Потон 19

19-тӥ ЛЮКЕТ

1Египет музъемысь потэмзы дырысен куинетӥ толэзьлэн кутсконаз израиль пиос выль толэзь потон нуналэ ик Сӥнай луоё кыр дуннее вуизы. 2Рефидимысь потыса, соос Сӥнай луоё кыр дуннее вуизы но отчы станэн интыяськизы; гурезьлы ваче беринэ израиль пиос станэн интыяськизы.

3Моисей Инмар азе [гурезь йылэ] тубиз, гурезь йылысен Кузё-Инмар солы тазьы вазиськиз: «Иаковлэн выжыезлы вера, израиль пиослы иворты: 4”Тӥ адӟиды, мар кари Мон египет пиослы, кызьы Мон тӥледыз ӧрӟилэн бурд вылаз [нуллэм кадь] нуллӥ, тӥледыз Ас дорам вайи. 5Озьыен, Мынэсьтым верам кылме кабыл басьтӥды ке, сӥзён-косон пыр тӥледын кылдытэм кусыпме утьыса улӥды ке, соку тӥ вань калыкъёс пӧлысь бырйыса басьтэм люкетэ луоды, уго быдэс музъем – со Мынам, 6нош тӥ Мон понна священникъёслэн эксэйлыксы луоды, святой калык луоды”; тани та израиль пиослы тынад верано кылъёсыд». 7Соку Моисей лыктӥз но калыклэсь тӧрооссэ огазе люказ, Кузё-Инмарлэсь вераны косэм кылъёссэ соослы ваньзэ вераз. 8Вань калык огкылысь вазиськыса шуиз: «Мар вераз Кузё-Инмар, ваньзэ быдэстомы, [кылзӥськомы]». Калыклэсь верам кылъёссэ Моисей Кузё-Инмарлы вераз.

9Соку Кузё-Инмар Моисейлы шуиз: «Тани, Мон тон доры нап бусо пилем пушкын лыкто, калык мед кылоз, кызьы Мон тонэн верасько, пыраклы тыныд мед оскоз». Калыклэсь верам кылъёссэ Моисей Кузё-Инмарлы ивортӥз. 10-11Кузё-Инмар Моисейлы шуиз: «Мын калык доры, [иворты,] туннэ но, ӵуказе но соосты чылкыт кар; куинетӥ нуналлы дась мед луозы – дӥськутсэс мед миськозы: уго куинетӥ нуналэ вань калыклэн син азяз Кузё-Инмар Сӥнай гурезе васькоз; 12калык понна котыр ласянь гож лэсьты, шу: ”Гурезе эн тубе, солэн выжыез борды эн йӧтӥське, кин ке гурезь борды йӧтӥськиз ке, со виемын луоз; 13со виёно мурт борды киын эн йӧтӥське, сое изэн лэзьяса жуге яке пукыӵен ыбе; пудо-а со яке адями-а – улэп медаз кыльы”. Гумылэн кузь куараез кылӥськыку, [гурезь бордысь пилем кошкем бере] соос гурезе тубыны быгатозы». 14Моисей гурезьысь калык доры васькиз но калыкез дун-чылкыт кариз, соосыз дӥськутсэс миськизы. 15Со калыклы шуиз: «Куинетӥ нуналлы дась луэ; кышноосты борды эн йӧтӥське».

16Куинетӥ нуналаз, ӵукна пал, гудыръяз, чилекъяз, [Сӥнай] гурезь йылын нап пилем улӥз, кужмо гумы куара кылӥськиз; станын улӥсь вань калык куалекъяз. 17Соку Моисей станысь калыкез Инмарез пумитаны нуиз, гурезь выжые дугдӥзы. 18Нош Сӥнай гурезь быдэсак ӵындыса улӥз – Кузё-Инмар отчы тыл пушкын васькем бере; гурысь кадь со вылысь ӵын потыса улӥз, быдэс гурезь кужмо зуркаса улӥз; 19нош гумы кужмогес но кужмогес куаразэ поттыны кутскиз. Моисей вераз, [нош] Инмар солы куараен ответ сётӥз. 20Соку Кузё-Инмар Сӥнай гурезь йылэ васькиз но Моисеез гурезь йылэ тубыны косӥз, Моисей тубиз. 21Кузё-Инмар Моисейлы шуиз: «Гурезь улэ васькыса, калыклы иворты: Кузё-Инмар доры, Сое адӟыны шуыса, матэгес медаз чуртнаське, таин сэрен калык пӧлысь тросэз кулоно-быроно медаз луэ, 22[Инмарлэн] Кузё-Инмарлэн матаз мынӥсь священникъёс но, Кузё-Инмар соосты медаз погырты шуыса, дун-чылкыт кариськыны кулэ». 23Моисей Кузё-Инмарлы шуиз: «Калыклэн Сӥнай гурезе тубемез уз луы, уго Тон азьвыл ик милемыз алыса верад: гурезь котыртӥ гож лэсьты, гурезез святой кар». 24Соку Кузё-Инмар солы шуиз: «Мын, васькы, собере Ааронэн ӵош татчы туб; нош священникъёс но калык медаз но тырше Кузё-Инмар доры тубыны, со понна [Кузё-Инмар] соосты погыртоно медаз луы». 25Моисей, калык доры васькыса, верано кылъёсты соослы ивортӥз.

Currently Selected:

Потон 19: УДМБИБ

Highlight

Copy