Маккавейёслэн 1-тӥ книгазы 7
7
7-тӥ ЛЮКЕТ
1Сю витьтон одӥгетӥ арын Селевклэн Димитрий пиез, Римысь потыса, кӧня ке муртэн ӵош зарезь дурысь одӥгаз городэ пыриз но эксэй кариськиз. 2Атайёсызлэн эксэй юртазы пырыку, ожгарчиос Антиохен Лисиез кутӥзы, соосты со доры ваён вылысь. 3Та уж солы тодмо луиз но, со шуиз: «Соослэсь ымнырзэс мыным эн возьматэ». 4Соку ожгарчиос соосты виизы но, Димитрий ас эксэйлыкезлэн эксэй пукон вылаз пуксиз. 5Соку со доры законлы пумит улӥсь, сьӧлыклэсь кышкасьтэм вань израиль пиос лыктӥзы, соосын кивалтӥз Алким, священник луэмез потӥсь мурт; 6эксэй азьын калыкез янгыше уськытыса, соос шуизы: «Иуда, солэн агай-вынъёсыз но тынэсьтыд вань эшъёстэ быдтӥзы, милемыз но ас музъемысьтымы улляса лэзизы. 7Озьыен, осконо мурттэ таре ысты, вань куашкатэм-таркам бервылэз со мыныса мед адӟоз, милемлы но, эксэйлэн кунэзлы но кыӵе изъян соос лэсьтӥзы; соосты но, соослы юрттӥськисьёсты но вӧсь мед кароз». 8Эксэйлэн эшъёсыз пӧлысь эксэй Вакхидэз бырйиз, со шур тупалась шаерен кивалтӥз, кун-эксэйлыкын со быдӟым адями, эксэйлы оскиськымон мурт вал, 9сое но сьӧлыклэсь кышкасьтэм Алкимез эксэй израиль пиослы пунэмзэ берыктыны ыстӥз, Алкимлы священник луон сётӥз. 10Соос кошкизы но бадӟым армиен Иудей музъеме вуизы; Иуда доры, солэн агай-вынъёсыз доры тупаса улон сярысь вераськон нуисьёсты ыстӥз, но отын кескич ӵектонэз вал. 11Нош Иуда аслаз агай-вынъёсыныз соослэсь верам кылзэс кабыл ӧз басьтэ, соослэсь туж трос ожгарчиосын ӵош лыктэмзэс адӟизы уго. 12Алким доры, Вакхид доры зэмлыкез утчаны книга тодӥсьёслэн кенешсы люкаськиз. 13Израиль пиос пӧлын нырысь интыын вал асидейёс, соос Алкимен Вакхид дорысь тупаса улон утчазы, 14шуо вал уго: «Аарон выжыысь священник армиен ӵош лыктӥз, асьмеды ӝоже уз уськыты». 15Вакхид соосын каньылэн вераськиз, соосты оскытыса, кыл сётыса шуиз: «Ми тӥледлы, эшъёстылы но уродзэ ум лэсьтэ». 16Соос солы оскизы, нош соос пӧлысь куатьтон воргоронъёсты со кутӥз но одӥг нунал куспын вииз, кызьы шуэмын Священной Гожтэмын: 17«Дун-чылкытъёсызлэсь мугорзэс, соослэсь вирзэс Иерусалим котыре кисьтӥзы, соосты ватыны но нокинлы луиз». 18Вань калык Алкимен Вакхидлэсь кышканы, куалекъяны кутскыса шуизы: «Соос дорын зэмлык, шонерлык ӧвӧл, уго соос пуктон-косонэз, оскытыса сётэм кылзэс сӧризы». 19Соку Вакхид Иерусалим дорысь кошкиз но Визеф вӧзы лагерьзэ интыяз, дорысьтыз трос пегӟем муртъёсты, калык пӧлысь куд-огзэ кутӥз но бышкалтыса виылӥз, мур колодчае куяз.
