Левит 11
11
11-тӥ ЛЮКЕТ
1Соку Кузё-Инмар Моисеен Ааронлы тазьы вераз, тазьы шуиз: 2«Израиль пиослы вералэ: ”Тани музъем вылысь вань пудоос пӧлысь таӵеоссэ тӥледлы сиыны яра: 3вайяськем гижыё ке, гижыосаз мур кыретэз вань ке, сыскиськыса сиське ке, со пудоез сие, 4сыскиськыса улэ ке но, нош гижыосыз кыклы люкиськемын ӧвӧл – верблюд со, солэсь сӥльзэ эн сие, тӥ понна со кырсь пудо мед луоз; 5тушканчикез но эн сие, со сыскиське ке но, солэн кыклы люкиськем гижыосыз ӧвӧл, тӥ понна со кырсь маке мед луоз; 6лудкечез но эн сие, со сыскиське ке но, солэн кыклы люкиськем гижыосыз ӧвӧл, тӥ понна со кырсь маке мед луоз; 7парсез но эн сие, гижыосыз кыклы висъяськемын, гижыосаз мур кыретэз вань ке но, нош со уг сыскиськы, соин ик со тӥ понна кырсь мед луоз; 8соослэсь сӥльзэс эн сие, шӧйзы борды киыныды эн йӧтӥське; кырсесь соос тӥ понна. 9Вуын улӥсь вань улэп макеос пӧлысь сие ваньзэ, кудъёсызлэн бурдъёссы вань, сьӧмзы вань – зарезьын-а, шурын-а уло – таӵеоссэ сие; 10нош вуын вань уясьёс пӧлысь, вуын вань улӥсьёс пӧлысь, кудъёсызлэн бурдъёссы, сьӧмзы ӧвӧл – зарезьын-а, шурын-а уло соос – ваньзы таӵеос юрӟымесь тӥледлы мед луозы. 11Тӥ понна соос юрӟымесь мед луозы: соослэсь сӥльзэс эн сие, шӧйёссылэсь юрдэ. 12Вуын улӥсь бурдтэм, сьӧмтэм улэп макеос ваньзы тӥледлы юрӟым мед потозы. 13Тылобурдоос пӧлысь таосызлэсь юрдэ – сӥльзэс эн сие, юрӟымесь соос: ӧрӟиез, грифез, зарезь ӧрӟиез, 14пиякушез, пӧйшурась ӧрӟиез но солэсь выжыоссэ, 15пӧртэм пумо куакаосты, 16страусэз, кучыранэз, чарланэз#11:16 чарлан – чайка, душесэз но солэсь выжыоссэ; 17пелёкучыранэз, бакланэз, ибисэз, 18юсез, пеликанэз, ванемез, 19каксяез#11:19 какся – цапля, туриез – солэсь выжыоссэ, варышез, урткыӵез. 20Вань нюж кыстӥськыса ветлӥсьёс, бурдоос, ньыль пыд вылазы ветлӥсьёс тӥледлы юрӟым мед потозы; 21вань нюж кыстӥськыса ветлӥсьёс, бурдоос, ньыль пыд вылазы ветлӥсьёс пӧлысь сиыны яра сыӵеоссэ гинэ, кудъёсызлэн кукъёссы мугорзылэн вылӥяз ӝутскыса уло музъем вылтӥ тэтчаса ветлон понна. 22Таӵеос пӧлысь сиыны яра: саранчаез но солы укшась выжыез, соламез но солы укшась выжыез, харголэз но солы укшась выжыез, хагабез#11:22 солам, харгол, хагаб – Палестинаын но мукет пӧсь шаеръёсын улӥсь саранчалы укшась нымы-кибыос но солы укшась выжыез. 23Ваньмыз мукетыз нюж кыстӥськыса ветлӥсьёс, бурдоос, кудъёсызлэн ньыль пыдзы вань, тӥледлы юрӟым мед потозы; 24соос борды йӧтӥськиды ке, тӥ саптаськоды: кин соослэн шӧйзы борды йӧтӥськиз ке, со мурт ӝытозьлы кырсь шуыса лыдъяськоз. 25Кин соослэсь шӧйзэс кияз кутоз, со мурт дӥськутсэ миськыны кулэ, со ӝытозь кырсь шуыса лыдъяськоз. 26Гижыоссы кыклы люкиськемын ке, нош отын мур кыретэз ӧвӧл ке, уг сыскиськы ке, вань сыӵе пудоос тӥледлы кырсь мед луозы: кин ке со борды йӧтӥськиз ке, [ӝытозьлы] кырсь луоз. 27Вань ньыль пыдо, пӧйшуръёс пӧлысь лапа вылазы лёгиськыса ветлӥсь пӧйшуръёс тӥледлы кырсь мед луозы: кин ке соослэн шӧйзы борды йӧтӥськиз ке, со мурт ӝытозь кырсь шуыса лыдъяськоз; 28соослэсь шӧйзэс кин ке кияз кутӥз ке, со мурт дӥськутсэ миськыны кулэ, ӝытозьлы со кырсь шуыса лыдъяськоз: соос тӥ понна кырсесь.
