Коринфиязухъе тӀоцебесеб кагъат 10

10 бетӀер

Гьересиаллагьзабазде иман лъеялдаса цӀуне

1Дие бокьун буго, вацал, нужеда ракӀалде щвезабизе: Мисриялдаса нахъе унеб мехалда нилъер киналго умумул накӀкӀул рагӀдукь ккун рукӀана, киназго ралъадги бахана. 2Киналго гьел Мусада нахърилълъун накӀкӀуцаги ралъдацаги чурана. 3Гьез киназго кванана цого-цо илагьияб квен, 4цого-цо илагьияб гьекъелги гьекъана гьез. Илагьияб кьурулъан чвахун бачӀараб лъим гьекъана гьез. Гьеб кьуру гьезда цадахъ букӀана. МасихӀ ккола гьеб. 5Амма гьезул гӀемерисез Аллагь рази гьавичӀо – гьезул жаназаби авлахъалда щущана. 6Гьеб буго нилъее мисал – гьел гӀадин нилъ квешлъиялда нахърилълъинчӀого рукӀине. 7Гьезул цо-цояз гӀадин аллагьалилан тарал жалазе лагълъи гьабуге нужеца. ТӀухьдузда хъван бугелъулха: «ГӀодор чӀун кваназе-гьекъезе лъугьана халкъ, цинги аллагьилан тараб жоялъул хӀурматалда пасатабщинабги хъубабщинабги гьабизе лъугьана». 8Гьезул цо-цояз гӀадин хъахӀбалъи гьабиларин нилъеца. Гьез хъахӀбалъи гьабуна – ва цохӀо къоялъ гьезул къоло лъабазарго чи хвана. 9Гьезул цо-цоял гӀадин, БетӀергьанасул хӀалбихьизе лъугьинарин нилъ. Гьел хвана борхьаз хӀанчӀун. 10Гьезул цо-цоял гӀадин, Аллагьасде дандечӀун, гъулгъудизе бегьуларо нилъ. Гьеб сабаблъун хвалил малаикас хвезаруна гьел. 11Гьеб киналъулго хӀакъалъулъ ТӀухьдузда хъван буго нилъее гӀакълу щвеялъе гӀоло. Ахирзаманаялде гӀагарлъулел ругелъулха нилъ.

12Гьединлъидал, вахъун чӀун вугилан ккарав гӀодов ккезе гурин. 13ГӀадамазда гьоркьоб букӀунеб гурони гӀазаб-балагь рещтӀинчӀо нужеде. Аллагьас жиндирго къотӀи хвезабуларо – хӀехьезе кӀолареб гӀазаб-балагь биччаларо гьес нужеде. ГӀазаб-балагьалда цадахъго гьес нужее бихьизабила гьеб хӀехьезе ресги.

14Гьединлъидал, дир хириял, гьересиаллагьзабазе лагълъи гьабиялдаса рикӀкӀалъе. 15ГӀакъилал гӀадамазда гӀадин бицунеб буго дица нужеда. Нужецаго пикру гьабе дица бицаралъул. 16ТӀадегӀанасул хӀурматалда нилъ гӀодор чӀун сардилъ кванала ва, гьари-дугӀа гьабун, щурминиса чагъирги гьекъола, – гьелъул магӀна ккола МасихӀица тӀураб бидулъ нилъерги бутӀа букӀин. Кваналаго нилъеца чед бекиялъул магӀна ккола МасихӀил чорхолъги нилъер бутӀа букӀин. 17Гьеб чед цо бугелъул, нилъ гӀемер ругониги, цохӀо черх лъугьуна. Нилъеца кинацаго цохӀо чед цоцазе бикьун кваналелъулха! 18Исраилил халкъалъухъ балагье: къурбаналъе хъураб жо кваналелщиназ жидерго бутӀа лъолагури гьез гьабулеб тӀагӀаталъулъ. 19Щиб абизе дие бокьун бугеб: гьересиаллагьзабазе гьабулеб къурбан магӀнаяб жо бугиланищ? яги гьересиаллагь магӀнаяб жо бугиланищ? 20Гуро! Дие абизе бокьун буго: мажусиязул къурбан гьез Аллагьасе гуро гьабулеб, жундузе гьабула. Дие бокьун гьечӀо нужеца жундузулгун гьоркьоблъи гьабизе. 21Цин ТӀадегӀанасул щурминисан, цин жундузул щурминисан гьекъезе бажариларо нужехъа. Цин ТӀадегӀанасул столалдасан, цин жундузул столалдасан кваназеги бажариларо. 22БетӀергьанасул ццин бахъинейищ нужее бокьун бугеб? Гьесдаса къуваталищ нилъ ругел?

23«Бокьарабщинаб гьабизе бегьула», – ян абула цо-цояз. Амма бокьарабщиналъул гуро пайда бугеб. «Бокьарабщинаб гьабизе бегьула». Амма бокьарабщиналъ гуро кумек гьабулеб. 24Биччанте щивав чи жиндиего пайдаялъе гуреб, гӀагарда вугесе пайдаялъе хӀалтӀизе. 25Нужеца базаралдаса гьан босе щибго цӀехечӀого ва хӀинкъичӀого кванай. 26ТӀухьдузда хъван бугелъулха: «Ракьги ракьалда бугебщинабги БетӀергьанасулин». 27Иман лъечӀев чияс мун гьоболлъухъ ахӀани, ине ракӀалде ккани, дудаго цебе лъураб жо кванай щибго цӀехечӀого ва хӀинкъичӀого. 28Мажусиязул къурбаналъул бугин гьеб квенилан дуда лъицаниги абуни, дуца гьеб кванаге, дуда гьеб абурав чи гӀодове виччазавизе. 29Гьеб кваназе мун хӀинкъиялъул гуро дица бицунеб бугеб, гьев хӀинкъун вукӀиналъулин. Цо лъицаниги гьикъани: «Цогидасул хӀинкъи сабаблъун диего бокьараб гьабичӀого тезе щай дица кколеб? 30Аллагьасе реццги гьабун дица гьеб квани, лъица дида гӀайиб чӀвалеб, Аллагьасе рецц гьабун дун квананилан?» 31Щиб гьабулел ругониги – кваналел ругониги, гьекъолел ругониги, – Аллагьасе рецц гьабичӀого тоге. 32ЖугьутӀалги, грекалги, Аллагьасде иман лъуразул агьлуги къосинариларедухъ хьваде нуж. 33Диего пайдаялъе гуреб, гьел хвасарлъизе гӀологи гӀемеразе пайдаялъе гӀологи хӀалтӀулев дун гӀадин хьваде.

Currently Selected:

Коринфиязухъе тӀоцебесеб кагъат 10: АварАК

Highlight

Copy