀони, щибго пайда гьечӀо дие.
4Рокьулъ сабру буго, гурхӀел-рахӀму буго, рокьулъ берчӀегӀерлъи гьечӀо, рокьи беццаруларо, рокьи чӀухӀдаруларо, 5рокьулъ тӀасанккей гьечӀо, жиндиего пайдаялда хадубги лъугьунаро, рокьи ццидахунаро, гӀайиб-гъвел гьелда кӀочон тола, 6квешабщиналдаса бохуларо гьеб, хӀакъабщиналдаса бохула. 7Рокьи кидаго тӀасалъугьуна, кидаго божула, кидаго хьул-къасдалда букӀуна ва гьелъ щибго хӀехьола.
8Рокьи киданиги лъугӀуларо. Аллагьасул амруял халкъалда лъазарулел руго – гьеб лъугӀила. БатӀи-батӀиял мацӀазда кӀалъалел руго – гьебги тӀагӀина. ГӀадамазулъ гӀелму-лъай буго – гьебги лъугӀила. 9Нилъер гӀелму-лъай камилаб гьечӀелъулха, Аллагьасул амруял ричӀчӀиги камилаб гьечӀелъулха. 10ТӀубанго камиллъараб тӀаде бачӀараб мехалъ, камиллъичӀебщинаб тӀагӀина. 11Лъимер вугеб мехалда дун лъимер гӀадин гаргадулаан, лъимаца гӀадин пикру гьабулаан, лъимадул гӀадинаб гӀакълуги букӀана дир. КӀудияв гӀураб мехалъ, кинабго доб лъимадулаб дилъа лъугӀана. 12Гьанже нилъеда бихьулеб буго басрияб матӀуялъусан гӀадин. Доб мехалда цебе лъун бихьила. Гьанже дида цо бутӀа лъала, доб мехалда тӀубанго лъазе буго, Аллагьасда дун тӀубанго лъалев вугев гӀадин.
13Гьанже нилъеда цадахъ хутӀун буго божиги, хьулги, рокьиги. Гьеб лъабалъулго бищунго тӀадегӀанаб ккола рокьи.
Currently Selected:
Коринфиязухъе тӀоцебесеб кагъат 13: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