20Кун ужез Вакхид Алким кие сётӥз, солы юрттӥськыны ожгарчиосты кельтӥз; собере Вакхид эксэй доры мынӥз. 21Архиерее мед пуктозы шуыса, Алким кужмысь курыны кутскиз. 22Ас калыксэс бугыръясьёс ваньзы со доры лыктӥзы но Иудей музъемез киултӥзы, Израилез туж зол тарказы-куашкатӥзы. 23Иуда адӟиз, Алким эшъёсыныз израиль пиослы язычникъёс сярысь но троссэгес урод-лек ужъёс лэсьтӥз шуыса, 24соку со Иудеялэн вань ёросъёстӥз ортчиз, оскон бордысь куштӥськемъёслы пунэмзэ берыктӥз, – соку соос та кунэ пырамысь дугдӥзы. 25Иудалэсь но со бордын улӥсьёслэсь кужым люкамзэс Алким адӟиз, со валаз: соослы пумит сылыны уз быгаты, – соку со эксэй доры берытскиз но лек кылъёсын соосты янгыше уськытъяз. 26Соку эксэй аслэсьтыз одӥгзэ данлыко азьветлӥсьсэ, Никанорез, Израильлэсь тушмонзэ, сое адӟемпотостэм карисез, ыстӥз, та калыкез быдтыны косӥз. 27Никанор Иерусалиме бадӟым армиен вуиз но Иуда доры, солэн агай-вынъёсыз доры кескичлыко малпанэн тупаса улон сӥзись кылъёс вераны ыстӥз: 28«Мон куспын но тӥ куспын ожмаськон медаз луы; кӧня ке адямиеным ӵош мон тӥ доры каньыл мылкыдын, тӥледын ваче ымныр адӟиськыны пыро». 29Со Иуда доры вуиз, каньыллыкен ог-огзэс ӟечкылазы, нош со виын солэн ожгарчиосыз Иудаез киултыны дасяськыса улӥзы. 30Иудалы тодмо луиз солэн кескич малпанэн лыктэм мугез, солэсь кышкатскиз, солэсь ымнырзэ ик адӟемез ӧз ни поты. 31Никанор тодӥз, солэн малпанэз шарае потӥз шуыса, соку со Хафарсалам доры Иудаен ожмаськыны потӥз. 32Никанор бордысь ог вить сюрс ожгарчиос бырыны шедизы, нош кылемез Давидлэн городаз пегӟизы. 33Та бере Никанор Сӥон гурезь йылэ тубиз; соку вӧсяськон интыысь куд-ог священникъёс, калыклэн тӧроосыз каньыллыкен сое ӟечкылан вылысь, эксэй понна сётӥськись тылын сутӥськись курбонэз возьматыны потӥзы. 34Нош со соосты серем кариз, соосты сантэмаз, саптаз, соосын вылӥ мылкыдын вераськиз, 35кыл сётыса, туж йыркуръяськыса шуиз: «Иуда но солэн армиез туннэ мон кие сётэмын ӧз ке луэ, соку, ӟечкын татчы берытски ке, та Коркаез суто», собере туж бадӟым йыркурен татысь кошкиз. 36Нош священикъёс пыризы но курбон сётон ӝӧклэн, храмлэн азяз султыса бӧрдыны кутскизы, шуизы: 37«Тон, Кузё-Инмаре, та Коркаез – отын Тынэсьтыд нимдэ сӥлы мед карозы, со вӧсяськон корка мед луоз, Тынад калыкедлэн вӧсяськон коркаез мед луоз шуыса Аслыд бырйид. 38Та адямилы, солэн армиезлы но пунэмзэ берыкты, меч улын мед бырозы; соослэсь лек кылын сантэмамзэс тодад вай, эшшо но татчы кыльыны соослы эрик эн сёты». 39Никанор Иерусалимысь потӥз но Вефорон вӧзы лагерьзэ интыяз, со борды Сирияысь ожгарчиос итӥськизы. 40Нош Иуда куинь сюрс ожгарчиосыныз Адас вӧзы интыяськиз; Иуда вӧсяськыса шуиз: 41«Кузё-Инмаре! Ассириялэн эксэезлэн ыстэм муртъёсыз лек, сантэман кылъёс вераса улыку, Тынад Кылчинэд лыктӥз но соос пӧлысь сю тямыстон вить сюрс адямизэс погыртӥз. 42Озьы ик али но ми азьын та уллёез пыргыты, мукетъёс но мед тодозы, соос Тынад святыняосыд вылэ сантэман кылъёс веразы шуыса; урод-лек сямзы понна соосты вӧсь кар». 43Адар толэзьлэн дас куинетӥ нуналаз армиос ваче ожмаськыны кутскизы, Никанорлэсь армизэ пазьгизы, со ачиз ожын нырысь ик виемын вал. 44Никанор кулэмын ни шуыса, ожгарчиосыз адӟизы но, ожмаськон тӥрлыкъёссэс сэрпалляса, пегӟыны кутскизы. 45Быдэс нунал ӵоже израиль пиос Адасысен кутскыса Газираозь ик соос сьӧрын уйылӥськыса ветлӥзы, соослэн бӧрсязы ивортӥсь гумыосын пеллязы. 46Иудеялэн вань ёрос гуртъёсысьтыз калык потылӥз, тушмонэз котыртӥзы, – нош соос, уйиськисьёс пала берыктӥськыса, ваньзы меч улэ сюрыса кулӥзы, соос пӧлысь огез но улэп ӧз кыльы. 47Соослэсь ваньбурзэс, лушкам-талам тӥрлыксэс иудейёс киулазы басьтӥзы, Никанорлэсь йырзэ, солэсь вылтӥяськыса урдылэм бур кизэ ӵогыса вайизы но Иерусалим азе ошизы. 48Калык туж шумпотӥз, со нуналэз со туж бадӟым праздникез кадь ортчытӥз. 49Арлы быдэ Адар толэзьлэсь дас куинетӥ нуналзэ праздник карыса ортчытылыны вераськизы. 50Кӧня ке дырлы Иудей музъем буйгатскиз.
Currently Selected:
Маккавейёслэн 1-тӥ книгазы 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016