Левит 10
10
10-тӥ ЛЮКЕТ
1Ааронлэн Надавен Авиуд пиосыз кыксы ик асьсэлэсь кадилозэс басьтӥзы, отчы тыл понӥзы, ческыт зын поттӥсь арбериос понӥзы но Кузё-Инмар азе ярантэм, Кузё-Инмарлэсь соосты вайыны косымтэзэ тылэз вайизы; 2соку Кузё-Инмар дорысь тыл потыса соосты сутӥз, Кузё-Инмарлэн син азяз соос кулӥзы. 3Соку Моисей Ааронлы шуиз: «Тани Кузё-Инмар мар сярысь вераз, тазьы шуыкуз: ”Мынам матам лыктӥсьёс бордын Аслэсьтым дун-сьӧлыктэм луэмме возьмато, вань калык азьын данэ пото”». Аарон чус улӥз. 4Ааронлэн атаезлэн Узиил вынызлэсь Мисаилэн Елцафан пиоссэ Моисей ӧтьытӥз но соослы шуиз: «Мынэ, вӧсяськон интыысь станлэн сьӧраз ӵыжы-выжыостылэсь шӧйёссэс поттэ». 5Лыктӥзы но, дэременызы шобыртыса, соосты станлэн сьӧраз поттӥзы, Моисейлэн косэмезъя лэсьтӥзы. 6Нош Ааронлы но солэн Елеазар, Ифамар пиосызлы Моисей шуиз: «Медад кулэ, вань калык вылэ вожпотон медад вае шуыса, йырдэс гольык эн кельтэ, дӥськуттэс эн кесялэ; нош тӥляд агай-вынъёсты, быдэс израиль калык, Кузё-Инмарлэн тылын сутэмъёсыз понна бӧрдыны быгатӥськоды; 7медад кулэ шуыса, вӧсяськон скиниялэн ӧстӥз эн потэ, уго тӥляд вылады Кузё-Инмарлэн зырӟем вӧйыз». Моисейлэн верам кылызъя лэсьтӥзы.
8Кузё-Инмар Ааронлы тазьы вераз, тазьы шуиз: 9«Тон но, тынад пиосыд но медад кулэ шуыса, вӧсяськон скинияе пырыкуды [яке курбон сётон ӝӧк доры лыктыкуды], вина но, кудӟытӥсь юонъёсты огзэ но эн юэ; та тӥляд выжыостылы пумтэм вапумъёс ӵожелы сётэм пуктон-косон, 10дун-чылкытэз дун-чылкыт луисьтэмлэсь, кырсез чылкытлэсь висъяны мед быгатоды, 11израиль пиосты Кузё-Инмарлэн Моисей пыр соослы верам вань пуктон-косонъёсызлы дышетыны мед быгатоды».
12Соку Моисей Ааронлы, Елеазарлы, Ифамарлы – Ааронлэн улэп кылем пиосызлы – шуиз: «Кузё-Инмарлы курбонлы ваем салам нянь пӧлысь кылем люкетсэ басьтэ но та юмалын пыжемез курбон сётон ӝӧк дорын сие, уго та быдӟым святыня; 13сое святой интыын сие, уго Кузё-Инмарлы сётэм курбонъёс пӧлысь та тынад люкетэд, тынад пиосыдлэн но люкетсы: тазьы [Кузё-Инмар дорысь] мыным лэсьтыны косон сётэмын. 14Курбон сӥльлэсь сэзъяса вылэ ӝутэм люкетсэ – мӧлязэ, пельпумзэ – чылкыт интыын сие, тон ачид но, пиосыд но, нылъёсыд но ваньды огазьын сие, уго та израиль пиослэн тупаса улонлы сӥзьыса сётэм курбонзы пӧлысь тыныд но, пиосыдлы но люкетлы сётэмын. 15Кӧй курбонъёсын ӵош соос пудолэсь мӧлязэ, пельпумзэ, Кузё-Инмар азьын сэзъяса, вылэ ӝутыны кулэ, пумтэм вапумъёслы та тыныд но, пиосыдлы но, [нылъёсыдлы но] тонэн огазьын люкетлы мед луоз, кызьы Кузё-Инмар [Моисей пыр] косон сётӥз». 16Сьӧлык понна курбон сётыны ваем кечтакаез Моисей утчаз, но тани, со сутэмын ни. Соку [Моисей] Ааронлэн Елеазарен Ифамар улэп кылем пиосыз вылэ вожзэ поттӥз, со шуиз: 17«Малы тӥ сьӧлык понна курбон сётэм пудо сӥлез святой интыын ӧд сие? Уго со быдӟым святыня, тӥледлы со сётэмын калык вылысь сьӧлыкъёсты быдтон понна, Кузё-Инмар азьын соосты чылкытатон понна; 18тани, солэн вирыз вӧсяськон скиния пушкы пыртэмын ӧвӧл, нош тӥ сое святой интыын сиыны кулэ вал, кызьы мыным косэмын вал». 19Аарон Моисейлы шуиз: «Тани, туннэ соос Кузё-Инмар азьын сьӧлык понна курбонзэс вайизы, тылын сутӥськись курбонзэс вайизы, озьы ке но та учыр монэн луиз; туннэ мон сьӧлык понна курбон сётэм пудолэсь сӥльзэ сии ке, со Кузё-Инмарлэн син азяз ярамон луоз-а?» 20Тае Моисей кылӥз, кабыл басьтӥз.
Currently Selected:
Левит 10: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
