Маккавейёслэн 1-тӥ книгазы 9
9
9-тӥ ЛЮКЕТ
1Никанор ожгарчиосыныз валче ожын быриз шуыса, Димитрий кылӥз но Вакхидэн Алкимез кыкетӥ ползэ, бурпалаз сылӥсь отрядэз но соосын ӵош Иудей музъеме келяз. 2Галгалэ мынӥсь сюрес кузя соос кошкизы но Арвилаысь Месалоф вӧзы лагерьзэс интыязы, сое киултӥзы но отысь трос калыкез быдтӥзы. 3Сю витьтон кыкетӥ арлэн нырысетӥ толэзяз соос Иерусалим вӧзы лагерьзэс интыязы, 4нош соос отысь кызь сюрс воргоронъёсын, кык сюрс вал вылын ожмаськисьёсын ӵош Вереяе кошкизы. 5Нош Иуда лагерьзэ Елеаса вӧзы интыяз, куинь сюрс быръем пиосмуртъёс соин ӵош вал. 6Тушмонлэсь трос ожгарчиоссэ адӟыса, макем соос трос кузя вал, Иудалэн ожгарчиосыз туж кышкатскизы, солэн лагерьысьтыз тросэз пегӟыса кошкизы, кылиз ог тямыс сю воргорон гинэ. 7Ожгарчиосыз пегӟиллям, ожен лыктӥсь тушмон сое ӝикатэ ни шуыса, Иуда адӟиз но сюлмыныз куалектӥз, уго солэн дырыз ӧй вал соосты огазе люканы. 8Ӝожомыса со кылемезлы ожгарчиосызлы шуиз: «Султоме но тушмонъёсмы вылэ ожен мыноме, оло нош соосын ожмаськыны кужыммы тырмоз». 9Нош соос таӵе косонлэсь сое куштӥськыны косӥзы, шуизы: «Асьмелэн кужыммы ӧвӧл ни, али лулмес утьыны тыршомы, нош бӧрысь агай-вынъёсынымы ӵош татчы берытскомы но тушмонэн ожмаськомы, уго али асьмеос ӧжыт кузя кылемын». 10Нош Иуда шуиз: «Ӧвӧл, озьы уз луы, – соос дорысь мон пегӟыса мед кошком – озьы мон уг лэсьты; нош асьмелэн часмы вуиз ке, соку кышкатэк агай-вынъёсмы понна куломы, асьмелэсь данлыкмес саптаны муг ум сётэ». 11Лагерьысь Вакхидлэн ожгарчиосыз азьлане вырӟизы, Иудалэн ожгарчиосызлэн ваче пумитазы султӥзы; вал вылын ожмаськисьёс кыклы люкиськизы, нош азьпалаз изэн зӥръяськисьёс, пукыӵен ыбылӥськисьёс, азьпалан мынӥсь вань кужмо ожгарчиос мынӥзы. 12Нош Вакхид бурпалаз сылӥсьёс пӧлын вал, мыд-мыд палась отрядъёс матэ лыктӥзы, гумыоссэс пеллязы. 13Иудаен ӵош ветлӥсьёс но гумыоссэс пелляны кутскизы, ожгарчиослэн куаш каремысьтызы музъем ик зурказ, ӵукнаысен ӝытозь кужмо ожмаськон мынӥз. 14Вакхид но солэн кужмоосыз ожгарчиосыз бурпалаз интыяськемын шуыса, Иуда адӟиз но, со доры вань кышкасьтэм сюлэмоос люкаськизы, – 15бурпалаз сылӥсь сири ожгарчиос пазьгемын вал, Азот гурезь дорозь соос сьӧры уйиськыса мынӥзы. 16Паллян палаз сылӥсьёс бурпалаз сылӥсьёсты пазьгизы шуыса адӟизы, соку соос Иуда бӧрсьы, соин огазьын луисьёс бӧрсьы мыныны берытскизы, берланьысен соос вылэ урдскизы. 17Лек ожмаськон мынӥз, соосыз пӧлысь но, таосыз пӧлысь но сӧсыртэмъёс тросэз погразы, 18Иуда но бырыны шедиз, нош кылемъёсыз пегӟыны кутскизы. 19Ионафанэн Симон Иуда братсэс кутӥзы но сое атайёссылэн Модинысь шайгу пещераязы ватӥзы. 20Бӧрдыса сое ватӥзы, вань израиль калык со понна зол викышъяз, трос нуналъёс ӵоже ӝожомыса улӥзы, шуизы: 21«Кызьы пограз кужмо воргорон, Израилез утись?» 22Иудалэн мукет ужъёсыз, ожмаськонъёсыз, кышкатэк лэсьтэм вылӥлыко ужъёсыз, солэн быдӟымлыкез гожтэмын ӧвӧл, соос уго укыр трос вал.
