Потон 18

18-тӥ ЛЮКЕТ

1Мадиан музъемысь Иофор священник, Моисейлэн варматаез, ваньзэ кылӥз, мар лэсьтӥз Инмар Моисейлы но, Ас израиль калыкезлы но, кызьы Кузё-Инмар Израилез Египетысь поттӥз. 2Соку Моисейлэн Иофор варматаез Моисейлэсь Сепфора кышнозэ кутӥз – талэсь азьвыл Моисей сое ас дораз берыктӥз вал, – 3солэсь кык пиоссэ но кутӥз, огезлэн нимыз Гирсам, уго Моисей шуэ вал: «Мон мурт музъеме лыктэм мурт»; 4нош мукетызлэн нимыз Елиезер, уго [со шуэ вал]: «Атаелэн Инмарез мынам юрттӥсе вал, Со монэ фараонлэн мечезлэсь утиз». 5Моисейлэн варматаез Иофор солэн пиосыныз, кышноеныз Моисей доры луоё кыр дуннее лыктӥз, отчы, Инмар гурезь выжые, Моисей, балаган пуктыса, улыны интыяськемын вал. 6Моисейлы ивор лэзиз: мон Иофор, тынад варматаед, тон доры мынӥсько, кышноед кык пиосыныд но лыкто. 7Моисей варматаезлэн пумитаз потӥз, йыбырттӥз но чупаз сое, ог-огзэс ӟечкылам бере балаган пушкы пыризы. 8Моисей варматаезлы ваньзэ вераз, мар кариз Кузё-Инмар фараонлы, [вань] египет калыклы Израиль понна, кыӵеесь шугадӟонъёс пумиськизы соослэн сюрес вылазы, кызьы Кузё-Инмар соосты [фараонлэн, египет калыклэн киулысьтыз] мозмытӥз. 9Иофор шумпотӥз Кузё-Инмарлэн израиль калыкез египет калыклэн, [фараонлэн] киулысьтыз мозмытэм дыръяз Израильлы возьматэм вань ӟечлыкъёсыз понна. 10Соку Иофор шуиз: «Данлыко Кузё-Инмар, тӥледыз египет калыклэн, фараонлэн киулысьтыз Мозмытӥсь, та калыкез египет калыклэн киулысьтыз Мозмытӥсь; 11табере, та бордысен ик, израиль калыклэн вылӥяз асьсэды пуктылыса улэмзы бордысен, мон тодӥ: Кузё-Инмар вань инмаръёслэсь быдӟымгес». 12Моисейлэн варматаез Иофор Инмарлы тылын сутӥськись курбонъёс сётӥз, мукет курбонъёс но вайиз. Аарон но вань израиль тӧроос Моисейлэн варматаеныз ӵош Инмар азьын курбон сиён сиыны лыктӥзы.

13Мукетаз нуналэ Моисей калык куспысь суд ужъёсты сэрттыны-пертчыны пуксиз, ӵукнаысен ӝытозь калык Моисей азьын сылӥз. 14Моисейлэн варматаез [Иофор] адӟиз ваньзэ, мар со калык понна лэсьтэ, соку со шуиз: «Мар тон калыкен тазьы лэсьтӥськод? Малы тон одӥгнад пукиськод, нош вань калык ӵукнаысен ӝытозь тон азьын пыд йылаз сылэ?» 15Соку Моисей варматаезлы шуиз: «Калык мон доры Инмарлэсь судзэ курыны лыктэ. 16Куспазы кыӵе ке но ченгешон ужзы луэ ке, соос мон доры лыкто, соку мон соос куспысь ужез чакласько-эскерисько, мукетъёслы но Инмарлэсь пуктон-косонъёссэ, Солэсь законъёссэ ялӥсько». 17Нош Моисейлэн варматаез солы шуиз: «Умойтэм тон лэсьтӥськод: 18тон астэ но, тонэн ӵош ветлӥсь та калыкез но курадӟытӥськод, уго укыр та уж тон понна секыт луэ: тон одӥгнад сое быдэсъяны уд быгаты; 19мынэсьтым верам кылъёсме санэ пон; мон тыныд визь-кенеш сёто, Инмар тонэн огазьын луоз: тон калык понна Инмар азьын сылӥсь лу, калыклэсь ужъёссэ Инмарлы верась лу; 20калыкез [Инмарлэн] пуктон-косонъёсызлы, [Солэн] законъёсызлы дышеты, [Инмарлэсь] соослы сётэм мыноно сюрессэс, лэсьтоно ужъёссэс соослы возьматы. 21Вань та калык пӧлысь Инмарлэсь кышканэн улӥсь, быгатӥсь-нодо адямиосты, шонерлыко улӥсьёсты, узырлык люканэз синазькыль карисьёсты тон [аслыд] шедьты, [соосты] калыкен кивалтыны пукты, сюрс адямиен кивалтыны, сю адямиен, витьтон адямиен, дас адямиен кивалтыны кузёйыре пуктылы, [гожтэт нуллӥсьёс кар]. 22Котькыӵе дыръёсы-вакытъёсы соос калык куспысь суд ужъёсты мед сэрттозы-пертчозы, кулэ луись уж сярысь ваньзы соос тыныд мед ивортылозы, нош вань чыры-пыры ужъёсты соос асьсэос мед чаклалозы-эскерозы: соку тыныд капчигес луоз, секыт ныпъетэз соос тонэн валче нуозы. 23Тон тазьы лэсьтӥд ке, Инмар тонэ тазьы лэсьтыны косӥз ке, тон чиданы быгатод, вань та калык но каньыл мылкыдын ас интыяз берытскоз». 24Моисей варматаезлэсь верам кылзэ кабыл басьтӥз, солэсь вань нодъян кылъёссэ быдэстӥз; 25вань израиль калык пӧлысь Моисей быгатӥсь-нодо адямиосты бырйиз, соосты калыкен кивалтыны пуктӥз, сюрс адямиен, сю адямиен, витьтон адямиен, дас адямиен кивалтыны кузёйыре пуктылӥз, [гожтэт нуллӥсьёс кариз]. 26Котькыӵе дыръёсы-вакытъёсы соос калыклэсь ужъёссэ эскерылӥзы-чаклаллязы; [вань] туж кулэ ужъёс сярысь Моисейлы ивортылӥзы, нош ваньзэ чыры-пыры ужъёсты асьсэос эскерылӥзы-чаклаллязы. 27Моисей варматайзэ келяз, со ас дораз, ас музъемаз кошкиз.

Currently Selected:

Потон 18: УДМБИБ

Highlight

Copy