Потон 17

17-тӥ ЛЮКЕТ

1Вань израиль калык Сӥн луоё кыр дуннеысь сюрес вылэ потӥз, кызьы косӥз Кузё-Инмар; Рефидиме вуыса, отчы балаганъёссэс пуктылӥзы; калыклы юыны ву ӧй вал. 2Калык Моисеез пыкылӥз, шуизы: «Вае милемлы юыны ву». Моисей соослы шуиз: «Малы тӥ монэ пыкылӥськоды? Малы Кузё-Инмарлэсь визьзэ сынаськоды?» 3Сюэз куасьмыса, калык курадӟиз, тазьы шуыса, Моисеез пыкылӥзы: «Малы тон милемыз Египетысь поттӥд, милемыз но, нылпиосмес но, пудоосмес но юэм потыса быдтыны-а?» 4Моисей, Кузё-Инмарлы вазиськыса, тазьы шуиз: «Мар каром ни мон та калыкен? Кӧня ке дыр ортчыса, соос монэ изэн зӥръяса жугозы». 5Соку Кузё-Инмар Моисейлы шуиз: «Израиль калыклэсь куд-ог тӧрооссэ бордад кут, ву вылэ шуккем кивалтэт бодыдэ кияд кутыса мын, калык азьтӥ ортчы; 6тани, Мон Хоривысь изгурезь йылэ тынад азяд султо, тон изгурезь вылэ шуккод но, отысь ву потоз, калык ву юоз». Моисей Израиль тӧроослэн син азязы тазьы кариз. 7Со интылы Масса но Мерива ним сётӥз, израиль пиослэн пыкылэменызы сэрен таӵе ним сётэмын вал,#17:7 Масса но Мерива – «визь сынаськон но пыкылон» шуыса берыктӥське малы ке шуоно соос Кузё-Инмарлэсь визьзэ сыналлязы тазьы шуыса: «Асьме пӧлын Кузё-Инмар вань-а, ӧвӧл-а?»

8Амалик пиос лыктӥзы но Рефидимын израиль пиосын ожмаськизы. 9Моисей Иисуслы#17:9 татын вераськон мынэ Иисус Навин сярысь шуиз: «Асьмелы [кужмо] воргоронъёсты бырйы но амалик пиосын ожмаськыны мын; ӵуказе мон мувыр йылэ султо, Инмарлэн бодыез мынам киям луоз». 10Моисей кызьы косӥз, Иисус озьы лэсьтӥз – амалик пиосын ожмаськыны [мынӥз]; нош Моисей, Аарон но Ор мувыр йылэ тубизы. 11Моисей киоссэ ӝутыса возьыку, Израиль вормылӥз, нош куке киоссэ уллане лэзьылӥз, амалик калык вормылӥз; 12нош Моисейлэн киосыз секытомизы, соку, из кутыса, со улэ понӥзы, со из вылэ со пуксиз. Ааронэн Ор кизэ кутыса возизы, одӥгез огпалтӥз, мукетыз – мукет палтӥз. Шунды пуксьытозь солэн киосыз ӝутӥськыса улӥзы. 13Иисус Амаликез но солэсь калыксэ лэчыт мечен погыртӥз. 14Кузё-Инмар Моисейлы шуиз: «Тае тодэ возён понна книгае гожты но Иисуслы шу: ”Мон амалик калык сярысь тодэ ваёнэз музъем вылысь быдэсак быдто”». 15Соку Моисей [Кузё-Инмарлы] курбон сётон инты лэсьтӥз но солы Иегова Нисси#17:15 Иегова Нисси – «Кузё-Инмар – со мынам знамяе» шуыса берыктӥське ним сётӥз. 16Со шуиз: «Ки Кузё-Инмарлэн престол вылаз: Кузё-Инмар Амаликен выжыысь выжыосы ожмаськоз».

Currently Selected:

Потон 17: УДМБИБ

Highlight

Copy