Маккавейёслэн 1-тӥ книгазы 8
8
8-тӥ ЛЮКЕТ
1Рим калыклэн данлыкез сярысь, соослэн туж кужмо, кышкасьтэм луэмзы сярысь Иуда кылӥз, соослы вазиськисьёсты ваньзэс, пе, ӟеч мылкыдын пумитало, кин гинэ соос доры уг вуылы, ваньмыныз, пе, эшлыко кусып кылдыто. 2Соослэн кужмоесь, кышкасьтэм луэмзы сярысь, – соослэн ожъёс нуэмзы сярысь, галат калык вылын батырлыко, данлыко ужъёссэс возьматэм сярысь солы вераллязы, кызьы соос галатъёсты киултӥзы но выт тырись калык каризы; 3озьы ик Испан кунын мар соос лэсьтӥзы, отысь азвесь, зарни поттон интыоссэс асьсэлы карон понна, 4асьсэлэн визьлыкенызы, юн сямо луэменызы соос быдэс шаерез асьсэ киулэ басьтӥзы, со шаер соослы туж кыдёке ке но интыяськемын вал, музъемлэн пумъёсысьтыз соосын ожмаськыны вуылӥсь эксэйёсты но соос пыргытӥзы, туж зол погыръяллязы, нош мукетъёсыз соослы арлы быдэ выт тыро; 5соос ожын озьы ик погыртӥзы но асьсэлы тэрытскись каризы Филиппез но Персеез, Китийлэсь эксэйзэ, мукетъёссэ но соослы пумит ӝутскемъёсты, 6Антиохез но, Азиысь бадӟым эксэез, соослы пумит сю кызь слонъёсын, ожмаськон валъёсын, ожмаськон уробоосын, туж трос ожгарчиосын ожен лыктӥсез, соос погыртӥзы. 7Сое улэпкын кутӥзы но – кызьы ке сое, озьы ик со бере пуксем эксэйёсты туж бадӟым выт тырыны косӥзы, – заложникъёсты сётыны, музъемез люкылыны лэзизы, 8нош Индияез, Мидияез, Лидияез, озьы ик солэн устоесь улосвылъёсыз пӧлысь мукетъёссэ но, со киысь басьтыса, Евмений эксэйлы сётӥзы; 9(Иуда кылӥз) со сярысь но, кызьы эллинъёс малпазы, татчы лыктыса, Рим калыкез быдтыны, 10нош та малпанзы соослы тодмо луиз но соос эллинъёслы пумит ожен кивалтӥсьёс пӧлысь одӥгзэ ыстӥзы, соослы пумит ожмаськизы, соос пӧлысь ожын тросэз пограз, соослэсь кышнооссэс, нылпиоссэс пленэ басьтӥзы, талазы-тарказы соосты, соослэсь музъемзэс киултӥзы, изкаръёссэс куашкатъязы, туннэ нуналозь но соосты ляльчи радын возё; 11соослы пумит ӝутскись кун-эксэйлыкъёсты но шормуӵъёсты куашкатӥзы-тарказы, ляльчи радэ кельтӥзы. 12Нош асьсэ эшъёсын, соос вылэ оскиськыса улӥсьёсын, эшъяськыса улӥзы. Матысьёссэ но, кыдёкысьёссэ но кун-эксэйлыкъёсты киултӥзы, соос сярысь кылэм вань калык соослэсь кышкаса улӥз. 13Кинлы ке юрттэмзы потэ, кинэ ке эксэе пуктэмзы потэ, эксэе пукто, со кивалтӥсь луэ, кинэ ке воштэмзы потэ – вошто; соос туж вылэ ӝутскизы ни; 14нош озьы ке но соос пӧлысь одӥгез но йыр вылаз эксэй изьы ӧз изьыя, данъяськон понна эксэй дӥськут ӧз дӥся. 15Соос асьсэ дорын кенеш кылдытӥзы но, нуналлы быдэ куинь сю кызь мурт ялан куспазы кенешо калыкен герӟаськем вань ужъёсъя, калыклы ӟеч карон пумысен. 16Арлы быдэ асэнызы кивалтыны одӥг адямиез пукто, быдэс музъеменызы кузёяськись каро, ваньзы одӥг муртэ кылзо, вожъяськон но, вожан но соос дорын уг луо.