23Нош Иуда кулэм бере Израильлэн вань ёросъёсаз законлы пумит улӥсьёс потӥзы, ваньзы шонертэм ужъёс лэсьтӥсьёс ӝутскизы. 24Самой со нуналъёсы туж секыт сютэм ар вал, кун но со уродъёсын огазе кариськиз. 25Сьӧлыклэсь кышкасьтэм муртъёсты Вакхид бырйиз но кунлы кивалтӥсе пуктылӥз. 26Соос Иудалэсь эшъёссэ утчаса, эскерыса-чакласа ветлылӥзы но Вакхид доры вайылӥзы, нош со соослы пунэмзэ берыктӥз, олокызьы но соосты унь-мань карылӥз. 27Израильын туж бадӟым куректон-кайгу улӥз, таӵеез соос пӧлысь пророкъёс бырем дырысен та дырозь ӧй на вал. 28Соку Иудалэн вань эшъёсыз огазе люкаськизы но Ионафанлы шуизы: 29«Иуда агаед кулэм дырысен тушмонъёслы, Вакхидлы, калыкмес адӟемпотостэм карисьёслы пумит султыны со кадь быгатӥсез ӧвӧл ни. 30Озьыен, табере ми тонэ бырйимы – со интые, ожъёс нуыны, тон милемлы кузё, азьвалтӥсь лу». 31Азьвалтон ужез со виын Ионафан ас вылаз басьтӥз, Иуда агаез интые султӥз. 32Та сярысь Вакхид кылӥз но сое виыны утчаз. 33Та сярысь Ионафан но солэн Симон агаез тодӥзы, соин ӵош ветлӥсьёс но тодӥзы, соос Фекое луоё кыре пегӟизы, Асфар ты доры лагерьзэс интыязы. 34Суббота нуналэ та сярысь Вакхид тодӥз но асэныз ӵош вань ожгарчиосыз Иордан тупала выжизы. 35Нош Ионафан аслэсьтыз Иоанн агайзэ, калыклэсь азьветлӥсьсэ, эшъёсызлэсь, наватейёслэсь доразы бадӟым обоззэс кельтыны мед лэзёзы шуыса курыны ыстӥз. 36Иамврийлэн пиосыз Мидаваысь потӥзы но Иоаннэз кырмизы, маиз вал, ваньзэ киултӥзы но кошкизы. 37Та учыръёс бере Ионафанлы но солэн Симон агаезлы шуизы, Иамврийлэн пиосыз шулдыр сюан ортчыто, Надавафысь одӥг нимо-дано хананей кузёйырлэсь нылзэ, вылькенэз, шукыръяськыса келяло, пе. 38Соку соос Иоанн агайзэс тодазы вайизы, потӥзы но гурезь пушкы ватскизы. 39Синъёссэс вылэ ӝутӥзы но адӟизы: шумпотон-шулдыръяськон куараос кылӥсько, куаш поттӥсь калык бадӟым йырдун нуэ; соослэн пумитазы, тимпанъёсын, пӧртэм арбериосын шудыса, кырӟаса, трос ожмаськон тӥрлыкъёс кутыса, эмеспи эшъёсыныз, агай-вынъёсыныз потӥзы. 40Соку Ионафанэн ӵош лыктэмъёс ватӥськыса улон интыысьтызы потӥзы но соосты виылӥзы, тросэз кулӥз, пегӟыны вуисез гурезьёсы кошкиз; соослэсь вань ваньбурзэс киултӥзы. 41Сюанзылэн шумпотонэз куректон-кайгулы пӧрмиз, кырӟан гуръёссы – бӧрдонлы. 42Тазьы соос агайзылэн вирыз понна пунэмзэ берыктӥзы но Иордан шур дурысь нюро-кото интые берытскизы. 43Та сярысь Вакхид кылӥз но суббота нуналэ трос ожгарчиосын ӵош Иорданлэн ярдураз вуиз. 44Соку Ионафан ас котырысьтызы адямиослы шуиз: «Ойдолэ султоме но асьмелэн улонмы понна нюръяськоме, уго туннэ толлоез кадь ӧвӧл, солэсь азьвылэз кадь но ӧвӧл. 45Тани азьпаламы но, берамы но тушмон, Иорданлэн вуэз тапалан но, сопалан но, нюр но тэль, ватӥськон-утиськон интымы ӧвӧл. 46Табере Инлы вазиське, тушмонъёсмылэсь мозмытӥськыны мед быгатомы». 47Кутскиз жугиськон. Ионафан кизэ мычиз Вакхидэз виён понна, нош со берлане чигназ. 48Ионафан но соин ӵош ветлӥсьёс Иордан вуэ тэтчизы, шур сьӧры уяса потӥзы, нош таосыз бӧрсязы Иордан сьӧры ӧз потэ. 49Со нуналэ Вакхидлэн ог сюрс ожгарчиез быриз. 50Со Иерусалиме берытскиз но Иудеяе юнэсь городъёс пуктылӥз: Иерихонэ изкарез ӝутӥз, Еммаумез, Вефоронэз, Вефилез, Фамнафаез, Фарафонэз, Тефонэз ӝужытэсь борддоръёсын, капкаосын, ворсэтъёсын юнматӥз, 51Израильлы пумит тушмонлыко ужъёс нуон понна отчы возьмаськисьёсты пуктылӥз. 52Вефсураен Газара каръёсты, Иерусалимысь изкарез юнматӥз но отчы ожгарчиосты, соослы сиён-юон кельтӥз, 53кунлэн азьвалтӥсьёсызлэсь пиоссэс заложнике басьтӥз но возьмаськисьёс киулэ Иерусалимысь изкаре интыяз.
