Левит 9
9
9-тӥ ЛЮКЕТ
1Тямысэтӥ нуналэ Моисей Ааронэз, солэсь пиоссэ, Израильлэсь тӧрооссэ дораз ӧтчаз, 2Ааронлы со шуиз: «Ошъёс пӧлысь сьӧлыкъёс понна курбонлы сётыны аслыд ошпиез кут, тылын сутӥськись курбон сётыны такаез кут, кыксы но шектэмесь мед луозы, соосты Кузё-Инмар азе султыты; 3израиль пиослы шу: ”Сьӧлык понна курбон сётыны кечтака вае, тылын сутӥськись курбон сётыны [така], одӥг аресъем ошпи, ыжпи вае, соос шектэмесь мед луозы, 4тупаса улонлы сӥзем курбон сётыны ош, така вае. Ваньзэ тае Кузё-Инмар азьын курбон сётыны вае, вӧйын пыжем салам нянь но вае, уго туннэ Кузё-Инмар тӥледлы возьматскоз”». 5Моисейлэсь косэмзэ вӧсяськон скиния азе вайизы, вань калык лыктӥз но Кузё-Инмар азе султӥз. 6Соку Моисей шуиз: «Тани Кузё-Инмар ма лэсьтыны косӥз, соку тӥ дорын Кузё-Инмарлэн пиштӥсь данлыкез возьматскоз». 7Соку Моисей Ааронлы шуиз: «Курбон сётон ӝӧк дуре султы но сьӧлык понна курбондэ сёт, тылын сутӥськись курбондэ сёт, астэ но, калыкез но сьӧлыкъёслэсь сузя, калыклэсь саламзэ-кузьымзэ курбонлы вай, кызьы Кузё-Инмар косӥз, озьы соосты сьӧлыкъёслэсь сузя».
8Аарон курбон сётон ӝӧк дуре лыктӥз но аслаз сьӧлыкъёсыз понна ошпиез курбон сётӥз: 9Аарон пиос солы курбон пудолэсь вирзэ сётӥзы, чиньызэ вире веттӥз но курбон сётон ӝӧклэн сюръёсыз вылэ вирез понӥз, нош кылемзэ вирез курбон сётон ӝӧклэн выжыяз кисьтӥз; 10нош сьӧлык понна курбон сётэм пудолэсь кӧйзэ, пекляоссэ, мус бордысь кӧй пуйыез курбон сётон ӝӧк вылын сутӥз, кызьы Кузё-Инмар Моисейлы косон сётӥз; 11нош сӥльзэ но кузэ, стан сьӧры поттыса, тылын сутӥз. 12Тылын сутӥськись курбон пудо вандӥз, Аарон пиос солы курбон пудолэсь вирзэ сётӥзы; со вирын Аарон курбон сётон ӝӧкез котыр ласянь пазяз; 13солы тылын сутӥськись курбон пудолэсь мугор люкетъёссэ, йырзэ вайизы но, соосты со курбон сётон ӝӧк вылын сутӥз, 14нош пуш арбериоссэ, кукъёссэ миськиз но тылын сутӥськись курбонэн ӵош курбон сётон ӝӧк вылын сутӥз. 15Калыклэсь салам-кузьымзэ курбон вайиз: сьӧлыкъёс понна курбон сётыны калыклэсь кечсэ кутыса вандӥз но азьвылзэ сямен ик сьӧлыкъёс понна курбон сётӥз. 16Тылын сутӥськись курбон сётӥз, та ужез пуктон-косонъя быдэстӥз. 17Салам нянез кияз кутӥз но курбон сётон ӝӧк вылын сутӥз, – ӵукна тылын сутӥськись курбон вӧзы вал таиз. 18Калыклэсь ваем ошсэ, таказэ тупаса улонлы сӥзем курбонлы вандӥз; Аарон пиос солы курбон пудолэсь вирзэ сётӥзы, нош со курбон сётон ӝӧкез котыр ласянь вирен пазяз; 19ош пушкысь кӧез, такалэн быж бордаз ошиськыса улӥсь кӧй пуйыез, озьы ик [пуш арбериос вылэ] люкаськем [кӧез], пекляоссэ но мус бордысь кӧй пуйызэ вайизы, 20кӧез мӧля вылэ понӥзы, собере Аарон кӧез курбон сётон ӝӧк вылын сутӥз; 21нош ошен такалэсь мӧлязэс но бурпал пельпумзэс Аарон Кузё-Инмар азьын сэзъяса вылэ ӝутӥз, Моисей косэмъя лэсьтӥз. 22Аарон, калык пала берыктӥськыса, киоссэ ӝутӥз, калыкез бакель кариз, сьӧлык понна курбонэз, тылын сутӥськись курбонэз, тупаса улонлы сӥзем курбонэз сётэмез бере со курбон сётон ӝӧк дорысь васькиз. 23Моисеен Аарон вӧсяськон скиния пушкы пыризы но потыса калыкез бакель каризы. Соку Кузё-Инмарлэн пиштӥсь данлыкез вань калыклы возьматскиз: 24Кузё-Инмар дорысь тыл потӥз но курбон сётон ӝӧк вылысь тылын сутӥськись курбонэз, кӧез сутӥз: тае адӟыса, вань калык шумпотэменыз черектӥськиз, ымныр вылаз выдӥз.
Currently Selected:
Левит 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