17Соку Иуда Аккослэсь Иоанн пиезлэсь Евполем пизэ но Елеазарлэсь Иасон пизэ бырйиз, соосты со Рим калыкен эшъяськонъя, тупаса улонъя кусып кылдытыны Риме ыстӥз, 18иудейёс вылысь зӥбетэз мед басьтысалзы, уго соос адӟо вал, кызьы Эллин кун-эксэйлык Израилез ляльчи кун карыны ӧдъя. 19Озьы быръем муртъёс Риме мыныны потӥзы, сюрес туж кузь ке но вал; кенешлэн люкаськоназ пыризы но отын тазьы веразы: 20«Маккавей Иуда но солэн агай-вынъёсыз, Иудеяысь вань калык милемыз тӥ доры тӥледын тупаса, эшъяськыса улонъя кусып кылдытыны, тӥ милемыз асэныды огкылысь улӥсьёс мед кароды, эшъёсты пӧлы мед гожтоды шуыса курыны ыстӥзы». 21Соослы та кылъёс кельшизы. 22Тани ыргон пулъёс вылэ гожтыса Иерусалиме келям гожтэтсылэн списокез, отын со тупаса, эшъяськыса улонъя кусыплэн синпелетэз (памятникез) соос понна луыны кулэ вал: 23«Рим калыклы но иудей калыклы пумтэм вапумъёс ӵоже зарезь вылын но, музъем вылын но ӟеч мед луоз, ож тӥрлык но, тушмонъёс но соос дорысь кыдёкын, палэнын мед луозы! 24Рим калык дорын яке соослэн вань улосвылъёсысьтызы эшъёссы дорын нырысь ож пуромиз ке, 25со учыре иудей калык вань сюлмыныз ожын кызьы кулэ, озьы соослы юрттӥськыны кулэ; 26(Рим калыклы пумит) ожен лыктэмъёслы иудейёс нянь но, ожмаськон тӥрлык но, коньдон но, корабльёс но уз вае, уз сётэ, уго тазьы кулэ Рим калыклы; асьсэлы номыр но басьтытэк лэсьтоно ужзэс соос быдэсъяны кулэ. 27Чылкак тазьы ик иудей калык вылэ ожен лыктӥсьёс луизы ке, Рим калык кызьы кулэ луоз, озьы ожмаськон мыныку соослы сюлмысьтыз юрттӥськоз; 28ожез нуонын юрттӥськисьёслы нянь но, ожмаськон тӥрлык но, коньдон но, корабльёс но уз сётэ: тазьы кулэ Римлы; соос ӧрекчаськытэк асьсэлэсь лэсьтоно ужзэс быдэсъяны кулэ». 29Таӵе курон-косонъёсын Рим калык иудей калыкен кусып кылдытӥз. 30Та курон-косонъёсты огкылысь кутэм бере соосыз я таосыз малпазы ке маке но ватсаны яке куштыны, сое огкылысь вераськыса мед лэсьтозы, соку маке ватсазы яке кулэстӥзы ке, со уж юнматэмын луоз. 31Нош Дмитрий эксэйлэн иудейёслы урод-лек ужъёс лэсьтэмез пумысен ми солы тазьы гожтӥмы: «Малы тон милям эшъёсмы, огкылысь улоно муртъёсмы вылэ – иудей калык вылэ – секыт зӥбет понӥд? 32Соос тон вылэ урттылӥськонэн ми доры лыктӥзы на ке, ми соослэсь ужзэс шонерлыко луэ шуыса лыдъяломы но тыныд пумит зарезь вылын но, музъем вылын но ожмаськомы».
Currently Selected:
Маккавейёслэн 1-тӥ книгазы 8: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016