54Сю витьтон куинетӥ арын, кыкетӥ толэзе, Алким храмлэн пуш азбарысьтыз борддорзэ куашкатыны косӥз, пророкъёслэсь ужзэс тарканы, погыръяны-куашкатъяны кутскиз ни вал. 55Нош самой со дыре Алким шуккыса погыртэмын вал, кутскем ужез дугдӥз; ымыз ворсаськиз, со зубектӥз, одӥг кыл но вераны ӧз ни быгаты, юртэз сярысь но сӥзиськон гожтыса ӧз ни вуы. 56Со виын туж курадӟыса Алким кулӥз. 57Алким кулэм шуыса, Вакхид тодӥз но эксэй доры берытскиз, кык ар ӵоже Иудей музъем каньылэн улӥз. 58Соку ваньмыз законлы пумит улӥсьёс кенешыса шуизы: «Тани, Ионафан но соин ӵош улӥсьёс каньылэн, номырлэсь кышкатэк уло; табере Вакхидэз ваёме, – нош со соосты ваньзэс одӥг уй куспын кутылоз». 59Со доры мыныса, солы таӵе кенеш сётӥзы. 60Со малпаз бадӟым армиен мыныны, Иудеяын соин огкадь мылкыдын улӥсь вань эшъёсызлы лушкемен гожтэтъёс ыстӥз, соос Ионафанэз, соин ӵош ветлӥсьёсты но мед кырмозы, нош соос та ужез быдэстыны ӧз быгатэ, – уго лушкем малпанзы мукетъёслы но тодмо луиз. 61Ионафан но соин ӵош ветлӥсьёс та кунысь лек ужен вырыса янгыш луэм муртъёсты – ог витьтон адямиез – кутӥзы но соосты виизы. 62Та бере Ионафан, Симон но соосын ӵош ветлӥсьёс луоё кырысь Вефвасие кошкизы но отысь куашкатэм борддорез выльдӥзы, городэз юнматӥзы. 63Та сярысь кылэм бераз Вакхид вань ожгарчиоссэ люказ, Иудеяын улӥсьёсызлы но ивор сётӥз, 64лыктӥз но Вефвасиез котыртӥз, трос нуналъёс ӵоже солы пумит ожмаськиз, борддор куашкатъян машинаос пуктылӥз. 65Нош Ионафан городэ Симон агайзэ кельтӥз, нош ачиз, кӧня ке муртъёсыныз ӵош городлэн сьӧраз потыса, 66Одоаарринэз агай-вынъёсыныз валче, Фасиронлэсь пиоссэ балаганъёсазы ик погыртӥз но, кужымзэ поныса, тушмон вылэ урдскиз, соосты погыръяны кутскиз. 67Соку Симон ас адямиосыныз ӵош город пушкысь потӥзы но борддор куашкатъян машинаоссэс сутӥзы. 68Вакхидлы пумит ожмаськизы но сое пазьгизы; тазьы сое бадӟым куректонэ уськытӥзы, уго солэн малпам ужез, ожен лыктонэз юнме гинэ луизы. 69Законлы пумит улӥсь иудей воргоронъёслы солэн туж вожез потӥз, уго соос та кунэ ожен лыктыны солы кенеш сётӥзы вал; кутӥз но троссэ соосты виылӥз, малпаз ас музъемаз берытскыны. 70Та сярысь тодэм бераз Ионафан Вакхид доры тӧроосты соин тупаса улон сярысь огкыл гожтыны, пленэ шедемъёсты мед берыктоз шуыса курыны ыстӥз. 71Со тае кабыл басьтӥз, Ионафанлэн кылызъя лэсьтӥз но кыл сётӥз: вань улон нуналъёсыз ӵоже солы нокыӵе но урод уж уз лэсьты, 72Иудей музъемысь азьвыл пленэ басьтэмъёсты солы берыктӥз, собере ас музъемаз кошкиз но та ёросъёсы азьло-берло ӧз ни вуылы. 73Израильын меч буйгатскиз, Ионафан Махмасе улыны интыяськиз; Ионафан калыкез судить карыны кутскиз но Израильысь сьӧлыклэсь кышкасьтэмъёсты виылӥз-быдтӥз.
Currently Selected:
Маккавейёслэн 1-тӥ книгазы 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016