29Тани музъем вылтӥ нюж кыстӥськыса ветлӥсьёс пӧлысь кинэ тӥ кырсь шуыса лыдъяны кулэ: мудӥсь шырез, шырез, кенӟалиез – аслыз укшась выжыосын ӵош, 30анакаез, хамелеонэз, летааез, хометэз но тиншеметэз#11:30 анака, летаа, хомет но тиншемет – таос ваньзы Палестинаын улӥсь, кенӟалилы укшась, нюж кыстӥськыса ветлӥсь макеос – 31вань нюж кыстӥськыса ветлӥсьёс пӧлысь таосыз тӥледлы кырсь мед луозы: кин таослэн шӧйзы борды йӧтӥськиз ке, ӝытозь со мурт кырсь шуыса лыдъяськоз. 32Таос пӧлысь кудзылэн ке но шӧйзы кыӵе ке пулэсь лэсьтэм сосуд вылэ яке дӥськут вылэ, яке ку вылэ, яке пуйы вылэ, уже кутӥськись кудӥз ке но арбери вылэ усиз ке, соос кырсесь луозы: соосты вуэ пононо, ӝытозь соос кырсесь шуыса лыдъяськозы, бӧрысь – чылкытэсь луозы; 33таос пӧлысь кудзылэн ке но шӧйзы горд сюйлэсь лэсьтэм сосудэ усиз ке, маиз отын вал, со кырсь луоз, ассэ [сосудэз] пильыса куштэ. 34Та сосудын возиськем ву сиыны ярамон сиён вылэ усиз ке, соку со сиён [тӥ понна] кырсь луоз, та сосудысь котькыӵе юонъёс но кырсесь луозы. 35Таослэн шӧйзылэн люкетэз маке вылэ усиз ке, со кырсь луоз; гурез, учогез кырсьлы луыса куашкатоно, соос тӥ понна кырсесь шуыса мед лыдъяськозы; 36ошмес но вуэз люкан понна лэсьтэм гудӟем гинэ чылкытэсь кылё; нош кин шӧй борды йӧтӥське, со кырсь луэ. 37Таослэн шӧйзылэн куд ке но люкетыз кыӵе ке но кизёно кидыс вылэ усиз ке, со чылкыт; 38нош вуэн киськам кидыс вылэ таослэн шӧйзылэн кыӵе ке но люкетэз усиз ке, со тӥ понна кырсь мед луоз. 39Тӥляд сиёно пудоды пӧлысь кудӥз ке кулӥз ке, солэн шӧй бордаз йӧтӥськем мурт ӝытозьлы кырсь луоз; 40кин ке солэсь шӧйзэ сииз ке, со мурт дӥськутсэ миськыны кулэ, ӝытозь со кырсь шуыса лыдъяськоз; кин ке солэсь шӧйзэ нуыса поттӥз ке, со мурт дӥськутсэ миськыны кулэ, ӝытозь со кырсь шуыса лыдъяськоз. 41Музъем вылтӥ нюж кыстӥськыса ветлӥсьёс ваньзы тӥледлы юрӟымесь мед потозы, соосты сиыны уг яра; 42кӧт вылазы ветлӥсьёсты, ньыль пыд вылазы яке солэсь но тросгес пыд вылазы нюж кыстӥськыса ветлӥсьёсты эн сие, уго соос юрӟымесь; 43лулдэс эн сапталэ нюж кыстӥськыса ветлӥсьёсын, соосын асьтэдыз эн сапталэ, соос пыр кырсесь медад луэ, 44уго Мон – Кузё-Инмар, тӥляд Инмарды, дун-чылкытэсь луэ, дун-чылкыт улэ, уго Мон [Кузё-Инмар, тӥляд Инмарды] дун-чылкыт; асьтэлэсь лулдэс эн сапталэ музъем вылтӥ нюж кыстӥськыса ветлӥсь улэп макеен, 45уго Мон – Кузё-Инмар, тӥледлы Инмар луон понна Египет музъемысь тӥледыз поттӥсь. Озьыен, дун-чылкытэсь луэ, уго Мон дун-чылкыт.
46Тани пудоос, тылобурдоос, вуын улӥсь вань улэп макеос, музъем вылтӥ нюж кыстӥськыса ветлӥсь вань улэп макеос пумысен сётэм закон, 47та законъя тӥ кырсез чылкытлэсь, сиыны лэзем пудоез сиыны лэзьымтэ пудолэсь, пӧйшурлэсь тодманы-висъяны мед быгатоды”».
Currently Selected:
Левит 11: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
